讀者投稿：Mona
是咁的，舖頭今日做買一送一，然後有個阿叔同我講：
「你半價咪得囉！」
我：「買嚟請朋友飲吖！」
「Diu你啦！咁樣同半價有咩分別啫！」
我：「唔好意思呀先生，舖頭嘅promotion嚟㗎，會唔會考慮拎走？另一杯可以畀屋企人飲。」
「Diu你搞咁L多嘢，半價賣畀我咪得囉！我一個人飲唔晒吖嘛！」
買一送一同埋半價有分別㗎阿叔！你真係唔識㗎喎！更何況你覺得唔抵，其實可以唔買，作為店員，我都係跟老闆order做嘢啫，唔使Diu呀？
投稿其實去到呢個位已經完咗，以下係小弟聶瞳嘅補充，個人嚟講每次去超市見到大大支嘅消毒劑、洗頭水、shower gel，甚至係蒸餾水等等product做買一送一，我都會好似呢個阿叔咁諗，因為拎返屋企好重吖嘛，直接半價咪好囉，買一支又唔抵，但我唔會走去Diu店員咁癲，何況心底裡絕對明白買一送一（通常超市會叫買兩件半價）同埋直接半價係有分別。
首先係品牌形象同埋管理問題，長期半價好影響brand image，之後回復返正價，好多人就會認為你個brand或者件product唔值呢個價，更何況平時幫襯開你嘅客會覺得以前做咗傻仔；相反地，平時幫襯開，突然嘆到買一送一，感覺係呢個moment賺咗，某程度上嚟講係玩緊心理戰，繼續令佢認同你品牌嘅定位同價錢，避免brand image有種愈做愈cheap嘅感覺。
簡單而言，以前做咗傻仔，同埋而家去買好抵，係兩種完全唔同嘅體驗。
其次係如果直接半價，你嘅收入就會減一半，除非客人突然多咗一倍或以上，否則你辛辛苦苦諗住半價益街坊，最後只會令生意額黯淡無光。
第三點比較重要，係一種宣傳概念，用咖啡做例子，阿A飲開Starbucks或者Pacific，但佢個friend阿B因為買一送一嘅緣故，請埋阿A飲你嘅咖啡，所以買一送一其實係幫手推介你嘅product畀更多人去試，等於做緊廣告。
其實最好嘅sales唔係任何店舖嘅top sales，亦唔係搵明星代言，而係我哋身邊嘅朋友。
另外，有啲product係有時限性，或者會過期，買一送一可以盡快清走存貨，套現資金去購入更多同埋更新嘅貨品，仲可以騰空儲存空間。
阿叔之所以講：「Diu你搞咁L多嘢，半價賣畀我咪得囉！」係因為對阿叔嚟講，你間舖同埋你件貨都唔關佢事，話之你聽日執笠啦，佢而家淨係想要一杯半價飲品。正如我去食飯聽過隔離枱講：「炒菜心要幾廿蚊？我去街市買十幾蚊斤咋！」
咁人哋打開門口做生意，燈油火蠟人工舖租唔使成本咩？老闆為興趣開舖，侍應全部做義工好唔好？