我老婆已經係好慳家嗰種人，鑽石戒指唔畀我買大粒，擺酒唔畀我揀最貴嘅菜單，所有嘢佢都不厭其煩係咁格價，但係結婚要用嘅錢實在太多，就好似倒水一樣。
畀完擺酒嗰7萬幾蚊，再加上租婚紗同埋影pre-wedding，未計禮金餅卡過大禮印帖等等濕星嘢，打開個online banking已經見到信用卡欠緊六位數，雖然有晒心理準備，但難免會寒一寒。
籌備婚禮頭幾個月嘅心情好差，因為太多繁文縟節，仲有煩緊點樣變4個兄弟出嚟，總之嗰一排睇乜嘢都唔順眼，乜都鬧一餐，當時我講得最多嘅一句說話應該係：「發明結婚要擺酒嗰條友真係要死全家！仲要無限輪迴喺地獄死一百次！」
你試下諗真啲，我同老婆識咗咁耐，親戚朋友都全部相識，但就要畀錢請個三九唔識七嘅律師嚟做見證，雖然明白呢個係法律程序，不過你唔覺得好諷刺咩？
仲有好多戇鳩無極限嘅細節，例如龍鳳餅過完大禮要擺櫃頂，擺到佢發霉，寓意大發特發；前一晚準新人唔可以見，又要搵個「幸福的女人」幫手梳頭；結婚當日出門要坐住架車兜一個大圈，代表轉大運，不過要避開迴旋處，因為咁樣係唔吉利，將來隨時會重婚；回門後拆車頭公仔，否則就有翻頭嫁嘅意味……
以上只係一小部分咋，得罪講句，中國人嗰啲迷信同傳統禮儀真係不知所謂，仲要人人唔同講法，根本冇一個標準答案，而畀意見嘅人又會覺得自己係專家。
然後仲有無窮無盡嘅比較：
「點解揀呢間酒店呀？麻麻咋喎！我有個friend喺Ritz Carlton擺，個場好靚。」
鬼唔知咩！我擺得幾圍，Ritz Carlton最低消費20幾萬，你講就梗係冇責任啦，因為錢係我出。
「點解唔買對有牌子嘅高踭鞋呀？結婚人一世物一世。」
我老婆話，結婚嗰對特別高，佢平時都唔會着，着一次買名牌做乜呀？
「戒指粒石咁細嘅？」
人人把尺唔同，咩為之大？咩為之細？
「點解唔揀星期六日擺酒呀？」
我想㗎咩？呢啲永遠係長輩衝出嚟話幫你擇日，有L得揀呀？中國人最迷信㗎嘛！第一日知咩？
「點解冇魚翅呀？我要食魚翅呀！唔知呀！我要食魚翅！」
好多地方已經係無翅婚宴㗎喇，瞓咗幾耐呀？前世未食過魚翅呀？
我明白有啲人係無心快語，隨口講一句咩都加意見，但其實呢啲說話係完全冇建設性，只會加重準新人嘅心理壓力甚至負擔，塘邊鶴真係特別麻煩。
成日話結婚係兩個人嘅事，完全唔覺囉！根本就係兩家人嘅事，甚至係好多人嘅事，所以唔使理咁多，壓力係人哋比，點樣消化就睇自己，一百個人有一百套準則，滿足到幾多個？
塘邊鶴雖然多，但好人亦唔少，危急關頭竟然有4個奇兵從天而降幫手做兄弟，喺度借位講聲多謝先，我4個表妹義不容辭提出反串，真係感動到喊出嚟，最終婚禮順利完成，原來女仔做兄弟都幾型，個個著西裝啲「仔味」出晒嚟，又同時保留女仔嗰份細心，估唔到效果咁好。
班表妹未請纓之前，其實我好頭痕㗎，去google search「請人做兄弟」、「職業兄弟」、「full time婚禮兄弟」、「part-time婚禮兄弟」、「婚禮兄弟時薪」、「DLLM我結婚冇兄弟」……通通都冇結果，淨係出間財務公司畀我，妖！唔係嗰啲兄弟呀！
同一時間，我發現呢個行業有得做，唔使成立公司，唔使申請BR，當freelance咁接。
因為呢件事唔係求人，反而係畀錢人賺，所以我搵咗Rocky，佢聽咗一句已經應承，呢啲咪叫感同身受囉，大家都清楚市場有呢個需要。
Rocky提議搵埋當年個順豐哥哥阿偉，估唔到佢又應承喎，仲介紹埋個親細佬畀我哋識，呢個「婚禮兄弟」project有4個鐵膽，即刻做宣傳開工，唔夠半個月已經接到第一單生意，收入仲幾可觀。由於我哋有基本收費之餘，仲有其他附加項目，例如接新娘嗰陣要兄弟行石春路食wasabi，加錢！婚禮前要同姊妹另外食飯傾rundown，加錢！需要幫手喺Big Day之後還婚紗禮服，加錢！閒日擺酒，加錢！因為要請假吖嘛，貴好多㗎！
後來我仲加開埋「婚禮姊妹」服務，情商4個表妹有需要時客串演出，不過講開又講，呢壇生意真係辛苦錢。
（未完待續）