呢單嘢應該發生喺7年前左右。
當時我未做Headhunt，只係一個HR，某日倉務部有位同事冇返工，又冇打返嚟請假，問倉務部主管咩情況，佢表示唔知，不過會幫我打畀呢位下屬跟進。
呢位同事第二日繼續曠工，再問佢主管同埋其他倉務部員工都冇人知道下落，咁我唯有摷返佢當年入職填嘅form，睇下佢屋企幾多號電話，再唔係就搵佢嘅緊急聯絡人。
嗰個倉務主管叫我唔使咁緊張，可能係有緊要事行開咗，個下屬跟咗佢咁多年，有信心佢會返嚟。其實根本唔係信唔信心嘅問題，我亦冇考慮到扣薪或炒人等等瑣碎事，純粹係擔心，始終佢係旗下員工，有咩三長兩短咁點算呢？我又點知佢係唔係上次收工之後出事，或者係嗰朝返工遇到咩意外。
好在唔使打畀咩緊急聯絡人，因為打去屋企已經搵到呢位員工嘅阿媽聽電話，不過對方支吾以對，我不斷問有冇消息？有冇搵下佢其他朋友？再強烈建議對方報警，然後我發現自己仲緊張過佢屋企人。個人感覺離不開兩樣嘢，一係情債，一係錢債，總之要匿埋唔見人，但係當時都不禁飄過一個念頭：「係咪謀殺呀？兇手係佢屋企人定係倉務主管呀？」
如是者，屋企人話佢哋會報警同跟進，我亦唔知可以再做啲咩，只有每日follow up下，會計同事要計糧，佢哋已經問過我，亦向老細反映過，件事愈嚟愈煩，期間細節唔交代喇，總之十幾日後呢位倉務同事突然又返工……大哥呀！我唔理你喺出面搞大人個肚定係爭人幾百粒，希望你明白間公司唔係我話事㗎！你曠工咁耐炒得㗎喇，點都要解釋下啩！
消失的同事冇上嚟office同我哋任何人交代，反而係佢個主管上嚟叫我畀次機會。
我：「咁咩事曠工呢？份糧點計呢？老細一定唔會留佢㗎！」
「總之你畀次機會佢啦！」
我：「間公司唔係我老豆開㗎！」
「你睇下可唔可以同老細講句好說話啦！」
我：「點都好啦，一人做事一人當，你叫佢上嚟office先，咁大個人要自己面對㗎喇。」
醜婦終須見家翁，上嚟啦！
我：「你咩事曠工十幾日？」
「行政拘留……」
我：「拘咩留？犯咗事？」
「唉，我返大陸叫雞畀人拉咗，已經好慘㗎喇，唔好炒我啦！」
根據呢位倉務同事講，佢係返咗深圳一個叫沙咀嘅地方光顧髮廊，當然呢啲「髮廊」唔係剪頭髮啦，係可以入房提供性服務嗰種，最癲係佢講咗句：「本身畀3000蚊個公安就搞得掂㗎喇，不過當時身上冇咁多現金。」
原來畀錢係可以走後門放你，大前提係唔可以畀你出去撳錢，因為「見光死」，一係即畀，一係上車返派出所，冇現金即係自動放棄，要行政拘留十幾日，呢個就係佢曠工又冇交代嘅原因喇。
呢件事我請示咗老細，生殺大權唔喺我手，我執行㗎啫，最後老細叫咗佢主管上嚟，唔知係鬧定係拆掂數，總之最後個主管都保住呢位消失的員工，只係當佢曠工扣返份糧了事。
有時真係唔明白啲雞蟲，叫雞都已經夠衰㗎啦，仲要返大陸叫，北菇雞好食啲㗎咩？