先旨聲明，我冇炒人，係調走咗條女去第二個department啫，見佢調組後做嘢辛苦咗，晚晚要OT，講真我係有少少愧疚嘅，不過每當諗起同呢條女共事嘅情景，我仍然無悔自己當日嘅決定，仲覺得好明智添！
呢位女下屬個名叫佳佳，做嘢ok啦，中規中矩，我對同事嘅要求唔係好高，我個部門做嘅嘢亦只係手板眼見功夫，所以佳佳嘅工作表現其實合格，但係佢有一個非常差嘅習慣，就係好鍾意講：「吓？」
你一定覺得我好痴線，人哋口頭禪鍾意講個「吓」字都睇唔過眼？唔係咁簡單㗎！
有次食lunch我同同事講：「夠鐘喇，蝦餃一人一粒，快啲食晒佢埋單。」正當我講完準備將粒蝦餃擺入個口嘅時候，佳佳就對住我講：「吓？」
咁我就重複講多次：「夠鐘，蝦餃一人一粒，食晒佢埋單。」
佳佳終於聽到再答我：「哦。」
因為粒蝦餃擺到入口再拎返出嚟講嘢，然後又再擺返落口，個節奏亂咗呀，然後就唔小心咬親條脷。
又有一次，你知平時返工可能同一時間做幾樣嘢㗎啦，我呢頭拎起個電話想打畀一個叫Ivan嘅客，同時吩咐佳佳埋嚟我個位拎返走一份簽咗名嘅文件，另一邊廂電話通咗嘅時候，佳佳又望住我：「吓？」
我唯有重複頭先叫佢拎返份文件嘅說話，一分心就嗌錯咗電話裡面個客做Calvin……
我喺pantry斟完杯水想食藥，佳佳咁啱入嚟，佢問我見唔見啲茶包喺邊，我答佢右手邊個櫃，然後就飲咗啖水準備吞藥，呢個時候佳佳又回應：「吓？」
為咗回應佢，我硬生生擺低粒藥，吞咗啖水先，再答多佢一次：「右手邊個櫃。」跟住我先至再飲水食藥。
你睇文字好似覺得好小事好無謂係咪？但係如果你代入我嘅角色同處境，每日同佳佳講20句嘢，而佢20句都聽唔到要反問你「吓？」跟住你再將20句說話重複講多次，係每日都咁樣，你就會明白我係咩心情。
畢竟現代人好多時已經係multitasking，特別係職場上，你一路講嘢一路會做緊其他嘢，如果下下要放低手頭上嘅事去重複敘述，點形容呢……真係好忟憎㗎！唔係一次兩次喎，係一日最少20次或以上，係每一句喎！
頭幾個月其實容忍到，因為我身邊有個friend都差唔多，不過我朋友係耳水不平衡，所以間中有耳鳴 ，而且聽覺會減弱，最初我以為佳佳都有相類似嘅問題，咁我冇理由問個下屬係咪隻耳有事或者耳水不平衡㗎嘛，所以就默默忍受，每句說話都重複去遷就佢囉！
直至有一次我同佳佳講：「你件褸跌咗落地。」因為我喺後面見到佢披喺張凳件外套跌咗。
佳佳回我：「吓？」
嗰朝我已經同佳佳重複過好多說話，我攰喇，反正件褸唔係我嘅，由鳩你啦，你聽唔到就唔好執喇，點知佢「吓」完隔咗幾秒，竟然識得複述：「我件褸跌咗落地？邊度呀？」仆街吖，原來佢係聽到㗎喎！
佳佳當時望向左手邊地下，佢隔籬位個同事就好心指一指再提佢：「另一邊個地下呀。」
佳佳對住個同事講：「吓？」
我見個同事死死地氣再講一次：「另一邊個地下，你右邊。」
先唔講「吓吓吓」，你老味撻地有幾L大呀，唔係左就右㗎啦，「吓」乜鳩呀？
跟住我就分幾日做咗一連串實驗～～～
我：「佳佳，你入返system加個日期先吖！」
佳佳：「吓？」
我特登唔出聲，唔重複。
隔咗幾秒，佳佳自己答：「入返system加返個日期，ok！」
另一次～～～
我：「佳佳，你幫我打畀Peter，同佢講今日個會改3點鐘。」
佳佳：「吓？」
我特登唔出聲，唔重複。
隔咗幾秒，佳佳自己答：「打畀Peter改3點鐘。」
係呀！原來佢聽到㗎！佢一直都聽到㗎！
重重複複講嘢真係好攰，而且發現佳佳有呢個問題嘅唔止我一個，仲有其他同事，佢哋都一齊做咗呢個實驗，大家終於發現佳佳原來一直都聽到，不過好鍾意係唔係都「吓？」我哋成班人幾個月以嚟就係咁樣重複又重複向佢講同一句說話，仲諗住佢係聽力有問題。
咁啱呢個時候另一條team話唔夠人，但老細唔想再開新嘅headcount，佢哋知我嗰組相對上冇咁忙，可以喺度抽調人手，咁我就順勢「推薦」佳佳。
我：「佳佳，內部調組，人工都會加返㗎，你聽日過去Vivian嗰邊幫手吖！」
佳佳：「吓？」
我都費L事睬佢……
隔咗5秒，佳佳自己講：「內部調組？聽日去Vivian條team幫手？」
係呀，執嘢搬過去啦，我嘅容忍力真係好高，因為佳佳過咗去短短3日，Vivian已經走嚟問我佳佳嘅聽力係咪有問題，發覺每句說話都要重複講兩次或以上，喂，包容下啦，我呢條team都默默忍受咗幾個月，你唔係3日就打算退貨呀？
其實佳佳一直都聽得好清楚，只係佢個腦可能轉得比較慢，咩都「吓」咗先應該係想幫自己爭取多少少時間去思考，嗱！個腦轉得慢唔係罪，冇人想嘅，但你句句都「吓」，同你講20句嘢20句都要重複，咁就真係好擾民，呢個未必稱得上係缺點，不過肯定係壞習慣。
而家佳佳嗰組晚晚要OT，有次我放工準備搭電梯，佳佳咁啱去完廁所經過電梯口，我向住佳佳講：「喂，走先喇，bye bye！」
電梯門已經閂緊，佳佳望住我講：「吓？」
以前我會撳返開電梯門同佢重複一次「走先喇byebye！」而家唔會喇，我會由得度電梯門合埋，講句byebye你都要爭取多幾秒思考？咁你慢慢「吓」啦！