希望你唔好話我冷血……
公司請Tea Lady，因為工作簡單，所以我哋要求亦唔高，打算見兩個人就快快手決定，但其中一個女人嚟見工嘅時候，不斷重複叫我一定要請佢：「小姐，你請我啦，人工低啲都唔緊要㗎！」
我：「如果真係請，唔會壓低你人工嘅，一定同招聘廣告一樣，放心。」
女人：「我唔放心呀！好難先搵到呢一區請茶水，我一定要做到你公司㗎！我個仔喺你哋對面大廈返工，我就係唔放心，可以喺你呢度做茶水就唔同喇，到時朝早同佢一齊出門，食晏先拎個飯盒過去畀佢，放工咁近我等埋佢，所以加班唔都緊要㗎！最緊要你請我！」
我：「你個仔好細個？返暑期工？你好緊張佢喎！」
女人：「唔係返暑期工，佢30，但佢呢份工要由屯門返觀塘，好遠，我唔放心呀！小姐你一定要請我呀！好難得佢公司附近有呢啲空缺，我又做得嚟，仲要係寫字樓時間，你請我啦！」
唔知點解我完全感受唔到嗰份……母愛？淨係覺得成件事好窒息，個仔都30歲喇，點解唔畀啲空間佢？我自己都係由細到大畀父母拆晒啲信、摷我櫃桶、摷我啲袋同私人物品，所以當年搵到第一份工之後就決心搬出去住，大家有少少距離反而令到關係好啲。
最終我冇請到呢位媽媽，改為請咗另一位求職者，我可以做嘅就係咁多喇。
後來有同事質疑，會唔會呢位女士個仔有特殊照顧需要，我覺得就唔係喇，因為佢有提及自己個仔係做寫電腦程式嘅工作。