我做Sales，唔係導人迷信，但有啲嘢真係好邪，正正常常返工嘅日子一般都生意淡薄，不過當我放假或者唔喺office，啲客嘅查詢同埋生意就會「陷陷聲」咁嚟。記得3年前去北歐旅行，本身想勤勤力力做靚條數先起行，旅行開心啲吖嘛，點知嗰段時間靜過鬼，幾搏命都冇用。
然後去到機場check in，有客打嚟問我攞報價，已經夠晒狼狽㗎啦，因為乜嘢資料都冇喺手，又冇拎電腦，安檢後又收到另一位客人嘅email，呢個直頭簽埋張單……3個月前同佢傾嘅嘢，係要我過海關嗰一刻先走嚟confirm，仲要求我轉頭send invoice畀佢，我想放假呀！
去到北歐更加精彩，香港呢邊幾乎日日有enquiry同埋生意，好在我老婆擅長搵路，所以我大部分時間都係用電話覆嘢，耷低頭就咁跟住老婆行，最慘係要不斷WhatsApp香港班同事幫手，完全冇好好投入呢段旅程，諗返都覺得對老婆唔住，但我始終係做Sales，每張單都計佣，全部都係錢，幾唔情願都要做。
後來發現呢種情況唔係偶然，除咗去旅行例牌收到大量客人電話電郵之外，我請病假、事假，仲有蛇王出去做其他嘅時候，啲生意就會忽然旺場，邪到你唔信，而家咁講好似曬命，但每次遇到都會有少少忟憎，總之十次有八次都係咁。
有次公司食飯成班人傾計，我將呢個情況講咗出嚟，跟住老細仲要講笑：「有冇咁邪呀？咁你以後唔使返office囉！」班同事都知老細搞gag，自動自覺陪笑，我上司加多句：「即係炒你呀，聽日唔使返工喇！」做Sales係咁㗎啦，個個懶幽默，我咪一齊笑下囉！
後來公司生意真係好差，老細都不斷喺度呻，結果某日我因為要做身體檢查，所以索性請咗一日假，嗰日就犀利喇！唔知咩事大家都爆單，好多傾咗勁耐但冇回音嘅生意忽然落實，我自己當然唔例外啦，喺體檢嗰度又要抽血又要驗尿，每做完一part就要用電話覆email，又係呢啲時候搞我！
第二日返到公司，老細直接走埋嚟同我講：「你上次話自己唔喺office就爆數呀？真喎！噚日你唔喺度，幾單大嘢都搞掂晒，可能你同呢個office八字唔夾呀！」
當下我都唔知點畀反應，即係想炒我呀？但我呢邊都好多單喎！而家唔係我離開office就大家爆數，係我自己都爆到「陷陷聲」呀！
我：「係囉！好邪！單日做咗我上個月嘅生意總和。」
老細：「有啲嘢唔到你唔信㗎真係，你以後work from home又好，喺出面搵間cafe做嘢都好，總之唔好返嚟office喇，你當我迷信啦！」
結果老細真係勒令我唔好再返office，呢單嘢係2023年發生，而家2026年，差唔多3年喇，呢段時間我只係返過公司6至7次，個個同事都要返office，得我一個攞正牌唔使返，咁當然都要做嘢啦，好多時我係直接從屋企出發去見客。
連上司都會串我：「你就爽皮啦！鳩up一句就唔使再返公司。」
今年年頭我同老婆去北海道旅行，雖然話唔使返office啫，但我每次都會正式遞假紙，而上司例牌唔會處理，淨係提我去邊度都唔緊要，有需要時聽電話同埋覆email就夠喇！
所以由2023年直至而家，我一日大假都冇攞過，但又放咗好多大假，去咗好多旅行……
其實係咪keep住咁邪呢？我唔知呀！公司當然唔係日日爆數啦，不過只要我返office，當日就一定會死寂同慘淡，上次我要返office拎新卡片先再出去client visit，老細見到我出現就嗌我走，好似我留多一秒都會令公司執笠咁！
老婆質疑過啲大假點處理？因為冇official正式批假，呢樣就真係冇辦法，公司policy係大假冇得累積，每年會自動歸零，咁我唔通追返公司補假補錢咩，我本身有18日大假，而家一年去旅行都唔止18日，咁著數仲有乜好計？
我好enjoy唔使迫車返工放工，就快3年喇，老細完全冇打算叫我返去坐，但個位又keep住喺度冇人搞，我自己都覺得好爽！（完）