有個舊同事WhatsApp我：「Hihi，你知唔知『禤』字點讀？我有google過，得啲拼音，鬼知點拼咩！」
我：「點解要讀個咁深嘅字？」
「有個Candidate係呢個姓，我想打畀佢呀！」
我：「叫英文名囉，咩年代呀？冇留英文名咩？」
「真係冇喎，得中文呀頂，禤X強，點呀而家？我又覺得佢好適合喎，我呢隻司機job幾好pay㗎！」
我：「咁你打去叫X強囉！」
「咁親切？即係～～『喂，X強呀，我係headhunt嚟㗎』～～咁呀？如果一打去叫X強，使唔使問埋佢食咗飯未？」
呢單嘢令我諗起有個中學同學姓鄔，對比起姓禤，鄔應該普遍好多，但仍然唔係我哋所謂嘅「大姓」，有一次佢同阿爸嘈交，返到學校同我講：「我哋呢啲姓鄔嘅都係麻煩㗎喇，阿爸阿媽又離婚，屋企人感情又唔好。」
當時我問佢點解，鄔同學話：「你個姓都唔係大姓，你屋企和唔和諧吖？」
我諗一諗，又好似唔和諧喎，因為我父母都係離婚。
鄔同學嘅理論係，陳李張黃何呢啲姓氏之所以成為「大姓」，係因為屋企人比較和睦易相處，所以世世代代不斷發大咁繁殖落去，自然愈嚟愈多人姓陳李張黃何，當然都有例外，不過大數始終係多。然後佢用自己做例子，話屋企唔和睦，佢第日唔會想生仔，自己又冇哥哥細佬，將來世界就少一個人姓鄔。
我仲記得鄔同學嘅結論係：「總之陳李張黃何唔一定會家庭融洽，不過我哋呢啲細姓或者罕有姓氏嘅家庭就一定唔融洽啦！」
又好似有啲道理，又好似亂講一通，我到而家都證實唔到。
然後我舊同事打電話畀我：「喂，我頭先打咗去喇，叫佢X強囉咩呀！條友幾好傾喎，仲教我讀佢個姓。」
我：「咁爆？」
「係呀，喂好笑呀佢，X強話細個讀書嗰陣，好少畀老師叫佢答問題。」
我：「咁佢大個搵工都一樣好少人打畀佢啫，唔係辦法喎，有冇勸佢改返個英文名呀？」
「佢話佢有呀，叫Henry喎，原來畀我份CV未update，打漏咗。」
我：「咁你知唔知X強屋企和唔和諧呀？」
「鬼知咩，做咩咁問？」
我：「冇，問下啫。」
其實我想睇下鄔同學嘅理論準唔準啫。