我哋公司12月嘅時候宣布咗加薪，呢下真係估唔到，因為office由上至下每個人一律加$50，個個department都呱呱嘈，往年衰極都會因應同事表現而人人唔同，最廢同埋成日請假嘅同事都有$250，我自己就加咗$500，有人加$1000，今年竟然全部加$50蚊！
上上下下都嬲㗎喇，七嘴八舌屌公司刻薄肯定走唔甩，不過估唔到最躁嗰個竟然係我Manager，佢喺大家討論嘅時候已經冇出聲，黑晒面坐喺個位睇自己封加薪通知信，然後突然一下爆seed：「其實公司咁樣即係侮辱性加薪啫！」
Manager嗰下係好大聲，差唔多全個office嘅人望晒過去，但我阿ger嘅目光只停留喺負責派信嘅HR姐姐身上。
阿ger：「如果唔加冇咁嬲喎，加$50蚊即係點呀？當我哋乞衣呀？」
HR姐姐：「我都係加$50咋……」
Feel到HR姐姐都怯，我阿ger係動真火兼目露兇光，雖然佢平時唔可以稱得上好惡，但係從未試過好似呢下咁樣情緒爆發，當時我都不其然喺度諗，阿ger係咪有咩生活壓力呢？雖然我都嬲，不過佢又真係有啲失控。
阿ger：「係咪真係人人都加$50先，Sales係咪都加$50蚊？」
HR姐姐礙於職業操守其實唔答得，不過Sales team有同事聽到又真係走去答我阿ger：「係呀，我哋條team都係個個$50，應該全公司都一樣。」
阿ger聽完又將目光再投向HR姐姐身上：「得啦咁，我搵老細講。」
HR姐姐：「佢今日唔返office呀！」
阿ger：「知道加$50難為情，搵人做醜人去派信，佢自己就避呀？」
HR姐姐：「咁老細每個星期都有一兩日係唔返公司嘅。」
阿ger：「得！唔使加！我唔使佢加$50畀我，公司咁唔掂吖嘛！我人工倒減$50，當我回饋畀公司，就睇下佢知唔知醜！」
然後阿ger打算喺銀包搵$50蚊出嚟，不過佢冇$50蚊紙，我個位嘅距離最近阿ger，所以佢就直接問我：「有冇$50蚊，借住嚟先！」
我：「吓……」
阿ger：「你摷下有冇$50，一陣畀返你呀！」佢一路問一路行埋嚟我個位，焗住要摷啦，咁啱得咁橋又真係有……
阿ger見到我張$50就講咗句：「拎嚟！」然後條友真係衝咗入去老細房擺低張$50，office裡面其他同事見到佢咁躁，大部分都唔敢講嘢，當然都有人食花生，亦有個別幾個嗌佢唔好咁衝動。
阿ger：「我擺咗$50蚊喺老細枱面呀，畀L返佢，多謝夾盛惠呀！DLLM唔加冇咁嬲，你加$50蚊即係點呀？侮辱我呀？」
HR姐姐已經慌晒，不斷重複一句對白：「唔好咁嬲，唔好咁衝動先。」
阿ger向住成個office講：「你哋唔嬲㗎？我真係接受唔到喎！」
其實呢單嘢喺心理上係有少少複雜，身邊有朋友嘅公司並冇加薪，真係$1都冇加，我仲有個friend係兩年前疫情嗰陣被迫減薪，然後公司一路都冇加返畀佢哋，所以我呢度加$50你可以話佢衰，但如果要比較的話，同出面compare又好似低處未算低。
不過咁，我阿ger又唔係講得冇道理嘅，你加$50蚊係有少少肉酸，我都唔識計係人工嘅幾多個percent，個感覺就好似你出去餐廳食飯，唔畀貼士反而好地地，無啦啦拎幾毫子出嚟同個侍應講：「醒你！」嗰下咪就係唔畀好過畀囉，你侮辱人咩！
之後有啲花生友同事仲喺度笑，話我個manager根本係趁老細唔喺度先至夠膽拎張$50蚊入去，話佢想威想執個尾彩，其實我又唔係咁睇，就算老細唔喺度，佢嘈到拆天人人都知，遲早都會傳去老細嗰度啦，你估office冇二五仔咩！
HR姐姐為咗息事寧人，走咗入去老細間房拎返枱面張$50蚊，我阿ger見到又搶返嚟再拎入去，兩條友好似小朋友玩咁，加埋都幾廿歲啦，何況張$50蚊係我㗎，不如畀返我先啦好唔好？
拎嚟拎去最終都係拎返出嚟，HR姐姐順利叫阿ger唔好咁衝動，嗌佢袋返好啲錢先，有咩事再搵老細慢慢傾，屌！都話張$50係我㗎！
不過我阿ger都算有guts，第二日見到老細返工即刻走咗入去閂門傾，傾咗啲咩就唔知喇，佢出返嚟嘅時候又係黑晒面冇講嘢，而全部同事加$50嘅決定亦都冇變，講真吖，公司樓下間濕鳩茶記如果嗌set lunch叫凍飲都唔止$50，所以真係好氣餒，好想知道其他人嘅公司有冇加薪？加薪幅度又滿唔滿意？