去咗個客位於新橋嘅office，呢個地方都幾特別，有好多食肆居酒屋，街道上擺滿枱好有大牌檔feel，放工後你會見到好多著晒西裝嘅上班族喺度食飯消遣，鄰近銀座，有唔少大公司嘅辦公室都喺度選址，包括Panasonic。
然後新橋又有一個商場係有得揼「邪骨」，裡面嘅按摩中心望落去都feel到唔簡單，喺日本forum就有人出post話曾經「勇闖龍潭」，原來特別服務索價最少10萬日圓，仲要冇得咩咩，只係做一啲「手作仔」。新橋同時係電視台街訪勝地，成日會有人喺度訪問打工仔，應該係貪上班族密集，搵人採訪都易啲。
我個客間公司都係好正式嘅企業，上到去真係發覺日本人做嘢好認真，逗留咗兩個幾鐘，你唔會聽到員工嘅私人電話發生聲響，我有時會懷疑日本人係咪長期較震機，始終搭電車又係唔會講電話同唔會聽到有人電話響。（所指嘅係大部分情況，我都見過日本人喺車廂講電話，應該係有急切公事唔講唔得。）
聽返呢度工作嘅人講，日本人喺office裡面接聽或者打私人電話，通常係例如地震呢啲災害發生後，因為屋企人會打嚟問候，佢哋亦會打畀親友慰問有冇事。至於喺office裡面上網睇工作以外嘅網站，情況更加係少之又少。當然，以上都係講緊大企業內部情況，實會有啲日本中小企或者比較細嘅公司唔係咁樣嘅。
我去呢間企業都發覺班員工偏向安靜，但如果係打入嚟嘅電話，佢哋係聽得好快，因為日本職場嘅宗旨係唔可以待慢客人，而且員工接聽電話時，就算對方根本睇唔到你個樣，佢哋一樣會面露微笑咁同你講電話，果然敬業。
同我見面嗰位社長好嚴肅，全程正經不苟言笑，唔係話傾計講笑，我係連社長嘅笑容都冇見過，睇得出班同事都小心翼翼。
開完會之後，嚴肅社長話想同我食晚飯，本身想推，你咁悶，一齊食飯邊好玩㗎，不過社長叫到都要畀下面，頂硬上啦！
由於我哋係即興，並冇特別book位，行到去新橋街頭就比一個年輕嘅女仔截住，原來係附近嘅居酒屋拉客，呢頭嘅食肆有唔少會派員工喺街頭拉客入座，仲要幾進取，過馬路都追住你，以為嚴肅社長睇唔上眼啦，點知佢問返我去居酒屋有冇問題，我有咩所謂，最好嗱嗱聲食完走啦！
我哋一行有4個人，坐咗喺新橋街頭食嘢，真係好有風味呀，會唔會委屈咗你呀社長，居酒屋旁邊仲有一個燈箱，寫住唔知咩學園，有晒時間同價錢，哦，原來係以著校服為主題嘅酒吧，入口位正正喺我哋食嘢嗰度隔籬棟大廈。
嚴肅社長冇叫我上去，但係呢個校服酒吧燈箱似乎引發佢諗起另一個問題。
社長：「香港睇AV真係唔使錢？就咁下載或者直接睇？」
真係估佢唔到，頭先喺公司開會明明仲好嚴肅正經，離開咗office落到嚟講呢啲？
我畀佢殺到措手不及：「香港睇AV唔使錢？唔知喎……我冇睇喎！」
社長：「咁你睇啲咩？」
我：「睇開Netflix同Discovery Channel……」點知社長係咪想試我人品呀！
社長：「以前公司都請過一個香港員工，佢同我講過香港睇AV唔使錢。」
我：「日本一定要買，同埋對於盜版有嚴格監管，所以唔同嘅。」
社長：「係，日本買一隻AV要二三千日圓，你仲可以去AV女優握手會，不過規定你要買幾隻AV先有得影相握手，佢哋都好識得做生意，但我買實體碟冇用，又怕畀老婆發現，都係上網買，不過上網買嚟睇都係要錢，好奇香港點解唔使買都可以上網睇。」
好在有個識日文嘅同事幫我翻譯。
我：「其實你之前個香港同事可能都想買，但係日本買AV有區碼，買咗之後第日拎返香港都未必播到，而且好似你哋上網買片同download片嘅網站，即係DMM嗰啲，如果你身在海外，都會有地區限制，總之離開日本就睇唔返。」
社長：「你都幾熟悉喎，又話冇睇嘅？」
負責翻譯嗰位等緊我點兜。
我：「哦，我純粹對於知識產權有研究啫。」
社長：「原來係咁，我明白了。」
有時都幾佩服日本人，佢哋真正做到Work Hard Play Hard，喺公司做嘢可以好嚴謹好嚴肅，私人電話唔聽，其他網站唔睇，客人打嚟用最快速度聽，仲要隔住個電話都keep住面帶微笑，然後一放工就會盡情享樂，去居酒屋飲返兩杯，或者沉迷於個人嘅小天地，啱嘅，返工咁大壓力，係要搵地方釋放。
好似呢位嚴肅社長咁樣，返工放工兩個樣，喺居酒屋未坐暖就問我AV，仲托我問下朋友邊個網站有得免費睇同埋下載，我真係唔熟呢啲嘢㗎，咪講咗睇開Discovery Channel囉！