阿叔同班村民得悉收地消息之後好興奮，因為住緊嘅屋根本唔值錢，莫講話轉售圖利，嗰啲地方就連放租都無人問津，畀你租到出去，租金頂盡係千幾蚊人仔，發達？咩嚟㗎？
不過當時唔同，政府要買嘅係嗰條村嘅地段，起鐵路同車站閒閒地講緊唔知幾多億嘅基建，有村民甚至覺得每戶只係賠百幾萬太少，想盡辦法希望可以爭取更高嘅金額。
一邊爭取，一邊預演化身百萬富翁後嘅生活，阿叔計劃好嚟香港入貨，又諗賣衫又諗賣藥，打算搬去廣州居住兼開舖，我果然冇記錯，細細個佢真係嚟咗香港一次，買到一袋二袋再踎喺路邊食煙，原來就係為咗探路大展拳腳。
聽老豆講，阿叔當年特登嚟香港訂造咗幾套西裝，話要著住傾生意，另外仲買咗兩部車。
我：「嫲嫲識揸車㗎咩？鄉下唔係得佢兩個咩？」
老豆：「你阿叔話一部車唔夠派頭喎，要兩部唔同色，唔同場合揸。」
我：「使唔使咁浮誇呀？」
阿媽：「你呢個阿叔唔算浮誇喇，鄉下有個人一口氣買咗三架私家車同埋兩架電單車。」
一夜暴富果然出手都闊綽啲。
老豆：「你阿叔周圍叫人介紹女人，想娶老婆喎，後來佢喺東莞定唔知深圳識咗個站街女，返去同你阿嫲講要結婚。」
我：「咩叫站街女？」
老豆：「即係企街呀！以前有冇去過澳門葡京酒店呀？沙圈嗰啲呀！」
我：「沙圈唔係喺馬場咩？馬場喺葡京酒店咩？」
老豆：「即係形容啲企街圍住喺葡京酒店賭場出面，然後啲男人好似沙圈睇馬咁樣揀，嗰啲女人仲會一路跟住你，一路用普通話問Qù Bù Qù？Qù Bù Qù？(普通話發音即係『去不去』）你阿叔就係識咗個咁嘅女人話要結婚，不過唔係喺澳門，好似係深圳沙咀定唔知東莞。」
阿媽：「你咁熟嘅？咁你嗰陣答啲女人Qù Bù Qù呀？」
老豆：「我聽朋友講，我邊有錢Qù呀 ！」
我：「一定信你冇Qù啦老豆！ 咁阿叔咪好似李察基爾同茱莉亞羅拔絲嗰套經典《風月俏佳人》一樣囉！有錢佬愛上風塵女子，再救佢出火坑。」
老豆：「救咩啫！有咩錢呀？你阿叔根本一毫子都冇！」
原來收地一事搞咗兩年之後擱置，因為基建單嘢唔知咩政策變咗，換言之所有嘢冇發生過，符合國情吖，大陸最鍾意就係朝令夕改，問題係成班村民當年知道有收地賠償後變晒土豪，買車買金撈買電器，阿叔仲去廣州租舖兼娶埋個女人，褲都除埋你先話政府改變主意唔收地？
我：「咪住先，咁阿叔一早買咗兩架車，啲錢邊度嚟？」
阿媽：「全部問親戚借，仲有啲係問國內地下錢莊借。」
我：「好大鑊喎！先使未來錢，最後點收科？」
老豆：「咪我同佢收科囉！雞毛鴨血呀！你阿叔走咗佬，最慘係丟低你阿嫲，啲親戚全部上門追債，弟債母還，仲有啲大耳窿呢！打嚟香港搵我唔緊要，喺鄉下殺上門鬧阿嫲先最慘，我可以唔理咩？乜都冇做過，轉頭成身債！」
阿媽：「你唔記得我哋以前幾窮咩，我同老豆各自打兩份工幫你阿叔還債，垃圾房嗰份工呢，你跟我返過㗎，喺垃圾房做功課你記唔記得？」
梗係記得啦！簡直係悲慘童年，小學一二年級嗰陣，由於兩老忙於搵食，又唔放心我一個小朋友留喺屋企，所以佢哋有時會帶埋我返工，唔係返office工，印象中同老豆出過去搬貨，我坐喺車度，睇住佢將一袋又一袋好重嘅嘢托上膊頭（已經唔記得佢係搬咩），行幾廿級樓梯送去舖頭。
我啲校服全部係隔籬屋唔記得邊個師奶個仔著過嘅二手衫，全部衣不稱身，啲衣領袖口全部有黃色嘅漬，後來我阿媽喺屋企附近做清潔工收垃圾，我拎埋功課去垃圾房做，隔咗咁多年仲記得個環境勁臭，加上屋企同小學係同一個公共屋邨，有同學仔見到我成日跟住阿媽收垃圾，返學校仲聯群結黨笑我，日日話我污糟，真係校園欺凌。
父母已經好努力做嘢，但有時我哋一家仲係會食唔飽，娛樂等等活動就唔好講啦，嗰陣唔知咁多嘢，只係知道自己屋企同埋自身條件差過好多人，慢慢地出現咗自卑嘅性格，雖然中學後生活有改善，不過自我形象依然好低，日常生活中好多嘢都覺得冇資格爭取，所以童年嘅成長經歷真係會影響一個人好深遠。
因為喺香港嘅日子太苦，老豆曾經諗住返大陸生活，買咗個樓花，結果又爛尾，唉，爛尾樓喺大陸經常出現，特色嚟㗎嘛，做咩咁蠢呀？
講完舊史講返而家，老豆又再一次警告我唔好做國企：「寧願你搵少啲，呢啲公司冇一間係無辜。」
阿叔欠巨債走佬之後人間蒸發，當年聽過老豆同佢喺電話嘈交，之後都唔敢問太多，原來阿嫲過身嘅時候亦都走得好孤獨，唔單止搵唔到阿叔，連班親戚都因為舊債問題搞到反晒面冇出席，好好地一頭家散晒，真係好唏噓，又難怪我老豆聽到同大陸有關嘅嘢都會動真火。
無論關鍵係阿叔為人有問題，定係嗰啲國家政策同埋爛尾樓都好，總之我老豆對呢一切都好失望同反感，不過放心啦，我唔會返嗰間國企，慢慢再搵囉，相信新年後會多啲工選擇，希望係咁。（完）
《辦公室日報》IG出咗新Filter「一日食到黑」，有時間影低你食咗咩好西或者頹飯啦，我會每日upload上IG Story㗎！
https://www.instagram.com/officedailyhk/