我曾經都係新人，經歷過人工唔高，又要返中環捱貴飯嘅日子，嗰種著到身光頸靚其實褲穿窿嘅滋味只有自己知，早幾年喺個新同事Wallace身上見到自己嘅影子，因為有次lunch time我哋成班去中環一個露天大排檔食晏，佢冇跟埋一齊嚟。
明明記得佢11點幾仲嗌肚餓，忽然又唔跟，返到嚟只見佢張枱有個吉盒，係便利店三文治個透明盒，我問Wallace點解唔跟埋去食晏，佢話冇錢，嗰一刻唔知點解有少少激動，因為我都試過，但係Wallace好坦白，我當年係唔會同人認自己冇錢。
我唔想個新人咁淒涼捱餓，所以求其畀咗啲嘢Wallace跟，第二日就用佢做得好好作為藉口，話嚟緊一個禮拜要請佢食飯，Wallace初時唔肯，好記得又係去大排檔，佢仲想畀返錢我，唉，見到啦，銀包連一張廿蚊紙都冇，咪咁倔強好冇？已經用緊最婉轉嘅方法資助你。
我：「Wallace，你跟啲嘢真係好好，連個客都讚，總之呢個星期唔好同我爭，你要日日同我一齊食飯。」
Wallace：「下，但你真係唔使請我喎！」
我：「話咗係就係啦，男人老狗咪咁婆媽，前輩要請你食飯，作為後輩講多謝就得喇，呢啲係職場禮儀，知唔知？」
Wallace：「好，多謝，知道。」
請一個月又太過份，始終長貧難顧，我諗每個月搵啲藉口請Wallace食幾日飯，佢慳得幾多得幾多，起碼唔使好似我當年咁，二十幾號就叫救命吖嘛，等出糧個感覺好慘㗎，Keyboard咁多粒掣，我撳得最多就係F5，次次月尾都狂撳，希望會計阿姐大發慈悲早啲出糧。
我仲留意到Wallace來來去去都係嗰套西裝，多一件其他顏色替換都冇，最衰大家身型唔同，否則我可以畀啲衫佢，加油啦Wallace！仲後生，只要比心機做嘢，一定唔會餓死，我就係咁樣一步一步捱出頭，至少唔使再月尾狂撳F5，至少有多餘錢可以請後輩食飯，男人唔可以窮，爭氣呀！我當時真係咁諗。
有次去間稍為貴嘅餐廳食飯，Wallace個傻仔話食咗太多次免費餐，點都要請返我一次，然後9秒9去埋單，因為我有向另一位同事透露過Wallace嘅情況，佢分析得好有道理。
「你由佢請返次啦，自尊心對後生仔好重要㗎！」
我：「驚佢冇錢咋，早知今日唔嚟呢度食啦！而家要佢破費。」
「仲好啦，我見到Wallace碌卡，我哋其他人畀返cash，咁佢都有啲錢傍身。」
係喎，Wallace可能想折現袋啲cash，所以食完後我好似佢老豆咁長氣：「Wallace，記得準時找卡數呀，啲信貸record花咗好麻煩㗎，唔好先洗未來錢知唔知？」
Wallace好乖咁話知道，雖然我好似佢老豆，不過Wallace真正個老豆仲偉大，某日喺公司我聽到佢講電話，內容大致係咁：「遲啲讀都得啦，賣咩樓啫？都話唔使，我想過多幾年先讀呀，而家份工做得好地地。」
好少聽到Wallace咁忟憎，後來問返先知係老豆打嚟叫佢辭工，希望佢可以過多倫多讀大學。
「其實你真係好嘥，點解嗰陣唔讀上去？」
Wallace：「咁我真係唔想讀書嘛，早啲出嚟做嘢咪仲好。」
「你知唔知大學畢業證書係一張入場劵，你讀嘅嘢可能一世都用唔著，但如果冇呢張證書，好多公司in都唔會in你。」
Wallace：「係啫，老豆都唔使賣樓咁誇張，即係畀壓力我。」
「衰仔，佢為你好咋！」
或者我喺Wallace心目中亦師亦友，勸多幾勸之下，個衰仔真係聽我忠告，仲講笑話屋企一個老豆，公司一個老豆，唔夠我哋鬥。
「咁先乖㗎嘛，趁後生讀個學位返嚟先，我哋公司呢啲牛工幾時都有得做啦，我敢寫包單，第時你讀完返嚟如果仲想做，我點都叫老細開個位畀你。」
Wallace：「咁堅？」
我：「係呀，應承你！」
日頭唔好講人，老細就喺呢個時候返入office，見佢好嬲咁發牢騷：「唔知邊條友泊咗我個車位，激死！仲要泊到過晒界，揸Benz跑啲人手車特別屎！」
Wallace：「Sorry，老細，我唔知個位係你泊開，你使唔使我而家讓返個位畀你？」
全公司靜晒，老細都靜埋，我喺側邊細細聲同Wallace講：「咪玩啦，老細心情真係唔好㗎！」
老細從疑惑變成嘴角上揚，明顯係唔相信：「架Benz跑係你嘅？」
Wallace：「你係咪講緊紅色嗰架？」
老細：「係……你下次泊第二個位啦，我泊好咗喇。」
原來，架Benz跑真係Wallace嘅，同事們全部竊竊私語，須知道老細部車都不過係錢七，呢鑊嘢顏面何存。
「發生咩事？你平時連食飯都冇錢，點解有架Benz跑？」
Wallace：「邊個話我冇錢食飯？」
「上次去大排檔，你話冇錢，自己食三文治，我見你銀包連廿蚊紙都冇張。」
Wallace：「哦，你誤會喇，我唔習慣袋現金，我估大排檔應該唔可以碌卡，咁咪求其落便利店嘟個三文治囉！初初入嚟做同大家唔熟，冇理由叫你哋出住先或者等我撳錢。」
「你唔好同我講為咗買靚車節衣縮食，日日着同一套衫呀！」
Wallace：「我冇節衣縮食呀，平時去嗰啲餐廳通常有得碌卡，所以上次你去另一間咪即刻請返你食囉！同埋呢套係Hugo Boss嚟㗎，我真係好鍾意佢Dark Navy隻色，買咗同款好多套，死啦，原來你覺得我日日唔換衫？」
有冇人話我聽Hugo Boss西裝幾錢套？
「咁你老豆又話賣樓供你讀書？你知唔知搞到我好擔心」
Wallace：「唔使擔心，我老豆有三層樓，架Benz跑都係佢㗎，今晚約咗女仔先揸之嘛，我最初唔肯讀書係因為唔想過加拿大啫。」
而家我同Wallace仲有保持聯絡，每次講返起呢件事我哋都會笑到癲咗，我成日叫佢第日返香港要瘋狂請食飯補數，知唔知咩叫做貧窮限制想像？我就係人辦。
咁有錢，將來如果我撈唔掂，希望Wallace會喺手指罅漏啲出嚟救濟我啦！唉，諗返都覺得尷尬。