雖然話寧教人打仔，莫教人分妻，不過同事Sonia拍拖已經嚴重影響到我，而其實佢自己都應該好辛苦，乜兩個人一齊真係要搞到對方窒息先至安樂㗎咩？
Sonia同我同team，大家亦都係lunch嘅飯腳，開頭出去食晏佢係咁捉住我selfie，食好西，靚環境，又或者米芝蓮就話啫，去嗰啲一張圓枱嘅細舖食碗雲吞麵牛雜河都要selfie？唔好忘記大部分食肆已經加咗透明隔板，影出嚟都唔慌靚啦！同埋食碗麵啫，使唔使星期一至五都拉埋我自拍呀？你係明星定KOL？
後來得知Sonia日日selfie唔係為咗post Facebook或者post IG，而係要嚟send畀男朋友交差，佢另一半要知道Sonia冇同其他男同事單獨食lunch，你條仔咩事呀？控制狂呀？
「其實咁樣有意思咩？」
Sonia：「冇辦法啦！佢疑心好重。」
「咁你唔一定要答應㗎，除非你enjoy畀人管啫！」
Sonia：「佢好煩㗎，一陣又為咗呢啲嘢嘈，之後我自拍影到你喺旁邊就ok，你可以繼續食嘢，唔使望鏡頭都得㗎。」
「我介唔介意好小事，反而係你應該要介意，拍拖唔使拍到咁辛苦喎。」
Sonia：「咁男朋友平時都好錫我嘅，佢成日話驚人搶走我，覺得冇安全感。」
得罪講句，你個lunch同女仔食又代表啲咩？由9點鐘踏入公司大門一刻開始，office已經有其他男同事存在啦，正如啲防疫措施一樣，乜病毒淨係晚市先出現㗎？乜溝女淨係lunch time先可以溝㗎？真係有心溝你條女，去pantry斟杯水都可以搭訕，拎個電話號碼已經可以任何時候WhatsApp，你不如鎖住條女唔畀佢返工咪仲好，再唔係你養佢，唔使佢返工囉！
唔知有冇人好似我一樣，唔係咁鍾意影相，我自己啲社交平台都係post下貓貓狗狗同風景，人人性格唔同，你要我日日陪你合照selfie真係好老土，話就話我可以繼續食嘢唔望鏡頭啫，但有邊個想畀人影住個食相呀？我想食餐安樂飯啫。
同team仲有另一個女仔Amy會間唔中一齊食，佢同我一樣初初冇乜所謂，後尾發覺食咩都要影一餐，有時太多嘢做叫外賣返公司，三條女打開三盒叉雞飯都要舉起V字手勢望鏡頭，笑容又僵硬，究竟我哋喺度做緊咩呀？
要女朋友每日食lunch打卡報到係冇用㗎，唔通我哋幾個做滅絕師太唔同異性接觸呀？所以間唔中都會有男同事join埋食飯，咁點算？Sonia會直接叫個男同事唔好入鏡，成件事又怪雞又尷尬。
Sonia嘅男朋友亦冇因為每日有selfie相而放下戒心，相反地仲愈嚟愈痴身，明知條女食緊飯都要打嚟傾電話，所以我同Sonia有時雖然同枱食飯，但就好似各自修行，佢全程煲電話粥，我全程自己食，陌路人咁勁無癮。
男又好女又好，情侶間想要有安全感，唔應該限制另一半嘅人身自由，你要求對方不斷自拍證明身邊冇異性係非常幼稚嘅行為，個人覺得呢種係冇自信嘅表現，如果你覺得自己唔夠好，冇條件去留住另一半，怕其他異性可以輕而易舉搶走心愛嘅人，咁首要嘅任務應該係自我提升，而唔係管束人哋。
不過Sonia都應該好好思考下，人生係咪要活得好似扯線公仔一樣呢？之後唔做呢份工，去到第二間公司又係咪日日食lunch捉住同事selfie呢？同一個控制欲咁強，又完全冇自信嘅男人一齊，真係會開心咩？
希望Sonia男朋友睇到呢篇文章，有幾句說話想同佢講：「冇女仔永遠20歲，但永遠有20歲嘅女仔，所以，你擔心啲咩呢？」再講得白啲，冇安全感係因為你覺得自己冇實力，不如將管束女朋友嘅時間用嚟增值，或者努力啲工作，呢個先係留住另一半最有效嘅方法，就算呢一刻留唔住Sonia，你有料自然會吸引到另一個女仔㗎啦！