呢一兩年好多公司裁員，我都落得同一命運，公司喺一年前話要精簡人手，起晒成個department，失業後我有keep住搵工，係就係有回音，不過頭半年都係得個見字，正式offer一個都冇，唯有斷斷續續做啲part-time幫補。
直至半年前，有個大學同學阿Sam又係失業，佢個情況比我更惡劣，因為個衰仔好多嗜好，模型波鞋乜都啱，財務狀況一早已經告急。當時阿Sam話馬死落地行，決定投身保安行業，又知我仲未搵到工，於是叫埋我一齊報讀保安課程。
阿Sam：「香港咁多私樓商廈，我同你又三十出頭，叫做識啲英文，照計做保安應該吃香。」
「一齊讀冇所謂，反正未有嘢做，多個牌傍下身都好嘅，報囉！」
阿Sam：「到時新年收下利是，平時返工就溝下師奶，諗起都爽呀！」
「師奶都溝？唔好窮心未盡色心又起啦，嗱嗱聲報咗先。」
之後我同阿Sam就讀咗個為期兩日嘅保安課程，班上面咩年齡層嘅人都有，當然以中年人士佔大多數，其實只要肯聽書，基本上一定pass到個test，個人認為最難搞只係課堂時間太長，幾乎冇break，上堂前真係要飲定咖啡。
原來有機構一早已經同保安課程呢邊傾好，喺第二堂尾聲嗰陣，有啲公司HR嘅物體直接入嚟招聘，舉手填form就得㗎喇，幾好吖，上網搵工都慳返，我梗係有舉手啦，班上面啲阿叔同阿姐都有舉，偏偏阿Sam冇反應。
我：「點樣樣呀你？扮上菜呀？」
阿Sam：「同班阿叔阿嬸爭份保安好冇面，過唔到自己嗰關喎。」
我：「你已經坐食山崩，呢個時候仲講面子？到時要你巡樓、同啲客講早晨又好冇面喇喎？舉手啦柒頭！」
老實講，保安呢份工冇想像中咁難，亦冇想像中咁易，蛇王嘅時間自己醒水啦，但巡樓都有少少辛苦嘅，特別係啱啱做嘅時候，保安界一樣有小圈子，上面同你唔熟，最難行嘅巡邏路線自然會畀新人，我仲要返夜班，有時真係幾驚。其實我返咗半年都未完全適應，收工撻落床攰到即刻瞓著，邊做邊搵囉，有機會先轉返去做office工。
阿Sam個衰仔都做緊，不過佢冇同人講自己做保安，佢話怕瘀喎，唉，性格係咁都冇辦法，佢太在意別人嘅眼光。
介意人哋睇法嘅唔止我舊同學阿Sam，仲有我舊同事Eddy，上星期我放假出咗尖沙咀，喺條街撞見Eddy派傳單，雖然佢有戴口罩，但你哋都知啦，當你識嗰個人，仲要曾經共事一段日子，其實點會認唔到吖！
Eddy都係一年前被公司裁出嚟，嗰日我見佢喺天橋大汗疊細汗派傳單，我行埋去嗌佢再點點頭，Eddy望望我就調頭走，雖然一度懷疑自己認錯人，但從佢瞳孔放大嘅反應，我都好肯定佢係Eddy。
其實我冇惡意㗎，純粹想打聲招呼，更加想話畀Eddy知我做緊保安，大家都係逼不得已離開原本最擅長嘅工作崗位啫，何況保安又好，派傳單又好，肯做肯搏有承擔，憑自己一對手搵食真係冇問題，一齊加油啦，至窮無非討口，不死總得出頭！
投稿人：保安界新星
另一個屯門返九龍灣嘅舊故事
《其實世界咁大 走遠啲又有咩所謂》
https://hkofficedaily.com/?p=4488