《67:3》下 – 終於知道人言可畏

同Amanda一齊咗3個月,我曾經覺得自己好接近死亡,因為呢條女苛索得好犀利,講明一個星期要5次,佢話懷疑自己係性飢渴,仲好似好威咁同我講:「我試過一日同3個唔同嘅男仔做,全部係交友app識,嗰日係聖誕節,所以我晏晝傍晚同夜晚分別同3個男仔出嚟。」

其實佢係咪覺得呢啲屬於「威水史」?Amanda曾經同我講過一番說話:「性好重要,如果將來個老公滿足唔到我,我一定會偷食。」我知道佢係特登講畀我聽,個感覺就好似叫我醒醒定定,作為男人聽到個女朋友咁樣講,點會冇壓力呀?

Anyway,拍咗3個月拖,我已經好肯定Amanda唔會係我老婆,如果結咗婚要一個星期5次,有咩差池仲要接受佢去偷食,相信做人一定會好辛苦。

咁點解我當初仲要同佢一齊呢?因為Amanda表面真係唔似呢種女仔,佢外表好清純,入嚟公司冇耐已經睇中佢,點知反差會咁大。

我發現睇女仔真係唔好睇表面,好多外型好豪放嘅女仔,其實可以相當保守,反而有啲女仔睇落去好純,但原來係好癲好喪,甚至係玩家,呢個絕對係經驗之談。

三個月就分手,係因為Amanda飛咗我,佢嘅官方答案係性格不合,但我覺得係自己床上表現唔合格,開始時有新鮮感,一個星期5次當然求之不得啦,不過日子耐咗,咁做法唔止攰過返工,直情係攰過擔泥,我幾驚自己廿幾歲仔會馬上風呀!同Amanda分手之後,我甚至懷疑自己一度性冷感。

身心雖然好攰,不過呢間公司始終係67:3, 同你講無風無浪都冇人信啦,可惜之後主動撩我嘅女同事都唔係我杯茶,其中一個叫Yumiko嘅女仔又係好好笑,佢嘅手法同Penny同出一轍,嗰排大家傾多兩句啫,有個weekend夜晚佢就直接打畀我。

Yumiko:「屋企部冷氣壞咗呀!」

我:「咁點呀?」唔係又要去我屋企過夜啩,低手咗啲喎!

Yumiko:「你可唔可以過嚟幫我睇下?」

由於我對Yumiko興趣不大,加上之前冇幾耐先至畀Amanda「摧殘」完,所以我好直接咁回應:「冷氣機壞咗應該搵冷氣師傅吖嘛,搵我做咩?」

Yumiko:「我諗住你咩都識整吖嘛!」

痴線,你估做IT真係識整晒地球上所有電器咩!整冷氣都關IT人事?仲要係你屋企部冷氣喎,放過我啦,我唔抖,我細佬都要抖抖啦!

稍稍回氣之後,我決定向新目標進發,呢間公司對我嚟講唔係最終站,份糧亦唔係特別好,一直唔走只係唔捨得呢個67:3嘅環境,唔怕老實講,以前雖然有拍拖,但未致於溝女溝到予取予攜嘅境界,更遑論畀女圍同埋有女溝返我轉頭啦!所以不經不覺做咗一年幾,最終都只係同過Amanda一齊,其實好剋制㗎喇,我直頭覺得對唔住自己添呀!

我嘅新目標係Frances,呢條女有份「兼職」,係嗰啲Micro-Influencer,所以IG係public,有大把相可以睇,斯文look又有、性感look又有,連水著都有。

所謂嘅Micro-Influencer ,即係KOL嘅一種,當然冇咁紅啦,IG大約有一萬幾千個followers啦,不過我發現當中好多都係「水份」。

咩係「水份」?好易睇㗎咋!例如Frances咁樣,佢每個IG post都有幾百人like(水著會多啲),但係當你click入啲like度望清楚,就會發現超過3分2都係南亞人、非洲人,或者係台灣人,稍為有腦都知道啲like係買返嚟。

我點解會同Frances愈嚟愈熟呢,因為之前佢叫我幫手整機,傾計嘅時候竟然嗌我like佢啲post。

Frances:「Follow我吖,like埋我個post,呢個IG post係廣告嚟㗎,想多啲like呀!」

我:「冇問題,我仲有幾個假account,全部同你like晒佢!」

Frances:「你好好人呀!之後你要個個post都like㗎喎!」

我:「當然得啦!講開又講,呢啲廣告IG post有幾錢收?」

Frances:「次次唔同㗎,有啲幾百,有啲4位數,有啲就冇錢淨係送product畀我用,不過最慘係有啲客成日拖數,有單job只係幾百蚊,咁都拖半年。」

計埋自己真身個account,我一共有4個IG帳號,次次都「總動員」幫Frances like晒啲post,佢平均一個post有300 likes,得30個係真人,其餘270個都係來自南亞非洲同台灣,比例係270:30,同我哋公司個男女比例67:3有得揮。

話說回頭,雖然大部分都係買like,又有啲廣告job收唔到錢,不過Frances仍然做得好落力,佢每個post啲文字都係九唔搭八兼詞不達意,但係啲水著相真係好搏,我每次都睇到熱血沸騰,而Frances亦因為我好撐佢,所以彼此愈嚟愈多話題,仲約過好幾次出街食飯,後來我覺得時機成熟,準備向佢示愛。

我:「Frances,我可唔可以做你男朋友?」

Frances:「Er……可能我哋做朋友好啲。」

由於之前溝Amanda太順利,加上Penny同Yumiko分別示好,我嘅信心本來係前所未有地高漲,所以完全冇諗過Frances會say no,嗰下的確晴天霹靂,但既然開咗口,幾面懵都要問多兩句,盡力爭取啦!

