我公司嘅「利是文化」真係好差，阿頭鍾意威，係都要拉大隊走去其他部門講恭喜發財，坦白講，大人大姐三十幾歲好鬼肉酸，唔去又話你唔合群，跟住去又成個裙腳仔咁。
以前未結婚，我個角色係收利是，見盡office百態，好多同事收完即拆，拆完仲要即刻講是非：「頂！Ada派20蚊咁cheap，第日唔幫佢做嘢！」、「Morgan派10蚊喎，屌，不如唔好派啦！」、「Jacob派一封嘅喂？唔係結咗婚一定要打孖咩？咪咁孤寒啦！」
See！公司永遠有班冇口德嘅人。
仲有一次，我親眼睇住隔籬department有個男同事走埋嚟，向另一位已婚同事講：「喂，你未派利是畀我個女喎！」
嘩，唔使咁肉酸呀！派唔派係隨心㗎啫！雖然我唔知佢兩個私下係咪好熟好玩得，但如果我有仔女，一定唔會主動叫同事畀埋小朋友咁肉酸囉！
2019年我結婚，所以上年係我第一次派利是，「汲取」之前嘅經驗，唔熟嘅同事一律20，work得比較close，仲有自己department嗰班就全部50，合理啦係咪？但係點估到仲會有人唔高興。
同事覆述返畀我聽，阿頭好唔滿意我派50，原因係佢都派50……
「咁都要介意？」
同事：「佢話你扮大佬呀！佢一人派一封50，你一人派兩封50，即係100，佢係阿頭，竟然派得少過你，覺得你落佢面，又話下年如果學你派兩封50，包利是成本大咗好多喎！」
痴孖根！呢啲嘢都要計較？所以大家唔好以為女人先會斤斤計較，有時男人小器同埋小心眼起上嚟，真係同八婆冇分別。
派得少，背後會畀人藐；派得多，阿頭話我扮大哥。派利是啫，最緊要開開心心，10蚊又嫌cheap，20蚊又嫌少，一封又話孤寒，兩封又話人功高蓋主，我呢間office嘅「利是文化」真係好L麻煩。
我決定今年銀碼不變，不過就由派兩封變成派一封，預咗實畀人話縮水，但我唔care，派錢出去唔通仲要介意人哋點講咩，只係希望啲是非唔好傳返嚟我耳邊就得喇。
投稿讀者：Vincent