半夜見個女帶男仔返屋企 從此鬼節唔敢出夜街

真心問,好多人都話鬼節唔好出夜街,究竟你哋有冇乖乖地留喺屋企?我有個朋友阿Pat就真係嚴守規律,不過唔係因為乖,而係幾年前嘅鬼節撞過嘢,直至而家仲驚緊。

幾年前嘅鬼節晚上,任職retail sales嘅阿Pat如常返工,由於第二日放假,喜愛杯中物嘅佢收工之後約埋朋友飲嘢,當時冇疫情,酒吧夜夜笙歌,大把人飲到凌晨先盡興而回,阿Pat都唔例外,佢每個星期梗有一晚落bar,所以習以為常。

因為飲到wing wing地,又玩到凌晨三點幾,所以阿Pat就喺尖沙咀直接搭的士返屯門寓所,一入門口連涼都冇沖就返入房瞓,第二朝起身見到老豆老母坐喺梳化嬲爆爆,佢覺得好奇怪,然後老母行埋嚟同阿Pat講:「你唔好再過份啲,咁大膽帶個男仔返屋企瞓,有冇搞錯呀你!」

阿Pat聽到一頭霧水,噚晚係wing wing地啫,但未致於醉,更加唔會帶個男仔返屋企啦,間公屋豆腐膶咁細,所以阿Pat即時否認:「痴線,講咩呀你?」跟住佢老豆又發火:「仲話冇?我哋親眼睇住個男仔跟你入房,閂埋門就冇出過嚟,你快啲叫佢走!」

輪到阿Pat嬲喇,佢覺得兩老屈佢,所以指住間房話:「邊有男仔呀?你哋係咪傻㗎!」

阿Pat父母本身係夜尿頻繁嘅人,而且好醒瞓,當時阿爸啱啱屙完夜尿,加上阿Pat返入屋閂鐵閘閂門發出聲浪,所以連阿媽都醒埋,兩老親眼睇住個男仔跟個女入屋,再貼住行入房,佢阿媽嬲到出廳坐喺梳化守住,老豆恰多陣都行埋出去陪阿媽坐,兩個老人家邊恰邊等,目的係要睇下個男仔係咩人。

講講下,阿Pat由嬲轉驚,但又半信半疑,有人跟住入屋會唔知?兩老見到房入面冇人都嚇親,當時已經懷疑係污糟嘢,不過又唔知可以點做,同日阿Pat已經好似啲老土鬼故咁---發高燒。老人家呢個時候梗係借題發揮,係咁話個女成日飲嘢飲到三更半夜,講明七月十四鬼門關大開都唔早啲返屋企。

怪異事情陸續發生,阿Pat斷斷續續有幾個晚上畀鬼砸,全身郁唔到,嗌又嗌唔到,呢種情況之前未試過,佢話自己雖然唔係教徒,但由於讀基督教小學,所以識念主禱文,每次畀鬼砸就喺心裡面念幾次,跟住就會正常返。

成件事未完,阿Pat瞓覺仲會聽到怪聲,有時係歌聲,有時係類似碎碎念咁嘅講嘢聲,永遠聽唔到講咩,但啲聲音好近自己,會聽到耳仔發麻,全身起雞皮,最最最恐怖係有一次瞓瞓下張開眼,見到有個男仔喺床邊怒目而視咁指住佢,真係瞪大眼用食指指住,阿Pat嚇到傻嘅同時就扎醒咗,換言之係夢境?但又非常之真實,好似真係發生過。

嗰段時間阿Pat經常夢到自己屋企,永遠都係多咗個男仔同佢一齊生活,例如有次佢夢見自己開門入屋,個男仔已經喺梳化睇緊電視,阿Pat想開口問對方係邊個,然後又會扎醒。

兩老認定有污糟嘢跟住自己個女,大家雖然驚但唔知應該點做,極其量都係阿媽求咗道唔知咩符畀阿Pat,大約過咗三四個禮拜就慢慢回復正常,冇再畀鬼砸,冇再發埋啲奇怪夢。

呢個陰影纏繞阿Pat到而家,特別係個「男仔」喺床邊指住佢嗰一幕,每次諗返都起雞皮。唔知係嗰次嘅經歷定係疫情關係,阿Pat而家已經好少出去飲嘢,就算同班friend去玩都唔會太夜返,鬼節就就更加早返屋企。

阿Pat話最後一次見到嗰個「男仔」,係當年撞嘢之後大約一個月,佢坐喺廳,見到有個男仔喺窗台外行過,佢間公屋喺二樓,出面有個平台,其實耐唔耐都會有清潔工人去掃垃圾,但掃垃圾永遠都好嘈,嗰次唔係清潔工人,係嗰個「男仔」,靜靜行過,方向仲要係平台盡頭嗰邊(照計冇路走一定要行返轉頭),個「男仔」行過之後就冇再折返,所以阿Pat有個心理陰影,就係唔敢喺露台個窗望出去。

聽講屋企附近有啲類似電力變壓站嘅物體就會比較易撞鬼,我阿爸好多年前喺一個荃灣嘅私人屋苑做保安,有住客打去管理處話見到鬼,喺窗望落屋苑泳池,有個女人行落水,再喺另一邊行返上嚟,完全唔使捉住條梯,好似升上嚟咁,跟住行去一道門就咁穿過。

我阿爸聲稱同同事翻睇CCTV都見到穿門呢一幕,而佢個私人屋苑同阿Pat住嘅公屋都有個共通點,就係隔籬有個電力公司嘅變壓站,好在我而家住緊嗰度冇啫。

error: