因為近兩年疫情嘅關係，好多同事都儲埋咗好多大假未放，老細又好好人畀大家累積，所以嚟到年尾嘅時候，一個二個都開始清假喇，我自己喺12月去咗轉日本，估唔到時間啱啱好，原來一直暗戀嘅女同事Amanda都係早排先放完。
Amanda放完假關我咩事？梗係關啦，其實聖誕節嗰陣公司已經勁少人，得返5個同事返工，呢期跨年仲癲，人人放晒假，office得返我同Amanda兩個人咋，可以同女神單獨共處喎，我嘅興奮程度簡直非筆墨所能形容。
不如形容下我女神嘅款頭先吖，有個AV女優叫汐世，又或者有人叫做有栖花，雖然佢上圍冇汐世咁誇張，但係個樣的確有8成似，只不過Amanda係長頭髮，而我一直覺得汐世又好，Amanda又好，都有少少江希文feel。
我當然唔敢同Amanda講佢似汐世啦，雖然啲女仔肯定認為每個男人都睇AV，不過呢啲嘢寧畀人知莫畀人見，我都要keep住個好仔形象㗎嘛，話晒而家都係孤男寡女共處一室，點可以咁快就嚇親佢呢！
老細唔知去咗邊度玩，1月中先至會再返office，我同Amanda嘅上司都放假，下個星期尾先返，其他同事都係差唔多，我掌握咗最實時嘅消息，原來最快返工嘅幾位同事都會喺下星期初先陸續見人，換言之由1 月3至1月6號都係得我同Amanda兩個喺公司，Wow!
今日Amanda都好百厭㗎喇，竟然帶埋屋企兩隻狗仔返office，佢話問准咗上司喎！話之佢啦，有兩隻狗仔喺度，我同佢嘅話題就更多，大家嘅距離亦都更close，因為我可以扮晒玩狗狗吖嘛，咁就輕鬆破冰。
其實我同Amanda嘅位係有少少遠，多得兩隻狗我先可以搵到藉口。
我：「好得意呀佢哋，抱住佢做嘢得唔得呀？」
Amanda：「梗係得啦，多多好鍾意人抱㗎，超鍾意趴喺人大髀。」
我：「咁我拎埋部電腦過嚟先，等你可以睇住佢放心啲吖嘛！」
好感恩公司全部係notebook，我拎埋部腦一搬就搬咗去Amanda隔籬個位坐，我覺得所有嘢都好似整定咁，真係天時地利人和，呢啲親近女神嘅機會有今生冇來世，不過得返3日可以咁咋！
今日我仲同Amanda一齊出去食lunch，之前公司太多人，佢又有幾個女仔做固定飯腳，所以單獨食飯都係第一次，而且我更得悉一樣天大喜訊，就係Amanda半年前同拍拖兩年嘅男朋友分咗手，佢早排清假旅行都係同家姐去，Oh my god!上帝好似開埋度門畀我。
Amanda：「突然好想食章魚小丸子，公司附近好似冇。」
我：「咦！我阿媽買咗部整小丸子嗰啲機，都冇乜點用過，不如我聽日拎返公司整吖！」
Amanda：「真係得咩！會唔會有煙搞到個消防系統噴水㗎？」
噴水？係噴水就好呀！其實我老母根本冇買啲咩章魚小丸子機，我諗住一陣放工嗱嗱聲去買部返嚟，雖然好無聊淨係玩一次（唔知佢之後幾日仲想唔想食），不過可以同我女神翻版汐世一齊整小丸子，特登去買都值回票價啦，成件事幾浪漫呀！
今日Amanda話同前男友分手係因為對方冇上進心，痴線！我份人咩都冇，就係最有上進心，為咗升呢日日打機打到三更半夜。
我：「男人一定要有上進心，咁先畀到女人安全感。」講完我都想嘔。
Amanda：「你都覺得呀？但係佢講極都唔明，佢有你咁成熟就好喇。」
Amanda嗰兩隻狗一隻叫多多，一隻叫豆豆，我唔知佢究竟點樣分，兩隻根本一樣色一樣樣，今日由朝早玩到晏晝，我都仲未分得清邊隻打邊隻。
我：「多多，過嚟吖！」我嘗試呼喚隻狗扮到好有愛心。
Amanda：「佢係豆豆呀！」
我：「唔好意思，佢哋好似樣。」
Amanda：「邊似呀？」
點樣唔似呀，啲毛同埋啲色都好似兩塊大雞扒咁喎！是但啦！其實呢兩隻狗真係好乖，今日算係好配合，聽日買啲狗狗食物獎勵下佢哋先。
入返正題先，下星期班仆街同事就陸續返工，連我個乞人憎上司都會返嚟，雖然今日先啱啱開始同「翻版汐世」二人世界，但我已經覺得所有嘢倒數緊我得返幾日時間咋，除咗玩章魚小丸子之外仲有咩好做呀？
其實公司呢段時間真係好得閒，因為落order叫同事做嘢啲高層全部唔喺度，不過全日同Amanda傾計都好容易出現悶場，好在有兩隻狗仔，我會盡快搞清楚邊隻係多多，邊隻係豆豆，食粥食飯睇呢鋪喇，我相信講多啲同狗仔有關嘅話題會幫到手，你同你班讀者有冇咩提議呀？點樣可以喺短短幾日間迅速增進感情呀？我好唔好買啲嘢當新年禮物送畀佢呢？點部署好？麻煩大家幫幫手諗下啦！無言感激！