叫咗個下屬入房，因為公司加佢人工，底薪加咗2,500，所以私底下要畀封confirmation letter佢，順便恭喜兼送上鼓勵，不過佢一啲喜悅之情都冇。
我：「係咪嫌加得少？」
「唔係，其實可唔可以同公司講唔加？」
我：「做咩講呢啲晦氣說話？係咪有咩問題？可以講出嚟喎，你做得唔開心係我嘅責任。」
原來我同事話會畀阿媽鬧，佢哋住緊公屋，而家個入息上限啱啱好，多咗就要交雙倍租金，而其實佢個單位嘅雙倍租金係交多千幾蚊，我就話即使係加，你減返2,500，收入都係多咗。
「我阿媽話點都唔好益房署，交雙倍租金好唔抵。」
我：「絕對認同房署係打靶，不過唔係益佢嘅問題，而家份糧係幾多，將來轉工都會影響叫價，點解咁傻仔局限自己一世逗呢個level嘅人工呀？」
「你唔明㗎喇，自細阿媽就灌輸一個意識畀我，就係我唔會有能力買樓，唔會叻過人，升職唔會輪到我，以唔畀人炒為大前提就得，更加唔好諗咩創業，安份守己最好。」
我明，我點會唔明……
成日有種講法係，上一代想仔女做到佢哋做唔到嘅嘢，令仔女好慘，其實我想講咁樣真係唔算慘，最慘係上一代做唔到嘅嘢，佢哋覺得仔女都唔應該做到，並且一路用言語去踐踏你嘅信心。
唔好睇少呢啲冷言冷語，因為「你唔得㗎」、「你唔得㗎」、「你唔得㗎」、「你唔得㗎」，講得多真係會成為咒詛，當你有時企喺懸崖位需要正能量，你會記得最親嘅人一早就話你唔得，喺堅持同放棄之間好容易選擇認輸。
明白父母想仔女一生無風無浪係出於一份愛，但係自己做唔到嘅嘢，真係唔等於下一代做唔到，試下欣賞同鼓勵仔女，唔好令佢哋覺得失敗就冚家剷，不如等佢知道無論成功與否，都有一個避風港。
有人話窮會窮三代，最大原因就係過程中有呢個惡性循環，我哋控制唔到上一代，但可以掌握自己未來，當我唔好彩係第三代冇父蔭，咁畀我做多啲嘢幫第四代扭轉命運得唔得？我窮啫，都唔想我個仔同個孫繼續窮落去㗎！
上一代讀書唔叻唔等於你唔得，唔好認命，畀心機讀書！
上一代婚姻唔好唔等於會延續，唔好認命，你可以有自己嘅幸福！
上一代做唔到嘅事，可以由你呢一代做起。