截肢後學習接受 最難搞反而係小朋友

因為骨癌復發,多年前我經歷咗截肢手術,老實講,人到中年突然冇咗隻腳,無論係身同埋心都難以接受,最低落時諗過死,因為我覺得自己已經唔係一個「完整嘅人」。

記得舊公司好好,佢哋話會虛位以待,但當時我萬念俱灰,莫講話工作,就連生存都覺得好吃力同好攰,先學習用輪椅過生活,後來再跟物理治療師學習使用義肢,仲要承受冇咗隻腳仍然會產生嘅「幻肢痛」,呢啲嘢我根本唔想面對,又無可奈何要面對。

正常人唔開心不外乎親情、愛情、友情、事業、錢,呢啲嘢可以搵朋友傾,身邊總有人感同身受,但截肢呢?幾親密嘅人都好難代入。

仲係正常人一個嘅時候,我覺得單身好苦悶,截肢之後,我慶幸之前搵唔到另一半,因為唔使害人。手術後嘅我就係咁悲觀,但可以唔悲觀咩?

嗰幾年我冇做嘢,靠保險、資助,仲有父母嘅錢維持生活,除咗物理治療之外,基本上我可以足不出戶,用咗義肢更加唔想出街,呢種虛度人生嘅狀態直至我老豆有一年工傷整親隻手,佢迫不得已停工幾個月,我嗰陣先開始認真思考,知道自己唔可以長期靠父母照顧,因為當坐定定直視老豆嘅時候,我發現佢真係老咗好多。

冇咗隻腳之後我好怕望住別人對眼,好怕人哋同情我嘅眼光,無論朋友定父母同我講嘢,我都盡量避免眼神接觸,因為自卑,唔願意做一個「被憐憫」嘅角色。老豆整親手嗰次,我勸佢好好養傷,唔好急住開工,細心一望先發現佢嘅皺紋多咗,白頭髮多咗,當時除咗內疚,我亦知道唔可以再頹落去,因為自暴自棄只會令身邊嘅人更加辛苦。

由於自卑同埋害怕旁人目光,其實我用咗義肢後好少出街,就算出街亦會用衣物掩蓋,總之遮得幾多得幾多,但後來我終於鼓起勇氣再踏出社會,甚至著短褲出街都唔再驚,諗深一層,經歷完癌病同截肢,我仲有嘢需要驚咩?有咩大場面未見過吖!

然後發現,原來冇咩啫,而家公司嘅同事完全當我普通人看待,陌生人的確會望多兩眼,但我理解佢哋只係好奇,望完急速迴避,相信係怕我難受,Ok嘅,當我用善意嘅眼光睇人,接收到嘅嘢同埋自身感覺都會充滿善意,有時啲嘢係視乎自己點樣消化同面對。

最難搞其實係遇到小朋友,因為童言無忌,之前有次等緊過馬路,旁邊有對母子,個小朋友望住我嘅義肢話:「叔叔隻腳係假㗎!」

佢阿媽連聲道歉再鬧個小朋友,我反而識得講笑:「係呀,如果你唔想好似叔叔咁,記得唔好亂過馬路喎,知唔知?」雖然我唔係因為交通意外先至截肢,但簡單一句就化解尷尬局面,其實唔錯吖,小朋友經過今次,佢阿媽一定會返去好好解釋,咁將來呢位小朋友見到其他用義肢嘅人,自然就會有正確嘅觀念,唔會講一啲無心傷害嘅說話。

由悲觀變成樂觀,完全係多得我老豆,佢千叮萬囑我好好生活,唔止要將自己當成普通人,仲要接納而家嘅自己,因為健全也好,用義肢也好,呢個先係最真實嘅我,如果我對自己都唔好,又點可以奢求其他人對我好呢?呢番說話係老豆上年年尾離開我同阿媽之前講嘅,我會一直記住喺心。

希望你哋每個人都好好生活,最緊要保持樂觀,反正生活喊又係咁過,笑又係咁過,點解要令自己咁難過。

投稿讀者:統成


你哋仲記得阿輝嗎?當年出咗阿輝坐輪椅嘅故事之後,其實好多傳媒託我相約做訪問,不過阿輝表示自己性格內向,所以一一拒絕。最近阿輝有同我傾談,得悉佢過得好好,大家可以放一萬個心。

《阿輝》
https://hkofficedaily.com/?p=10146

error: