見工撞正奇怪問題 答錯即刻冇得留低

早幾日見咗份工有啲意難平,間車行負責interview個阿叔manager問我:「賣一部車10萬,假設有個客入嚟買10部,咁即係收幾多錢?」

我當時已經知道唔係1加1等於2咁簡單,所以就問佢:「10部咩車先?部部車都唔同價錢。」

阿叔manager:「唔好理啦,總之10部同款,每部都係10萬。」

我:「咁咪100萬囉,加減乘除,10萬乘10部。」

阿叔manager:「錯!」

我:「因為買10部有折扣?」

阿叔manager:「梗係唔係啦!你覺得個客入嚟買10部車,公司淨係賺到10部車嘅收入咩?10部車唔使買其他配件?唔使top up其他service?買得10部車就證明對方有購買能力,你點可以就咁放佢走?」

我:「咁我其實係因應返你個問題而答,頭先個題目又冇咁多前設。」

阿叔manager:「後生仔,你呢啲咪唔識變通囉!我好似你呢個年紀嗰陣,入行第一個月已經係top sales……」(下刪超過5分鐘自吹自擂)

可能佢見我冇乜表情,靜止咗片刻之後就講:「如果你唔夠進取,點解公司要嘥資源去請你?今日到此為止。」

我唔知你覺得佢有冇道理,但我當時個心真係唔舒服,呢種咁嘅奇怪問題,其實可以有100萬個答案,就算我答到可以top up其他service,佢一樣可以質疑我計少咗呢樣,賺少咗嗰樣,甚至呢架車10萬,點解唔對住個大豪客sell架20萬、30萬、40萬嘅車?

當然,呢啲情境題預咗唔係1加1等於2,不過你冇前設,無論範圍同埋讀解都可以不斷放大,不斷延伸,我都幾肯定自己講咩答案都係錯,重點應該係個阿叔要表達「入行第一個月已經係top sales」嘅威水史。

公司對員工有期望係好正常,但係員工唔係老闆或者上司心裡面條蟲,有要求應該講出嚟再一齊諗辦法去達標,而唔係要員工估你有咩目標,然後瞎子摸象咁樣猜猜猜,呢度已經浪費好多時間,唔止講緊Sales工作,任何工作都一樣,你係我條女咩?要估你鍾意食乜,估你鍾意咩禮物咁呀?了解埋你幾時嚟月經好冇?

再者,你請個Sales返嚟,係想佢講到自己sell到嘢,定係想呢個人真係sell到嘢?兩件事嚟㗎喎!

我唔知阿叔manager嘅面試問題喺之前打沉咗幾多個求職者,我淨係覺得問呢啲問題唔代表會請到一個幫到公司嘅人,唔係因為佢唔請我先至咁講。

投稿讀者:神算軒

error: