我係2022年11月頭辭職，換言之暫時失業咗一個月左右，本來想搵你呻下同埋祝福我新一年盡快搵到新工，不過諗諗下都係忍唔住要分享resign嘅原因，因為男朋友覺得我為咗咁而唔做好無聊同埋好無謂，我自己當然唔係咁睇啦！
我辭職係因為見到另一個男同事Jeremy嘅遭遇，當日老細行出房話有事搵Jeremy，有人話畀老細聽，Jeremy老婆預產期係呢幾日，所以一早拎咗假，要下星期先返，老細聽完之後講咗句：「有冇搞錯！」跟住就叫我哋用公司電話打畀Jeremy。
有同事照做，打通咗電話之後遞畀老細，老細劈頭就問：「你喺邊？」我聽唔到另一邊廂嘅Jeremy答乜，淨係聽到老細接住再講：「生仔？你老婆生又唔係你生，你請假幫到件事咩？」然後又靜咗落嚟，相信係Jeremy講緊嘢。
幾秒鐘之後，又輪到老細繼續講：「喂，唔好講咁多，個客好急想要呀，快啲返嚟啦趕住呀！你搞掂晒啲嘢咪再去醫院囉，呢度頂盡搞兩三個鐘，會唔會咁橋就係呢兩三個鐘出世呀？就算係都冇影響啦，唔通一出世見唔到你就唔當你係爸爸咩！」
雖然我同Jeremy唔算熟，更加唔係咩抱打不平，不過我就係因為聽到老細咁講嘢而覺得心淡，覺得繼續留喺度幫呢種人做嘢好冇意義，所以考慮咗兩日就決定辭職。
其實老細把口咁賤已經有前科，佢心地差亦都唔係第一日先知，較早前都有另一個女同事請假，因為佢排政府醫院割朱古力瘤，人哋排咗差唔多一年半咁長嘅時間，然後提早3個月同公司攞定假，呢個衰老細竟然臨尾想人哋取消假期，你知唔知政府醫院排呢啲手術要等好耐㗎？唔係私家醫院呀！
嗰次個女同事又係嬲到震，佢仲同我哋猛咁呻，話老細私下打電話畀佢，同佢講朱古力瘤好小事，唔需要趕住做手術，公事要緊喎！個女同事就話唔會取消個booking，再強調3個月前就提早請假，當時老細係答應咗，咁都可以反悔。
老細同佢講，3個月前同3個月後有好多變化，3個月前因為覺得公司嗰排唔係咁忙，所以先至會批假，3個月後覺得有幾個project好趕，而家唔希望佢喺公司打仗時行開……嘩！咁老細真係點擺龍門都得啦，出爾反爾喎！
同埋呢個老細嘅心地係超級差，上年年頭張敬軒有個演唱會咪延期嘅，咁我哋有個同事買咗飛冇得去，老細聽到大家討論嘅時候就丟低一句：「抵死！」
其實張敬軒又冇得罪佢，個同事去睇演唱會又冇影響佢，點解睇到個show取消或者延期要講句「抵死」呢？
雖然我而家已經冇喺呢間公司做，不過仲有同同事聯絡，聽聞有同事買咗機票1月去日本，咁ANA上星期就話取消咗啲成田機場降落嘅航班，總之就有同事受影響，聽佢哋講，老細又係講咗句「抵死」，請問呢種人係咩心態？真係睇人仆街最開心？
一直有同男朋友分享老細啲賤格嘢，冇諗過佢聽到我要辭職之後嘅反應係：「吓！咁無聊？老細唔畀嗰個男同事陪老婆生仔，其實都唔關你事㗎喎！個男同事都未辭職啦！你唔好咁矯情啦！年尾流流搞埋啲咁嘅嘢！」
我：「矯咩情啫？你唔覺得佢好衰咩？仲有個女同事生朱古力瘤單嘢呢？人哋排期排咗年幾呀，佢叫人唔好去做手術。」
男朋友：「咁都唔關你事吖，又唔係你去割朱古力瘤，對你有咩影響呀？可能老細去開私家醫院，完全冇諗過政府醫院要排期排咁耐呢，都唔同世界。」
反而屋企人仲明白我點諗，阿爸阿媽都有聽我講老細啲衰嘢，當我決定辭職嘅時候，屋企兩老係咁樣講……
阿媽：「呢啲咁嘅老細唔跟好過跟啦，女人生仔最想個老公喺度陪住，佢咁都唔體諒人，呢種人心地唔好呀！」
阿爸：「將來如果你有咩病痛要請假睇醫生，老細又係咁對你，到時真係搵鬼可憐，人愈大就愈多病痛㗎啦，下下請假都有說話聽，咁點搞呀？東家唔打咪打西家囉，全香港又唔係得一間公司。」
我：「你哋會唔會覺得唔關我事，係我自己睇唔過眼走去辭職好無聊？」
阿媽：「而家燒唔到你嗰疊啫，針唔桔到肉唔知痛，你阿爸講得啱呀，大吉利是第日到你要生仔同請病假呢？」
我：「不過老婆生仔仲要佢返公司嗰個男同事，仲有做手術都叫佢取消嗰個女同事，人哋都冇辭職喎，我都驚自己係一時火遮眼衝動。」
阿爸：「佢哋咁都冇辭職，係佢哋有問題，唔係你有問題，不過可能人哋又有家庭負擔啦，接受能力人人唔同嘅。」
年尾流流辭職，我就係要呢啲諒解同安慰，估唔到男朋友唔明白，屋企兩個老人家反而仲明白。