公司多女人就自然多是非呢個講法，原則上係冇錯嘅，不過男人係咪一定冇是非同埋唔講八卦嘢呢？咁我就有啲保留喇。
小弟而家做緊嗰條sales team就係全男班，連埋我自己在內，一共有6個男人，最初入嚟以為冇死啦，可以盡情講粗口同埋講鹹濕嘢，點知佢哋仲八婆過我以前公司啲女同事，其中有個男同事更加係經典，佢對住每個人都會做一件事，就係伸隻手去你頸後，揭起睇你件衫領個牌子tag，見到係名牌就會問你真定假，全公司嘅男同事都畀佢揭過🤦🏻♂️
佢非常之注重名牌，自己都係周身名牌，男人老狗LV斜孭袋，唔知咩牌子尖頭皮鞋，長期喺公司討論其他同事啲衫褲鞋襪袋值幾多錢，好L煩，買咗貴嘢返嚟又要炫耀。
同組其餘幾個男人又不斷講是非，無論你係男女同事都好，佢哋都好鍾意問人哋拎相嚟睇，又追問對方另一半係做咩工作，親戚都唔會問得咁詳細啦！仲要成日估邊啲同事有路，男仔之家都會細聲講大聲笑。
呢班友對錢銀非常計較，新年收到利是會即刻衝去廁所拆，如果個銀碼唔啱心水，仲會喺背後係咁講對方壞話，話人度縮。佢哋仲有個嗜好，就係好鍾意對公司上下嘅衣着髮型評頭品足，又會幾個圍埋開同事facebook睇，研究人哋以前啲相，click人哋個friend list搵吓有咩女，又會check人哋like咗咩page，行為完全唔似有賓周。
最慘仲要好小器，有次我話楊千嬅唱歌唔好聽，原來department 當中有個男仔鍾意楊千嬅，然後佢嬲咗我半年，鬼知你鍾意楊千嬅咩，何況我都係表達自己嘅睇法同意見啫，又唔係惡意，唔使嬲我半年啩！
不過佢哋之間都好鍾意你嬲我，我嬲你，有時呢個話嗰個搶咗佢張單，有時又呢個話嗰個今日Gel頭可能係見客順便搵契媽，我夾喺中間好難做，唔聽又嬲埋我，見我同呢個friend，嗰個又嬲我，成班男人嚟㗎喎，咩事呀？我同女人相處嘅時候都冇咁麻煩。
老老實實，我做咗成年，未見過同team呢幾個男人換水，佢哋拎住個杯去pantry，見到水機冇水係會調頭走，寧願晏啲先再斟過，唔好咁啦！使唔使咁計較，唔係一定要男人換水，但你經過見到咪幫幫手囉！
佢哋仲好鍾意認屎認屁，老細有次問其中一個做咩lunch唔出去食飯，嗰位男同事當威水史講足大半年，話老細有留意佢，關心佢，痴孖根！路過見到你問一句啫，可能老細心諗呢條柒頭做咩搏升呢？你唔係當老細寵幸你呀？有咩咁威呀？
其中一條八公話同層另一間公司有個男仔成日睥佢，好想打實人哋喎，首先佢自己咁嘅款頭，如果我唔係佢同事，我都會睥佢啦，何況你次次都同我哋講要打實人有咩用呢？係你就打啦，過咗成年都係得個講字。
其餘卸膊邀功嗰啲嘢都廢事講，因為日日發生，我希望盡快搵到份新工轉啦，真心唔鍾意同佢哋共事，當然八婆堆我都唔鍾意，不過有時對方係女人，自己容忍程度仲高啲，而家成班男人好似八婆咁樣仲惡頂，講句嘢都怕得罪佢哋。
八唔八其實睇性格，唔係睇性別，如果你覺得女人堆先至多是非，咁可能係你未遇過一啲好八婆好小器嘅男人，仲惡頂呀！
投稿讀者：阿草
===
Office不嬲都係是非地，之前都講過啦，派利是一樣會招來閒言閒語，你話幾煩吖🤦🏻♂️
《派得少 畀人藐；派得多 扮大哥》
https://hkofficedaily.com/?p=15413