「如果酒店旅館有尿餲味（尿騷味），十居其九代表有鬼……」
同同事去東京business trip，公司book咗間Airbnb畀我哋，兩個男人冇所謂啦！
入住當日稍稍整頓行李，休息一陣就出門去搵個客，離開Airbnb之後同事忽然話：「呢間bnb有污糟嘢！」
我：「唔係啩！你見到？唔好嚇我喎大佬！」
「我敏感體質，如果酒店旅館有尿餲味，十居其九代表有鬼，我哋自己出錢換正式酒店點睇？」
我：「……自己出錢？梗係唔制啦！出trip仲倒貼？」
由於我唔肯，呢個話題亦無疾而終，夜晚返bnb瞓覺，半夜同事喺隔籬床叫醒我（間房係兩張單人床），佢壓低把聲講嘢，第一次我聽唔到，始終半睡半醒狀態，然後佢再講多次：「聽唔聽到出面有聲？」
我思考咗一陣，答返佢：「聽唔到。」
「咁都聽唔到？嗱嗱嗱，又有喇！」
因為太眼瞓，我再講多次聽唔到，秒速又瞓返，呢次三日兩夜嘅日本business trip就咁結束，同事喺極度不安嘅狀態下捱完，我反而冇嘢，雖然未聽過酒店旅館有尿餲味即係有鬼，但我好清楚一件事，就係啲尿餲味應該屬於我……
日本好興一種叫「トイレマット」嘅U型氈，放喺馬桶下面，當日一入到bnb我就衝去小解，sorry我係企喺度屙，唔小心滴咗啲落張氈度，有味好合理，因為我後來都聞到，不過同事講到咁firm話自己敏感體質，我又唔好意思認屙尿整濕張氈。
至於半夜啲怪聲……其實我聽到，但我知係雪櫃製冰，嗰幾日東京熱到仆街，我見bnb個雪櫃有製冰功能咪製下囉，係耐唔耐就會傳出「咯咯咯」嘅聲，我屋企部雪櫃都係咁，一模一樣，因為啲冰跌落另一格，但當時太眼瞓唔想解釋咁多。
同事話佢第一晚完全冇瞓，第二晚冇咗怪聲，但仲有尿餲味，不過已經瞓得好咗，梗係啦，第二朝我開雪櫃撳返「停止製冰」吖嘛！