其實我哋安排男女會員一對一食飯，係冇指定過男會員要出錢，咁當然好多男士都有風度，但亦有好多女士係唔願意畀人請，堅持要AA制，甚至請返個男士食飯都聽過，講到尾就係睇feel。出嚟食飯嘅目的係彼此了解，見完面可能有好感可以發展落去，亦可能會覺得只適合做朋友，或者唔見猶自可，見完更加反感亦唔出奇。
之前發生咗一件事，男會員阿奇同女會員Ella出嚟食飯，第二日阿奇就向我哋表示Ella唔適合自己，原因係Ella希望結婚後可以同父母一齊住。
「咁快講結婚？」我想問BB改埋名未？但唔想客人覺得我輕挑。
阿奇：「呢個就係重點，出到嚟傾計覺得唔適合。」
唔緊要，一對一好多時都要幾round，呢種情況好正常，不過冇幾耐又到Ella打嚟～～～
Ella：「你可唔可以叫阿奇畀返噚晚飯錢我？」
「吓！你請阿奇食飯咩？」
Ella：「唔係，佢提出AA，但我都係覺得佢應該請。」
「喔……其實冇規定要男仔請嘅，最緊要睇feel啦，如果你哋當時AA咗，隔日先要對方再畀多啲，好似有啲尷尬，唔係幾好咁囉，而且你哋唔適合做情人啫，都可以做個朋友嘛，係咪？」
Ella：「唔好啦，你幫我追佢啦，我都係想佢出晒餐飯呀，同埋我哋噚晚冇交換電話，我都搵唔到佢。」
唉，點解要我做呢啲醜人呢？一餐飯又幾錢呢？講真幫會員book嘅餐廳已經係scan過晒嘅合作夥伴，唔會係茶記，又唔會係貴到離地嘅扮嘢餐廳，何必呢？
「阿奇……唔好意思，Ella剛剛搵我，想你……噚晚餐飯……出埋佢嗰份，我講咗當時AA完就唔好咁樣追返㗎喇。」
阿奇：「我唔好意思就真，我唔會出返佢嗰份喇。」
我差啲好似《喜劇之王》個外賣仔咁，衝口而出話：「不如我畀啦！幾百蚊餐飯咁鬼煩！」好在阿奇快我一步，否則鑄成大錯。
阿奇：「噚晚餐飯5900，我已經畀咗3000蚊cash佢，Ella有叫我請，但我當時即刻話自己冇帶卡，可以AA，我將身上3000蚊cash畀咗佢喇。」
「5900？噚冕間餐廳點樣食到5900呀？一個Set Dinner幾百蚊咋喎，最平我記得有個燒春雞都係200幾，個扒好似500幾。」
阿奇：「係，不過Ella叫咗兩支酒呢！我係唔飲酒㗎！佢叫之前我已經講咗自己完全唔飲酒，唔係慳錢問題，而係我本身唔飲酒，加上揸車，已經即場多次拒絕，但佢照叫，成支成支咁叫。在公，我覺得Ella唔啱我，如果普通一餐飯我要請冇問題，你見我夾自己一半都畀咗3000，但紳士唔係咁做；在私，我已經三番四次講咗有揸車兼唔飲酒，冇可能咁樣都要我出埋支酒，其實呢餐飯單計食物一千蚊有找。」
頭都大埋，又有啲覺得畀Ella過咗一棟，因為開酒單嘢我完全唔知情。
「Ella，阿奇話你開咗兩支酒喎！佢係咪同你講過唔飲酒？所以佢出返AA已經係極限，聽講兩支酒佔咗成張單4900。」
Ella：「係就係，不過我返去諗咗一晚，覺得佢都係要出埋我嗰份，始終大家出嚟食飯，係咪應該男仔畀呢？」
「吓，我哋冇規定要男士畀喎，就算唔係speed dating，平時大家同朋友出街，都冇理由指定要男仔畀，阿奇有冇話要請你先？」
Ella：「佢冇話要請我，不過張單太貴喇，我出2900太多。」我究竟聽緊啲乜？？？
「既然你話張單貴，咁唔係更加應該AA咩？點解要阿奇一個人畀晒？」
Ella：「因為阿奇賺錢多過我囉！佢有車有樓，經濟鬆動過我。」
我已經冇耐性同Ella講落去，你當我係判官都好，呢張單阿奇AA出返3000已經係畀多，講到尾你哋都係初相識第一次見啫，個男仔又冇promise你埋單，兩支酒仲要唔係佢飲。
件事當然冇咁順利完結啦，最峰迴路轉係Ella之後唔係叫我搵阿奇找數，而係叫我幫阿奇畀返2900佢……
Ella：「我覺得你哋公司有責任囉！」
「點解呢？」
Ella：「餐廳係你哋partnership，你哋可以叫餐廳唔畀我開酒，set個limit，咁你即係出張信用卡畀我但冇limit，會累死人㗎！」
呢個世界果然係100歲唔死都有新聞。
再後來發展到Ella投訴我，然後直接搵我老細傾，叫我老細賠返2900畀佢。
老細嘅反應同我當時一樣：「點解呢？」
我覆述返件事一次，老細又同我講：「痴孖根！」
唔怕同你哋講，呢件事已經係上年運動之前發生，Ella死纏不休叫阿奇、我、我老細，負責呢「2900蚊帳單」足足煩咗半年，直至近兩個月佢先冇再打嚟，老細頭先突然醒起Ella呢個人：「呢期佢咁靜嘅，唔通中咗武肺？」
是但啦！唔好再打嚟叫我哋出佢份酒錢就得喇。