未來奶奶叫準新抱諗清楚先嫁

如果唔係疫情嘅關係,我朋友應該同佢條仔結咗婚㗎喇,而家一改再改,可能要去到2021年中。

戒指買咗,婚紗相未影,酒席揀緊,一切如箭在弦,偏偏早兩個星期,當佢上去男朋友屋企嘅時候,未來奶奶同佢講咗啲嘢。

「男朋友當時落街買啤酒,留低我同未來奶奶喺屋度,我哋兩個喺廚房準備晚餐,本身冇乜嘢,但係未來奶奶忽然語重心長咁叫我考慮清楚,唔想我結咗婚先嚟後悔。」

我:「嗰個佢個仔嚟㗎喎,你肯定…係親生。」

「未來奶奶唔係刻意抹黑個仔,同埋佢講嘅嘢部分我feel到,唔似生安白造害個仔。」

原來佢男朋友好鍾意賭波賭馬,出面爭唔少街數,另外沉迷杯中物,有時飲完酒返嚟會發酒瘟,講晒粗口連阿爸阿媽都鬧,會打爛晒啲嘢,試過出手打未來老爺。

我:「咁佢有冇打過你?」

「咁又冇,佢飲酒嘅時候通常唔會同我出街,所以發酒瘟我就冇親眼見過,不過賭波賭馬就見過,星期三跑夜馬佢好少約我,星期六日有波有馬就明顯啲,出街會心不在焉,我都見過佢上馬會個網,會好似病態咁不斷拎部電話出嚟睇比數睇賽果,至於周身債就冇同我提過,但唔夠錢使就幾明顯。」

我:「你同未來奶奶平時關係點㗎?當我小人之心,諗得全面啲,會唔會係未來奶奶唔鍾意你做佢新抱,想攔一攔你哋結婚?」

「我都有咁諗過,不過我同未來奶奶一直相處都冇乜問題,當然我哋唔係經常有機會單獨相處啦,大約一個月會上男友屋企食一次飯,另外一個月飲一次茶左右,大時大節或者父親節母親節都會出街食,其實間屋得我同未來奶奶兩個人,今次真係第一次,我完全冇心理準備佢會同我講呢啲嘢。」

我:「其實未來奶奶咁樣同你講,個結論係咩?」

「冇結論,佢只係講一件事出嚟,叫我考慮清楚先,始終我唔係同佢個仔一齊住,好多嘢睇唔到,未來奶奶話驚我第日後悔,終有一日會怨佢。」

雖然我係一個dating consultant,但真係未聽過未來奶奶私底下叫準新抱諗清楚先好嫁,莫講話畀唔到意見,當中有幾樣嘢我都諗唔通:

1)雖然肯咁樣講出嚟係好事,但嗰個始終係自己個仔,應該冇幾多個阿媽會喺未來新抱面前咁坦白,真係咁無私?

2)唔知我朋友同未來奶奶嘅最真實關係點樣,你知啦,有時啲奶奶都會雙面人,我唔排除係唔鍾意個新抱,所以特登放風叫我朋友知難而退。

3)始終係我朋友,我做唔出叫佢咩都唔好理,一於如期結婚,如果未來奶奶所講都係真事,我會累死朋友,但係叫佢唔好嫁咩?假設係圈套,我又好似粉碎咗朋友嘅未來。

最後我再問朋友多一件事:「你有冇打算直接問你男友求證?」

「點問呀?即係直接擺未來奶奶上枱,如果佢真係唔想我嫁咗佢個仔先後悔,我冇理由出賣未來奶奶。」

我:「未來奶奶有冇叮囑你唔好同佢個仔講?」

「就係冇,但我亦都唔會咁做。你覺得我應該點好?信唔信未來奶奶好?」

Sorry,我毫無頭緒,問准咗朋友post唔post得,不如大家集思廣益,中立地畀啲意見。

error: