估唔到2026年我仲有幸喺職場見識到「媽寶」！我做receptionist，某日有個男仔上嚟話約咗interview，冇問題，咪幫佢打內線叫HR囉！不過唔多對路喎，佢身後有位年約50至60歲嘅女人，最初以為係送件定點樣啦，所以就問呢位姨姨有咩幫到佢？
姨姨：「冇嘢！唔使理我！我陪佢上嚟見工㗎（佢指住個男仔）！我一陣可唔可以跟埋入去呀？」吓！我未遇過咁嘅情況喎！唔理喇，畀份form個男仔填咗先，再叫佢哋去梳化嗰邊坐，跟住我再慢慢同HR講啦！如果個求職者係女仔，我或者可以理解，但你嗰個係仔，而且之後睇返張form……你個仔都29歲喇喎！
HR喺內線叫我指示個姨姨離開，不過我話無所謂，反正有張L型大梳化冇人坐，當日出面仲要落大雨，你叫個姨姨去得邊？一陣佢喺office門口徘徊咪仲奇怪，坐喺度等啦！
個男仔填form期間，呢位姨姨……即係佢阿媽，一直從旁指指點點，聽到佢話個仔啲字寫得唔靚，又話邊度邊度唔好咁樣填，唔係啩！填張application form都要咁緊張？
最後佢個仔入去見工，HR話佢阿媽唔入得，呢位姨姨喺等待期間一直走嚟煩我：「小姐呀？呢間公司好唔好做呀？」
我：「份份工都有好做同唔好做嘅地方啦！」第一次見你，你個仔又只係嚟見工，唔係期望我同你講公司壞話呀？
姨姨：「呢間公司開咗幾耐呀？啲人點㗎？穩陣呀呵？應該好準時出糧㗎嘛？」究竟係你個仔interview，還是你上嚟同我interview？
求其話有工作忙緊，叫個姨姨坐返埋去梳化就算，其實你咁搞法，個仔點樣正常搵工呀？本身想請都變唔請啦！
不過世事真係無絕對，後來公司請咗呢個男仔，HR仲講笑咁話：「你留意佢阿媽有冇跟埋返工喎！唔可以畀其他人入嚟㗎，坐梳化都唔得，咪再心軟呀！」
我：「唔係黑心，我都想人人有工做，但點解會請嘅？帶埋阿媽嚟見工喎！你見到㗎！」
HR：「我負責搵人嚟見工，請唔請唔係我決定，個Manager可能覺得適合呢！」
咁又係，何況人哋係咪媽寶都好，又唔影響到我……最初我以為係咁。
呢個29歲嘅男仔第一日返工已經好準時，佢哋班文職其實返9點，而且約定俗成有半個鐘buffer，所以好多人都係9點半前返到，我呢個receptionist就係返8點半，因為要開門，但我當日返到office，個男仔已經企咗喺公司門口等。
「你好呀！我第一日返工！」
我：「我知，認得你，8點半咋喎，咁早？」
「係呀，第一日早啲吖嘛，怕塞車！」
根本唔係第一日先咁早，因為之後每一日佢都好早，我8點半返到，永遠會見到佢喺門口等，究竟你幾點鐘返到嚟㗎？
如是者連續一個月都係咁，終於有次我忍唔住問佢：「你係咪前世未返過工？唔使咁早㗎！」
「因為我條邨有架『返工時間特別班次』巴士，我搭8:10嗰班就啱啱好，但阿媽好緊張，每朝6:00嗌醒我，7:00前趕我出門，話老細唔鍾意人遲到，叫我唔好同其他後生仔一樣怕蝕底。」
我：「你住好遠㗎？沙頭角？」
「荃灣！」
我：「荃灣返觀塘唔使早咁多嘅，你班同事都係9點半先陸續返到，你8點半早咗成個鐘，就算跟合約你都早半個鐘。」
「無辦法啦！阿媽好緊張，好多時我放工都唔係直接返屋企，會行下先，阿媽覺得夠鐘即走好易畀老細炒，其實我8:10已經返到㗎喇，唔係8點半。」
我：「8:10就企喺度？你阿媽係咪畀咗好多壓力你？」
「都ok嘅！佢關心我啫！」
我：「可唔可以關心埋我？舊時我9點前返到就得，你而家咁早，Admin叫我盡量準時8點半返，話驚你冇門口入，我都好大壓力呀！」
個男仔淨係笑咗一下，然後第二日8:30返嚟仲見到佢，呀唔係，正確嚟講佢應該係8:10已經企喺度，我唔想知呀！
其實29歲應該叫男仔定男人貼切啲呢？同埋佢好早返工嘅事全公司都知，所以先驚動到Admin阿姐嗌我準時。
人哋點教仔？係唔係媽寶？我冇權過問，但你影響埋我吖嘛！可唔可以配多條公司鎖匙畀佢呀？（完）