投稿讀者：阿蝦
我最近終於轉到工喇，如果唔係疫情影響，我應該早幾個月已經走咗。
我老細係個不折不扣嘅賤人，入咗呢間公司3年，第一年人工加$250，第二年加$200，第三年凍薪。佢仲好鍾意臨放工先叫人開會或者做嘢，擺明有心令你OT，試過有同事6:10走（公司收6點），人哋已經做晒啲嘢，佢都唔抵得下屬準時放工，其實已經唔係準時，係做多咗10分鐘。
好，你當全香港大部分老細都想同事留耐啲，但我呢個老細直情連下屬準時返工都睇唔過眼，有次我同另一位同事搭同一部lift，咁啱搭正9點入到公司門口，唔知老細係特登「捕」我哋還是佢真係同receptionist傾緊計，總之一見我同同事入門口就話：「話返9點你哋真係返9點㗎？係咪下下要同公司計得咁足呀？唔識得早少少返嚟準備㗎咩？開電腦都要時間啦！」
佢雖然係老細，但我哋成班同事私下講佢係唔會用「老細」作稱呼，有人叫佢「垃圾」，有人叫佢「光頭柒」，有人叫佢「賤人」，我份人粗魯啲，唔直接打粗口字出嚟喇，個音係「咸蝦燦」，你估到啦！
自從9點返工冇遲到都要畀佢話之後，我憎佢嘅程度再進一步提升，唔止私下叫佢「咸蝦燦」，我連phone book都入佢個名叫「咸蝦燦」，不過有一次嬲得滯，條「咸蝦燦」明明話A公司個價傾唔啱，唔使send invoice過去，仲要係WhatsApp大group講，人人都見到，咁我當然冇send啦，隔咗一個星期，「咸蝦燦」竟然又喺WhatsApp大group亂吠，send咗句msg出嚟質問我點解仲唔send invoice畀A公司？係咪唔想做生意？當日係星期日，我同女友行緊街，躁得滯直接搵返佢上次叫我唔使send invoice嗰個msg，就咁cap圖畀佢睇。
火遮眼就自然會衝動，但我同女友一齊仲要係假期，真係唔想被打擾，索性咩都唔理陪女友先，期間已經feel到電話喺褲袋狂震，不過唔想影響心情所以冇拎出嚟睇，直至行完街搵間餐廳坐定定食飯，個電話仲震緊，原來係同事打畀我：「喂，做咩唔聽電話呀？你入老細個名做『咸蝦燦』，咁樣cap圖佢咪見到囉，係咪傻咗呀！」
我當時都大驚，今次死得，即刻去WhatsApp度del幅cap圖，其實我見到好多同事不斷喺WhatsApp大group留言，後來佢哋話係想幫我推個msg上去，希望老細睇唔到，但係當我想del cap圖時，幅圖其實已經係雙剔，仲要係雙藍剔，咁即係代表咩？即係老細已經收到兼睇埋，WhatsApp大group全部同事都係……
仲有個同事話我聽：「你入咗Hazel個名做『世紀大八婆』？你究竟有幾憎佢？Hazel得5個英文字咁簡單你唔入，要入5個中文字先發洩到心頭之憤，你真係勇士，講出咗我哋心聲，不過之後喺公司自己睇路。」
呢件事喺今年5月發生，你會唔會想像到我後來幾個月是多麼的老尷？
老細知佢喺我心目中同埋phone book都係叫「咸蝦燦」，不過佢冇特別捉我嚟講，亦冇提返件事，只係好少再吩咐我做嘢，每次見到佢嘅時候都好尷尬，有一次仲要同lift，真係好驚佢問我點解set佢個名做「咸蝦燦」，你要知道我係投稿先叫佢「咸蝦燦」，真實嗰3隻字係「X家X」。
當然，我同另外嗰位『世紀大八婆』嘅關係亦陷入冰點。
過往每個同事辭職，老細都會挽留，因為真係好難搵到傻仔做，第一年人工加$250之後，其實我都辭過職，佢捉我入房話好心痛，叫我唔好向錢看，講好多似是而非嘅人生哲理。不過，今次我辭職佢冇挽留，好事嚟嘅，咁樣更加唔使煩，只係「咸蝦燦」事件令我成為呢間公司嘅經典，相信會永留呢間公司嘅史冊。