公司個幾月前畀同事work from home，真係冇人再返去，我亦都拎晒電腦返屋企做嘢，但係有樣嘢好唔慣，因為喺office嘅時候會用電腦托架，斜斜地升高睇得舒服啲，嗰時忘記拎埋返屋企，搞到做嘢有啲攰，本身想買個新就算，不過見4月又要返公司，再買有啲浪費，所以趁住星期五要出港島買啲嘢順便上office 拎返。
棟商業大廈已經好少人，我估太多公司work from home，同層幾間都冇開燈，行到最尾就係我公司，咦，燈火通明嘅？唔通有同事返嚟做嘢？愈行愈接近office，聞到好鬼香，係韓燒嗰種味，但個感覺好違和，寫字樓嚟㗎喎！
我哋公司係撳密碼進入，喺門口聽到裡面好嘈，有個男人行咗出嚟，完全未見過。
男人：「你邊位？」
我：「我邊位？你邊位呀？」
然後終於有個識得嘅人行出嚟，呢個係我同事Joey，佢嚇到面容扭曲，其實講嚇親，會唔會係我驚啲呀？
Joey：「Catherine？你點解返嚟嘅？」
我：「你唔好講呢啲先，呢個男人邊個嚟？」
Joey同我講個男人係佢朋友，同時又向個男人解釋我係佢同事。
我都唔知發生緊咩事，唯有直接行埋自己位拎返個電腦托架先，跟住出現喺我眼前嘅景象就精彩喇，左手邊有條女玩緊VR，部電視我認得，係會議室嗰部，竟然搬咗出嚟打機！右手邊仲正，雖然有3條女停咗手冇動作，但係成個Bruno電熱爐喺度，出晒煙，食緊韓燒呀？我有冇睇錯呀？
已經無法整理我嘅思緒，眼前見到嘅嘢太荒謬，拎返個電腦托架離開先算，我頂你個肺，有兩盒雪花肥牛喺我個位嘅？虎你咩！喺我個位度解凍呀？
我：「喂，成灘水喎！點搞呀！」
Joey：「唔好意思唔好意思！即刻幫你抹返。」
我：「妖！你知唔知office有煙霧感應㗎？」
Joey：「我知，不過啲感應器唔係好敏感㗎咋，同埋我哋個爐唔會對正感應器下面。」
我：「你係咪傻㗎？而家成個Office都係燒烤味，你仲要將啲肥牛周圍擺。」
與此同時，畀我望到不遠處有幾個睡袋……
我：「你哋成班人唔係喺度瞓呀？咁離譜？」
Joey見我愈講愈扯火，佢班friend又停晒手望住，所以拉返我出去門口講：「唔好意思呀，咁你知而家周圍都唔開，見office冇人，咪趁星期五返嚟同佢哋Staycation囉，聽日我哋就走㗎喇，保證會清理現場，包保之後冇晒味。」
我：「Staycation？」
Joey：「可唔可以唔好同人講，特別係老細，唔該你吖！佢哋全部打晒兩針，嗰個男仔仲打齊三針，好安全㗎！」
唔係一針兩針三針嘅問題，work from home唔係騰空個Office畀你咁用㗎！我唔係企喺老細嗰邊，只係站於自己嘅立場，邊個想個工作環境畀人搞到烏煙瘴氣，我有件黑色冷外套掛咗喺張凳度，即刻返入去攞，一拎上手已經成浸燒肉味。
篤爆佢又好似做金手指，如果老細興師問罪，Joey實當我係仇人㗎啦，到時返工又會面左左，早知唔返嚟拎個電腦托架就冇咁眼冤，如果換轉係你又會點做吖？