我真係好後悔之前同個女同事拍拖，自問一齊嘅時候好認真，絕無玩弄感情嘅成份，典型嘅因了解而分開，但我估唔到佢竟然周圍同人講，令到成件事好尷尬，好在最近唔使返公司，否則未必頂得順咁多閒言閒語。
呢段感情大約維持咗半年，都算低調，最初喺office裡面知道嘅人並唔多，冇諗過分手之後反而街知巷聞，老細同上司都分別捉我入房傾計，咩事呀？拍個拖啫，又唔係做錯事，更何況分手冇涉及金錢或者第三者㗎喎，點解要搞成咁呢？
分手後大約兩星期，當時已經覺得有啲同事望我嘅眼光好奇怪，直情見到隔籬team有一堆人望住我細聲講大聲笑，個感覺好唔舒服，某日仲有一個女同事無厘頭行埋去我個位前面丟低句：「真係估唔到，唉！」
佢講嘢無頭無尾，我就問：「估唔到咩？」
女同事：「冇嘢喇，唉！」
唉乜春嘢啫你，痴線！有嘢就講啦！
然後入pantry又有另一個同事九唔搭八行埋嚟拍一拍我膊頭，再望一望我，一句嘢都唔講就走咗，喂你哋成班係咪有病呀？可唔可以正常少少？
嗰陣時我仲未諗到係關分手事，因為講到尾段感情入面冇話邊個負邊個，算係和平分手，即使分開嘅時候亦冇大吵大鬧，直至有個比較熟少少嘅男同事Jacky走嚟同我講：「點呀？你冇事吖嘛？」
我：「有咩事？你知啲咩呀？最近公司啲人好似怪怪地。」
Jacky：「Zoe噚日搵過我哋傾計，佢話同你分咗手。」
我：「搵你傾？佢平時同你冇兩句㗎喎！」
Jacky：「噚日我哋條Team嗌咗外賣，我同Karen, Macy, 仲有Billy喺meeting room食飯，Zoe走咗入嚟講，佢好似好唔開心喎！」
我：「嘩，分手啫，唔使周圍同人講呀？」
Jacky：「不過應該唔止我哋條Team知道，因為今朝去廁所撞到阿Roy同David佢哋都講緊。」
有冇需要搞到全世界都知呀？同日老細搵我入房，呢樣已經好奇怪，因為佢平時唔會理我呢種小角色，以為做錯嘢啦，點知佢劈頭就問：「點呀？同Zoe搞到好唔開心呀？」
我一時都反應唔切，然後老細繼續講：「我知道你哋嘅事喇，點都好，唔好搞到面左左影響工作就得喇，辦公室戀情好小事㗎啫，我哋公司都有幾pair人喺度識喺度結婚㗎！」
雖然唔知老細想表達啲乜，但係分手分到連老細都知，我真係好唔自在，出返房就輪到我上司，佢仲緊張，又捉我入房再傾過，內容都係差唔多，其實咩事咁大不了先？我搞到公司冇咗單大生意咩？
忍唔住搵返Zoe傾，我問點解要周圍同人講，搞到所有人嘅目光同說話都好奇怪，連老細同我上司都走嚟加把嘴畀意見，有冇咁嘅需要呀？
Zoe：「我唔開心同人傾都唔得呀？」
我：「唔開心搵人傾可以，唔係要管你，但點解個個都好似覺得我對唔住你咁，拍拖分手係兩個人嘅事，我又冇爭你錢，而家又唔係同第二個一齊。」
Zoe：「咁又點呀？」
我：「冇咩點，只係見你連Jacky都講，你平時同佢都冇兩句，你知唔知我好尷尬㗎？老細都捉我去傾。」
Zoe：「我冇同Jacky講喎，我同Karen講之嘛！」
其實Jacky已經講咗，佢係同Karen, Macy, 仲有Billy喺meeting room食飯嗰陣，Zoe走咗入去當住咁多人面前呻，但我冇篤爆佢，亦冇去追究點解連老細都知，因為我好怕佢，呢個亦係分手嘅主要原因，如果再引發起更多爭拗，件事只會愈嚟愈複雜。
個人覺得辦公室戀情並冇咩唔妥，講真你喺公司咁多個鐘，同事間日久生情係好平常，關鍵只係我唔識揀人，不過就算搞到全office都知，我一樣唔後悔，再同呢個人一齊只會後患無窮，好在呢期WFH，暫時唔使再理其他同事嘅眼光同說話，希望過一排會丟淡啦！