雖然呢份工我只係做咗一日，但相信你嘅讀者入面冇人做過，亦冇人願意做，因為我喺旺角嘅馬檻做Keeper……
件事超過10年前喇，嗰陣我都係得二十幾歲仔，間馬檻喺砵蘭街，而家已經唔存在。當時做呢份工得一個原因，就係窮，自己F.5畢業，做開普通文職，失業手停口停，咩都做住先啦！
或者你會覺得要「做住先」有大把選擇啦，使乜去色情場所返工呀？我都知，但係呢份工基本上唔使見吖嘛，喺報紙細細格嗰啲分類小廣告搵到，打個電話去，對方就叫我去馬檻見下，講兩句已經嗌我第二晚返工，form都唔使填，最重要係即日現金出糧，咪當一路返工一路睇女囉！
工作好簡單，喺嗰間馬檻我得一個同事（佢哋背後當然有江湖大佬但唔會上嚟），到而家仲記得同事個樣，係一個好似麻原彰晃咁嘅男人，不修邊幅，長長哋頭髮，少少肥，成面鬚。佢份人冇乜嘢，都幾好相與，冇客嘅時候就同佢傾偈，有客嘅時候就帶人入房，啲小姐並唔會逗留喺馬檻，當有客人上嚟，麻原彰晃就會負責call女。
呢份工對我嚟講最大嘅心理壓力係執房，雖然都係求其執，不過嫖客同小姐大戰過後，要執佢哋啲毛巾同埋鋪返張床，感覺上真係好污糟（實際上都係），我都驚會惹到啲唔知咩病，呢一part最難頂，但我主要工作就真係得呢一part。作為第一日返工嘅新人，麻原彰晃連錢都唔會比我掂，嫖客完事後直接行出廳畀錢佢，再由佢去找錢。
其實上嚟嘅小姐來來去去都係嗰十零個，一晚來回見咁多次已經個個認得晒，我唔知係呢間馬檻嘅特色定係點樣，總之全部小姐都係北姑，當然撈味好重，但有個別一兩個其實個樣同埋舉止都好純品同埋斯文，真係唔知點解佢哋要落嚟香港做呢份工，可能背後欠人錢啩。
我最初冇諗過有咁多人會叫雞，唔係睇小香港啲雞蟲，而係砵蘭街同新填地街呢一頭咁多馬檻，嗰個年代又好興桑拿，仲未計嗰啲細細間嘅樓上夜總會，幾多雞蟲都飽和啦！但真係估佢唔到，大約夜晚九點之後直至凌晨，基本上我係做到冇停手，更加會出現冇房嘅情況，嫖客要坐喺個廳啲櫈仔度等，最誇張有四五個坐喺度等緊，然後仲有人上嚟，連坐都冇位畀佢哋坐。
大家係咪以為嫖客一定係老粗或者地盤佬嗰啲款頭？我最初都以為係，但原來大把後生仔，西裝友亦唔少。
可能係10年前嘅緣故，我記得嗰度嘅收費大約係四百幾蚊做一次，小姐做完出返嚟就會出現金，不過麻原彰晃每一個只係畀返二百蚊佢哋，換言之呢度會抽一半肉金咁上下，當時我都呆一呆，仲問咗麻原彰晃一句：「下，原來啲小姐分得咁少。」
麻原彰晃答我：「唔係我哋袋晒㗎，仲要分畀馬伕呢！」
雖然要抽佣係合理，但喺房入面「做嘢」嘅係小姐，放下尊嚴服務完嫖客，到頭來得二百蚊袋走，感覺始終好奇怪。
做得一日咁大把，我嘅所見所聞係咁多喇，返得一日工時間好短，不過呢份工嘅經歷真係一生難忘。
其實我本身唔係諗住做一日，但係太難忍受要執嫖客同小姐用過嘅毛巾同埋被鋪，雖然見工嗰陣麻原彰晃已經提過，我係有心理準備，不過落到場要親手接觸又係另一回事。
做咗一日就決定唔做嘅最大原因都唔係呢樣，而係Keeper本身嘅職責，呢個位其實係包咗一樣嘢，就係當警察上嚟掃黃，我係要自動獻身畀人拉，因為我嘅身份就係呢個馬檻嘅負責人，再直接啲講，佢哋原意就係請替死鬼，所以點解啲馬檻成日畀人掃仍然keep住長開，就係交咗個人比差佬拉，第二日又請返另一個keeper繼續營業。
麻原彰晃同我講過，如果畀警察拉咗，老細會有封利是，但係見工嗰陣佢冇講過呢封利是幾多錢，所以當晚接近放工嘅時候我直接問佢，麻原彰晃始終唔肯講實數，淨係話：「大約幾千蚊啦！」
畀差佬拉都係得幾千蚊利是，仲要晚晚返工提心吊膽，所以我第二晚就冇返工喇，好在係現金即日出糧，我到而家都好記得嗰晚嘅人工係…… $500
😂😂😂人窮志短，應該就係咁解。
我而家份工好穩定，做文職，呢個經驗就藉住篇投稿記錄低。
投稿讀者：一日Keeper體驗遊
===
忽然好掛住婉儀，當日佢分享自己做時鐘酒店嘅故事，唔知你有冇睇過呢？曾經有出版社叫我幫手勸婉儀出書，但佢想低調，所以就拒絕咗。
婉儀投稿
《第一回》女仔唔好亂飲醉
http://hkofficedaily.com/?p=4208
《第二回》花美男
http://hkofficedaily.com/?p=4218
《第三回》幸福要靠自己爭取
http://hkofficedaily.com/?p=4222
《第四回》睇人唔好睇表面
http://hkofficedaily.com/?p=4231
《第五回》菲菲 1
http://hkofficedaily.com/?p=4240
《第六回》菲菲 2
http://hkofficedaily.com/?p=4199