投稿讀者：Kyle
我個前老闆係一位慈祥嘅老人家，十分關心員工，照顧舊人之餘，亦肯畀機會新人，舉個例，公司一星期會開兩次會，一次係每個部門自己嘅小規模會議，另一次就係有老闆列席嘅大會，同事們開大會嘅氣氛係好好多，亦都更加敢表達意見，因為老闆好open，好愛才。
同事結婚或者有小朋友出世，老闆唔止會畀封大利是，仲會加人工，雖然佢已經好低調，不過受過恩惠嘅同事都忍唔住爆響口，初心始終係想多謝老闆，等多啲人知道呢間公司有人情味。
後來老闆個仔入咗嚟公司做，天下從此大亂，呢位太子爺同佢爸爸嘅性格簡直係兩個極端，佢當時掛名「入嚟公司學嘢」，不過態度勁差，目中無人，而且鍾意逞強同埋非常衝動。
太子爺從來唔會同人打招呼，兜口兜面同佢點頭，佢可以完全無視你。同事叮完飯盒，office梗有少少味，唔係誇張嘅咖哩或者冬菇嗰啲，真係好普通好普通嘅食物味，佢咁都可以鬧同事整臭間office，有人親耳聽到佢講咗句：「出去食啦，叮叮叮，成陣味，冇錢出街食咩！」
堂堂一個大男人，茶水間要換水竟然點個50幾歲嘅清潔姐姐做，當時就連另一位想斟水嘅Admin都睇唔過眼，話女人仔唔夠力（舊式水機要托起倒插嗰隻），叫佢幫幫手換，太子爺即刻大發雷霆：「我出糧畀你哋㗎喎，我換？你冇嘢呀？」
仲有一次明明係佢睇錯單，但就鬧返個客轉頭，最後要公司一位老臣子出手先可以擺平，差啲冇咗個大客同埋一張大單，老臣子話咗太子爺幾句，你叫佢換水都嬲啦，點會接受你教訓呀？結果太子爺當場就要炒個老臣子，嗰陣時大老闆出咗差去英國，HR話要請示老闆先，唔可以話炒就炒，太子爺係癲到用粗口鬧個HR。最後HR同老臣子打長途去搵老闆講晒成件事，老闆話唔炒得，佢個仔好唔忿氣地罷休。
無奈公報私仇嘅場面最後都出現咗，因為老闆上年中風，成件事係好突然好突然，始終佢年紀真係唔細，老闆出事之後，太子爺就開始take over公司嘅權力，進行佢嘅「大清算」，當日郁唔到嗰位老臣子－－－即炒，冇聽佢支笛走去炒人嗰位HR－－－即時解僱，基本上太子爺唔順眼嘅人都炒晒，包括我，當然唔少得曾經叫佢換水嗰位Admin啦！至於換唔到水嗰個清潔姐姐因為身體唔舒服，老闆中風前已經冇做，我相信如果佢仲在職的話，結局都係畀人炒魷。
簡單啲講，呢間公司目前只係得返三類人，第一類係擦鞋仔，第二類係卸膊精，第三類就係家庭負擔好重，乜都唔敢出聲，死做爛做嗰班，而其實公司幾個開國功臣都已經畀太子爺迫走埋。
可能大家會諗：「抵死啦！公司遲早執笠！」不過真係冇咁易，老闆打落嘅江山有好多，投資收租嘅舖位同物業都唔少，坦白講太子爺就算搞死間公司，佢下半世都係打跛腳唔使憂，有時世界就係咁唔公平。
作為呢間公司嘅前員工，心情相當矛盾，始終老闆真係好好人，我哋都唔想睇到公司畀佢個仔敗晒，所以純粹投稿發洩下，但將來搵工如果有得揀，我盡量都唔想入一間家族生意嘅公司。