有讀者同我分享，話自己喺公司冇辦法融入同事圈子，但係又唔可以怪人哋，因為同事有邀請佢一齊打「動森」，而佢根本連Switch都冇；Join過同事食lunch，全程聽人講是非，唔係要扮清高，只係唔想加把口牽涉在內，亦都冇八卦嘢拎出嚟交換情報，久而久之就冇一齊lunch，而家日日自己食；身邊同事都食煙，次次一大班人落去「呼吸」，有人唔食煙都照跟，因為煙break傾計都係一種交流，無奈佢真係好怕煙味，亦唔想好似嘍囉咁跟出跟入，所以經常出現成個department吉晒，得佢一個坐喺度做嘢嘅場面。
做咗大半年，感覺自己係一個外人，不過鍾意份工，唔想quit，呢位讀者問我有冇類似經驗分享，如果係我又會點做？
我個人認為，一個人食lunch，一個人獨守office，一個放工靜悄悄地走，其實冇咩大問題，朋友同埋同事都係人夾人，如果真係唔同channel，勉強融入都係浪費時間，行返自己鍾意嘅路，總會遇見志同道合嘅人。
聽過人講，喺office最好嘅狀態係同每一個人都唔係朋友，但係同每一個人都可以傾到兩句。
遇到好同事再成為好朋友係一種福氣，可遇不可求；同事只能傾兩句但未至於係朋友，其實亦係常態，可能麻煩仲少啲。