可唔可以分享下大家喺公司遇過咩荒唐事？我先！4年前仲喺舊公司嗰陣，老細捉咗我入房密斟，佢叫我哋會計部更改一位同事嘅人工，將對方份糧加3萬，由本身$32,500即時加到$62,500！咁大手筆？唔似老細喎！難道個同事傾成咗單大生意？又唔係吖，老細指定加人工嗰位同事係倉務主管咋喎！
老細之所以咁急搵我講，係因為我負責搞公司出糧，當時距離月底大約仲有10日左右，老細驚啲自動轉帳整唔切，同埋佢要倉務主管落袋實收$62,500，而唔係出$62,500人工再扣MPF，總之就好鬼緊張，我首先同佢講唔使擔心，手動可以做到，不過呢件事似乎要同人事部嗰邊溝通。
一開始老細好抗拒同人事部講，希望我一個人幫佢搞掂加人工畀倉務主管呢單嘢，但咁樣唔啱規矩，不嬲出糧都係人事部同會計部互相協調，例如邊個同事請假返唔足，我哋會計部都要等人事部update，你一下子由$32,500人工加到變$62,500，冇理由你同我閂埋房門講一句就算啫！
同一時間，老細亦附加咗特別條件，就係10個月之後將呢位倉務主管份糧變返$32,500…..
我：「不如叫埋HR入嚟啦！」
老細：「我唔想咁多人知呀！」
我：「唔係要好多人知，但應該要知嘅人一定要知，其實點解突然加佢咁高人工？10個月後又回復正常？」
如果忽然加3萬畀一個女同事……我可能唔會問太多，但老細係男人，倉務主管又係阿叔，你哋冇嘢吖嘛？我甚至諗到啲感動嘢，唔通倉務主管屋企有事，你私人幫佢？
老細：「我爭佢30個，不過我啲錢真係唔郁得，唔夠流動資金，而家分10期找，每期3萬，咁你明啦！」
我：「你做咩爭佢咁多錢？佢借30萬畀你？」
其實我都明身為老細唔一定好多流動資金，特別係我知公司盤數咩事，不過堂堂老細爭倉務主管30萬，真係點講都講唔通，定係你畀人捉黃腳雞之類呀？
最後個真相簡直吹漲，而我無啦啦投稿就係因為呢排打緊世界盃。
我唔係足球迷，講真你叫我數10個球員名出嚟都未必數到，不過世界盃呢項比賽就令我印象深刻，唔止4年後嘅今日轉咗公司仲記得，我相信有生之年只要聽到世界盃3個字，我都會記起呢一件咁荒謬嘅事。
當年都係踢緊世界盃，老細話佢有場波想買，好有信心，但馬會冇入錢，咁同倉務主管傾開波經，對方就話可以幫佢買外圍「篤手指」，買波唔使拎現金出嚟，仲有一個禮拜數期，因為外圍係一星期結算一次，無論輸贏都係。
嗰次，老細買10,000，輸晒！
輸波就自然要追數，個倉務主管直接開咗個外圍account畀老細，credit係每日5萬，贏咗就累積下星期收錢，輸咗唔使找住，因為個account會自動每日更新5萬credit，老細話自己嗰個星期搭「直通車」，連續輸足咁多日，埋單輸32萬，有2萬已經找咗，但再冇現金，所以另外30萬就分10期，每月3萬。
老細三句唔埋兩句讚個倉務主管有義氣，話佢肯出面同個莊傾，所以先可以咁樣攤分。
我記得自己當年有勸過老細諗其他方法，因為表面上行得通，始終公司啲錢都係佢啲錢，但執行上仲有好多問題，例如倉務主管份糧激增，同時都影響埋對方報稅。
結果叫埋HR入嚟傾，老細一意孤行要咁做，咁咪照做囉，我會計部同人事部都係打份工㗎啫！當年的確係將倉務主管份糧由$32,500即時加到$62,500，真係亂咁嚟！
我最終睇唔到老細有冇找足10個月錢畀倉務主管，因為後來我轉咗工，唔關呢單嘢事，不過直到而家為止，我仍然覺得當年轉工係正確決定，因為個老細連幾十萬流動資金都冇，又用公司錢找外圍波數，遲早一日都會出事，唔知今屆世界盃佢仲有冇賭呢？（完）