我:「因為你唔想同同事拍拖?」

Frances:「又唔係。」

我試圖講笑製造氣氛:「係咪KOL唔方便拍拖呀?怕你啲fans會嬲?」雖然我知佢3分2嘅fans都係「水份」。

Frances:「我近排聽到啲嘢……有同事話你拉佢去開房……」

又係Penny條八婆!

我:「我冇呀!冤枉呀!其實係Penny話要去我屋企瞓咋,你聽我解釋先啦!」

Frances:「我都冇話係Penny……不過呢,我又聽到另一個同事話你嗰方面唔係好得……」

唔係啩!呢啲你都知?Amanda連床上表現呢啲咁私人嘅事都周圍唱?難怪當日我個舊同學話呢間公司啲人勁八婆啦,原來係咁誇張㗎!

其實我好想同Frances解釋清楚,Amanda一個星期要5次,一個月要做成20次呀,我仲識得勃起都算係咁啦,點解仲要同其他人講我嘅性能力有問題呀?仲講咗畀幾多人聽呀?如果成間office 67個女同事都認為我性無能,以後仲邊有面返工呀!

說時遲那時快,第二日返工已經畀IT個阿頭召咗入會議室,佢嘅第一句開場白就係:「我近排聽到啲嘢……」

我:「你又聽到啲咩呀?」噚日Frances已經講過呢句對白一次,所以我有不祥預感。

IT阿頭:「Marketing阿姐同我講,你搞佢啲下屬喎。」

我:「咩搞搞聲咁難聽呀,正常男歡女愛之嘛!」

IT阿頭:「Marketing阿姐話你撩Penny上你屋企瞓,做咩咁狼呀?」

我:「又係Penny條八婆,佢調轉嚟講,係條八婆話要上我屋企,我話唔方便,佢仲叫我出去酒店瞓咋!」

IT阿頭:「人哋女仔之家會主動要上你屋企?仲主動叫你去酒店?搵鬼信咩!你唔好咁啦!」

喂,你唔好咁啦!你冇女埋身梗係唔明啦,點可以用你嘅經歷去量度我嘅世界呀?

我:「真㗎!Penny話唔記得帶鎖匙,所以要上我屋企瞓。」

IT阿頭:「唔記得帶鎖匙?咁佢敲門咪得囉!」

我:「咪係囉!我都係咁樣同佢講。」

IT阿頭:「你咁嘅大話都講得出嘅,女仔嘅名節好重要㗎,你唔好咁樣講人啦!」

痴撚線㗎呢個世界,簡直係癲倒是非黑白,我真係又嬲又無助,已經唔知可以講咩。

IT阿頭:「你唔好再搞搞震喇,一陣連份工都冇埋呀,Marketing阿姐好嬲好嬲。」

我:「我仲嬲呀!」

IT阿頭:「其實你都好慘嘅,得啦,做得你阿頭,我會保住你㗎喇!」

我:「你終於覺得我慘喇咩?」

IT阿頭:「男人最痛,梗係慘啦,你使唔使睇下醫生呀?我識得人做泌尿科喎!」

我:「泌咩尿科?」

IT阿頭:「你唔得吖嘛!」

我:「有冇搞錯呀?Amanda連你都講呀?」

IT阿頭:「原來係Amanda!我聽Marketing阿姐講咋,出面其他女同事仲傳你食偉哥,唔好啦,你咁後生,做泌尿科嗰個係我妹夫嚟㗎,介紹你去睇啦!」

我:「得喇,阿頭你唔使保住我,我想辭職,請問即日走係咪要賠一個月人工?」

IT阿頭:「唔使咁激動喎,冷靜啲先!」

我:「決定咗喇,我要辭職,我而家落街撳錢,麻煩你幫我搞離職手續吖,快!唔該你!」

終於明白「人言可畏」係咩感受,如果係真都唔緊要吖,而家所有嘢根本唔係事實之全部,原來67:3唔係咁爽㗎咋,之前仲話唔介意呢度食呢度屙,而家先知道發明呢句說話嘅人係用心良苦,明明自己冇做過,但又有口難言,尷尬到想搵窿捐,仲要跌一個月人工出嚟賠錢提早走。

我落街撳完cash上嚟,IT阿頭就同我講:「好唔捨得你,幫你爭取到唔使賠一個月人工。」

我:「堅定流呀?」以為係全日唯一喜訊,上天都對我不薄。

IT阿頭:「老細話你咁後生就陽痿好慘,佢叫你留返啲錢,早日求醫,其實老細份人幾有人情味㗎!」

我:「請問……係咪你同老細講我陽痿?」

IT阿頭:「原來佢一早聽同事講過,只係唔好意思問我,頭先求證咗喇。」

仆你個街!我頭也不回就離開公司,而家只有一個小小嘅希望,就係將來喺街唔好撞返呢67:3嘅任何一位同事,更正,應該係67:2,因為我走咗喇,我唔想諗返起自己曾經「被陽痿」! (完)

error: