想分享自己之前失業嘅經驗，因為冇咗份工，當時都幾迷惘，然後send咗一堆CV出去又冇嘢返，期間見過一份工，見完冇下文，又要交租又要食飯，愈諗愈抑鬱，後來我去咗個好國際化嘅freelance網，睇下有啲咩散job或者part time可以做，原來又真係有嘢啱我喎！
個freelance網有世界各地嘅人將自己「掛牌」，有啲幫人寫programme，有啲幫人翻譯，有啲幫人作曲，有啲幫人design logo，好不幸，我樣樣都唔識，但偶然發現有外國人「掛牌」做Spokesperson！
Spokesperson係做咩呢？通常係啲人有產品或者服務要拍條介紹片，例如針對美國市場，咁佢哋就會搵返個正宗嘅美國人用美國口音去陳述，令佢哋target嘅地區客戶聽得明同埋增添親切感。
雖然我冇受過專業嘅DJ或者配音訓練，不過講嘢自問字正腔圓，而且我係幾叻扮聲，要我扮小朋友又得，扮到好正經報新聞咁樣又得，就算扮動畫聲都ok㗎，所以我就膽粗粗試下，反正當時冇嘢做，好過坐喺度坐食山崩吖！
對比起英語市場，用廣東話或者國語做Spokesperson嘅人係少啲，競爭冇英語咁大，咁當然啦，我相信需求量都少啲，結果我一開始就set到自己接job嘅價錢好低，印象中係港幣280蚊咁上下，估唔到未夠一個星期已經有兩個查詢，最後兩單都做得成。
嗰兩個客分別來自希臘同埋加拿大，前者係做電腦系統，後者係做房地產，我唔係KOL，唔係幫佢哋sell，我只係幫佢哋用中文介紹拍條片，佢哋再拎呢條片去周圍宣傳，放喺佢哋嘅網頁同埋social media，簡單嚟講，佢哋只係要一個人識將啲英文轉返中文再講出嚟。
呢兩個客都好滿意製成品，反而我自己聽返就發現有好多懶音，主動提出再錄過，佢哋其實已經透過個網站畀晒錢，可能覺得我好盡責，所以兩個客都好好，幫我寫晒好評，又畀5粒星，呢個就係我嘅Spokesperson工作愈接愈多job嘅轉捩點。
有好評之後，多咗人send msg嚟查詢，confirm job亦都唔少，因為愈嚟愈忙，我開始加價，由200幾蚊加到300幾蚊，由300幾蚊再加到500幾蚊，最後係700幾蚊，如果超過500字又會再on top加錢，如此類推。
期間我盡力令到自己再專業啲，直情買埋綠幕返屋企，因為我用綠幕做背景，啲客就可以輕鬆將我勾出嚟，再配落自己想要嘅background做條介紹片，除咗校對同埋譯返最接近嘅原意，我仲會免費幫客戶改3次，例如佢覺得我講得太快或者太慢，我都可以因應需求重錄。
剛開始呢份Spokesperson兼職嘅時候，第一個月賺得2千幾，但係第二個月已經有7千幾，跟住第三個月有萬幾，第四個月就差唔多2萬，足不出戶嚟講，我真係好滿意呢一份收入。
拍得片畀個客針對性對香港或者台灣嘅客戶群，咁就預咗會畀身邊啲friend睇到，因為你控制唔到個客將條片擺去邊度宣傳，結果真係有朋友發現，佢哋仲講笑咁話我做咗「代言人」，冇所謂啦，搵食啫，起碼我捱過咗嗰段失業嘅艱難日子。
喺度好想同搵緊工嘅朋友講，唔好太快放棄同埋灰心，財不入急門，搵工都係一樣，呢條路行唔通，咪試下行第二條路囉，最緊要唔好畀自己同埋情緒進入掘頭巷，最後行得返出去咪得囉！（我而家講得輕鬆，當日搵極都搵唔到工其實係好抑鬱，覺得咁多公司都冇人要，自己好似廢物一樣。）
幾個月過後，我終於成功搵返份full time喇，而家做咗一排都幾穩定，至於Spokesperson嘅工作都有keep住，但會揀job嚟接，例如之前有隻電子煙搵我用廣東話拍介紹片，呢啲咪推囉！跟住有個中國嘅婚姻介紹所搵我錄廣東話，因為佢想打香港市場，叫人嚟緊北上相睇，咁梗係推啦！畀啲friend見到我做中國婚介「代言人」仲得掂嘅！
大量減job之後，而家Spokesperson呢份freelance每月跌到得返幾千蚊收入，但因為已經搵返全職，所以ok啦！Spokesperson啲job直情當係bonus，我好阿Q精神咁諗，而家幾好吖，失業嗰陣嘗試咗一份從未諗過會做嘅part time，而家變相月月有額外收入，長遠嚟講都係好事呀！