眼前呢位男士五官端正，有份收入唔錯又穩定嘅工作，上次分手係24歲嗰年，佢而家35歲，換言之11年冇拍拖。
我：「你嘅外型加埋你份工，好難相信單身超過10年喎。」
「我講真。」
我：「太忙？」
「主要真係工作忙，一來覺得錢好重要，想趁後生搵多啲錢，二來我份工之前經常要飛，係呢一兩年先冇飛得咁密。」
我：「介唔介意分享之前拍拖嘅事呀？有冇啲好難忘嘅經歷？」
「難忘？唔…其實我同佢係中學同學，由讀書拍到出嚟社會工作，記得當時佢特登準備咗個銀包，畀大家每個月擺錢落去，例如各自攞1000蚊出嚟，即係加埋有2000蚊，嗰個月出街就只可以洗呢2000蚊，如果月頭月中洗大咗，月尾就要睇餸食飯，點都唔可以用多，亦唔可以加錢落去，每個月係咁多就咁多，目的係想大家慳錢同儲錢。」
我：「真係好好喎。」
「係呀，有次同佢行過一間日本餐廳，大家睇住櫥窗嗰啲假嘅食物模型都可以流晒口水，然後我話入去食，佢死都唔入，話唔想食生冷嘢喎，其實我知佢想食，不過嫌貴，最後佢夾硬拉我走，當時我好唔開心，唔係嬲佢，我係嬲自己賺錢唔多，有種無力感，女朋友仲要氹返我轉頭。」
我：「佢清楚大家當時經濟狀況，佢唔捨得你洗錢。」
「係，我知道，不過後來我哋都分咗手。」
我：「因為錢？」
「唔係，係好多小事累積，你要我講一個原因真係講唔出，唔關錢事，唔關第三者事，係和平，又相當平靜地分開。」
我：「咁你係咪想搵個慳家型女朋友？」
「又唔使，啱傾就得㗎喇！頭先咁講只係諗返起，如果當時有錢啲，可能會開心啲啲啩，我都唔知呢！我淨係知佢嗰陣好想去日本旅行，啱啱出嚟做嘢邊有錢吖！我仲記得佢好想去某間食芝士火鍋嘅餐廳，而家嗰間嘢都執埋喇，好多嘢我未嚟得切買畀佢，好多地方我未嚟得切同佢去，大家已經分開咗喇，有時諗返起，會好想同佢講聲對唔住。」
我都年輕過，初初出嚟做嘢人工唔多，畀下家用，搭下車，食下飯，真係會冇晒錢淨。
好想追問佢同呢位女朋友嘅分手細節，不過都係忍住，因為我嘅工作係幫佢搵新女朋友，希望一切順利。