喺大堂等電梯嘅時候，其中一部鎖咗，單數同雙數樓層住戶分別得返一部電梯可搭，從頭頂嘅閉路電視所見，原來係有清潔工人倒緊垃圾，其實呢啲情況每日恆常出現，但同樣等緊電梯嘅一位阿姐就好勞嘈：「麻鬼煩！阻住晒！得返一部有排等啦，啲嘢食凍晒！」
只見佢拎住袋吉野家外賣，應該真係好心急返上樓食牛肉飯，但係如果冇人倒垃圾，你每日食完呢啲外賣，仲有其他製造出嚟嘅廢物，又點會無端端喺你層樓個垃圾房消失呢？
原來喺假期裡面，喺疫情之下，仲要喺寒冷天氣中默默耕耘嘅人，唔一定會得到別人嘅體諒同感激。
與此同時，我見到一單十幾日前嘅舊聞，地點係美國維珍尼亞州一個小社區Hallsley，因為疫情緣故，居民只能倚賴online shopping去添置日用品、食物，仲有其他生活補給物資，撞正當時臨近聖誕同新年假期，速遞公司嘅包裹簡直可以用海量去形容，其實呢種消費模式喺香港已經一樣，大家以前可能只會上網買衫買鞋，而家基本上連食材同水都會喺online store買，所以不難理解。
負責該區嘅UPS快遞員兼司機Anthony亦因為咁樣而工作量大增，單日破當地嘅包裹派送紀錄，一日內要派超過180件貨，須知道美國唔同香港，咁多貨咁多戶加上地方大，Anthony只能夠日夜趕路不斷派送，大部分時間都喺架車同埋公路上度過，而且美國疫情嚴峻，佢要挨門逐戶派貨嘅風險亦好大。
住喺Hallsley嘅一位民居Patty Friedman對此非常感恩，佢話自己搬咗去嗰度冇耐，加上疫情影響無法出外購物，幸得Anthony每日盡責地將包裹送到佢手上，仲話見到呢位UPS司機就好似見到親人咁溫暖，但佢亦體會到疫情下同埋假期前夕，Anthony每日喺路上馬不停蹄送貨係好辛苦、孤寂，同埋疲累，何況派送工作屬於高風險，所以就發起一個感恩會，希望Anthony知道自己唔係孤單一人，結果好多Hallsley嘅居民都有參與，過百人夾道歡迎Anthony架車，大人細路都向佢致敬，有人響咹，有人叫佢個名，仲送上小禮物。
Anthony見到居民咁樣做，感動到流下男兒淚，唔少居民都話Anthony平時幾辛苦都笑臉迎人，第一次見到佢面容扭曲喊晒。
喺假期返工嘅人當然都有糧出，唔係要懶感性去歌頌，只係佢哋亦犧牲咗好多陪伴家人嘅時間，以我媽媽為例，佢以前做保安，大時大節一定要返工，一家人夾假食飯真係唔容易。今次聖誕、除夕、元旦，我哋仲要面對疫情威脅，加上天氣寒冷，喺度想向呢班默默耕耘嘅人講聲：「辛苦晒！」希望更多人可以體諒佢哋，因為呢班辛勤工作嘅人絕對值得被善待。