打波先嚟落雨真係冇咩好驚，50歲先嚟失業就真係驚喇。喺舊公司做咗13年，由普通職員做到senior，再做到manager，耐唔耐就有headhunt撬我轉工，搵唔到嘢做？呢個問題我從來未擔心過，因為好景嘅時候我甚至覺自己係搶手貨。
唔擔心唔代表唔會發生，舊公司因為疫情影響，生意大幅下滑，因為我哋主力做展覽項目，冇遊客，當時入境要隔離咁多日，所有project停擺，最終就要面臨裁員潮，而且公司係先炒人工高嗰班，炒一個頂幾個吖嘛，其實新聞有根有據，就算而家所謂放寬咗，新加坡的確搶咗香港好多生意，你個政策係咁，有乜辦法唔害死啲公司。
被裁之後，我嘗試搵返曾經撬過我嘅headhunt，不過佢哋都異口同聲話疫情影響太大，唔係暫時冇適合我嘅工作咁簡單，而係出面嘅職位空缺都少咗好多，當時只要去求職網睇睇，唔難發現來來去去都係嗰幾份工，試過有次headhunt幾經辛苦幫我安排一個interview：「巫生，個客下星期一想約你見工，有冇時間？」
我：「有！梗係有啦！幾點吖？」
Headhunt覆實晒資料，我亦做晒功課準備，點知星期五又收到佢電話：「唔好意思呀巫生，個客間公司有人中咗，除咗要消毒office，佢哋成班同事仲要轉為work from home一段時間，星期一個interview暫時取消。」
呢個headhunt其實好好，佢一直冇放棄過，當然佢自己都想爭取多啲生意，始終市道咁差，職位少咗，headhunt呢行都真係唔容易。
「巫生，我說服咗個客改做視像interview，你有冇問題？有冇用開Teams或者Zoom？」
我：「當然冇問題啦，兩樣都用開，隨時可以。」
呢個視像interview順利進行，我哋三方面都好滿意，可惜個結局並唔順利，因為當時WFH好似潮流一樣，而防疫政策又五時花六時變，時而放寬，時而再收緊，好似一個沒完沒了嘅地獄。
「Sorry呀巫生，其實個客好鍾意你，不過老細話叫停所有招聘，因為前景唔清晰，而家個position暫時frozen咗，真係唔好意思呀，sorry！」
唔關個headhunt事，我點會唔知出面係咩環境，啲咩視像interview，個position冇咗，求職網來來去去得嗰幾份工，過去呢段時間根本係生活日常。
50歲人，上一份工做咗13年，累積咗20幾年工作經驗，職場上我已經係一個老鬼，但講到失業，其實我真係初哥。
失業初期我竟然傻到唔敢同屋企講，我怕家人擔心，每日照平時咁樣換衫返工，夠鐘就返屋企，有一日中午老婆打畀我，當時我坐緊車，附近好嘈，因為唔想畀佢識穿，我直接就cut咗線，搵到個好靜嘅地方之後先打返去，原來老婆想幫個仔報唔知咩補習班。
雖然我同老婆同年，不過我哋35歲先生小朋友，個仔而家仲係學生，換轉係以前我一定叫佢放心報，但係當時我話：「睇定啲先啦，學校都咁多功課，又見佢keep住要喺網上上堂，再叫佢去補習會唔會多得滯呀？」
呢種扮返工嘅生活我只係過咗一個禮拜就頂唔順，兩夫妻或者一家人始終都係坦白啲好，何況我真係對於搵工唔樂觀，點知老婆話佢feel到。
我：「點feel到㗎？」
「你唔知女人嘅直覺好靈㗎咩，一早覺得你有唔妥啦，以前話畀個仔補習，你一定諗都唔諗就話好，唔緊要啦，工可以慢慢搵，唔好畀咁大壓力自己，有粥食粥，有飯食飯囉！」
做咗咁多年嘢，我當然有積蓄，不過亦有層樓供緊，頭一兩個月失業未算好驚，第三四個月仲失業，開始有啲不安，第五六個月仍然未搵到嘢做，而且係見唔到曙光嗰隻，我成個人都開始慌，只係見到老婆同個仔都不斷為生活開源節流，而且從無半句怨言，明顯係唔想我有壓力，所以每當望住佢兩個，我就會覺得歲月靜好，最緊要有佢兩個喺度。
我開始唔再執著於要搵返之前嗰行，唔再拘泥於要返office工，唔再介意係咪朝九晚六，因而搵工嘅大方向都唔同咗，我去咗做步兵（送外賣），另外仲喺便利店搵咗份part-time，期間有keep住send CV出去，最緊要唔好守株待兔。
離開咗舊公司，原來我甚麼都不是，但係唔緊要，有手有腳肯做，唔會餓死嘅。
雖然見工機會好少，不過都有兩份有回音，其中一份我去interview嘅時候，對方咁樣問我：「你年紀都唔細喎，你認為自己有咩係優勝過後生仔呢？點解我哋公司要請一個50歲嘅人，唔請一個20幾歲有活力嘅求職者？」
佢嘅問題令我費解，首先你見到我份CV嘅時候，唔係已經知道我大約幾多歲咩，雖然冇直接寫年紀，但你由我嘅畢業年份應該都計到啦！其次，我應徵嘅係senior position，就算其他candidate唔係50歲，要具備你要求嘅經驗，一定唔會係20幾歲後生仔，佢嘅質疑係冇邏輯可言。
我：「我認為我嘅經驗……」
都未講完，對方已經打斷我：「咪住先，你之前做manager，而家呢份唔係manager，你上面仲有人，點解你降咗格？係咪想做住先，之後搵到工就走？」
極之唔專業嘅HR，我之前做咩職位，CV真係寫得好清楚，點解會好似啱啱先發現呢？再者，係咪出面冇同級嘅空缺，我就一世唔使再搵工？你食開極品和牛，但而家好肚餓，係咪冇和牛就寧願唔食，寧願活生生餓死？
搵份對稱嘅工作，質疑你嘅年紀，搵個退一步嘅職位，懷疑你騎牛搵馬，後生嫌你冇經驗，有經驗又嫌你太老，人工叫得低質疑你有古怪，叫得高又話你獅子開大口，而家搵工就係咁樣？
後來又有一個interview，嗰個HR一開聲又係同類：「冇做嘢一年呀？你係冇搵工定係一直見工都冇人請？」
我：「因為interview唔多，我有一路做其他兼職。」
「咩兼職？」
我：「送外賣維持生計，我有keep住搵工。」
「What？你之前份工……然後走去送外賣？」
我：「有咩問題？要食飯就要工作。」
「冇問題，想像唔到啫，即係你足足一年都搵唔到文職full time？」
好一個不食人間煙火嘅HR，呢種人嘅價值觀真係好奇怪，定係市道差咗，好公司冇乜人走，請得人嘅都係呢類公司呢？
相隔一個月後，我又再有一次interview，個老細見到我年齡之後講粗口….. (未完待續）
Follow咗《辦公室日報》IG未呀？
https://www.instagram.com/officedailyhk/