未返工先遇圍封 老細叫新同事WFH

有個即將入職嘅新人主動打嚟公司搵我:「你好呀,我叫Albert,個幾月前嚟見工,你哋出咗offer㗎喇,本來聽日返工嘅,但因為我住緊嗰度要圍封幾日,請問可以點做?」

呢個本身應該問袁國勇同政府嘅問題,落咗去任職HR嘅我身上,答應轉頭覆佢嘅同時,即刻摷返張form嚟睇,哦,原來住葵涌邨,記得佢interview嗰陣仲話我哋公司喺新都會廣場所以好近。

欣賞Albert咁有交帶(雖然唔交帶都唔得),同埋慶幸佢本身份工辭職要兩個月通知,如果唔係咁,Albert可能已經返咗工,而我哋公司全體同事亦要迫住去強檢。

Albert冇可能聽日返工㗎喇,原則上當然保留offer啦,始終圍封嘅事佢都唔想,不過我喺程序上要請示老細先,費事自把自為啦,本來以為會有阻力㗎,因為老細份人好驚青,自從袁國勇建議戴兩個口罩之後,條友仔真係日日打孖上,幾驚佢未中Omicron之前已經缺氧。

老細話ok,offer照舊,亦都唔使押後,聽日準時返新---Work from home喎!之後亦唔使急於返office,因為公司本身係2月10號(年初十)先至復工,Albert聽完之後好感激,仲叫我幫忙向老細轉達一聲多謝,強調WFH都一定會畀心機,呢個小朋友真係有禮貌又可愛,其實老細邊有想像中咁好吖。

我同老細嘅真實對話:

「有個新同事本來聽日返工,但佢住葵涌邨,即係圍封緊,叫佢圍封完先返工好冇?」

老細:「傻㗎你!圍封完都唔好返啦!」

「咁佢圍封期間日日要強檢,安全過我哋呢度每一個同事啦,隨時我同你先有Omicron添呀!」

老細:「我唔理,你哋有Omicron又好,Delta又好,我唔想知,唔想入竹篙灣過年。」

「咁一係再穩陣啲,叫新同事初十先返。」

老細:「你而家即刻請返個唔得咩?」

「邊度趕得切呀?我哋好好彩㗎喇,佢係個幾月前嚟in,仲要主動打嚟講晒成件事。」

老細:「咁一係搵人教佢做嘢先,電話又好視像教又好,教得幾多就幾多啦,佢識用excel㗎嘛?總之你叫佢work from home,過咗年肯定冇事先好返嚟公司。」

所以呢,老細由得新同事WFH,出發點都係為自己,佢唔想成班同事喺竹篙灣收爐,更加唔想喺入面拜年講恭喜發財,你估老細咁偉大咩!不過點都好,最緊要係Albert唔會因為圍封件事而冇咗份工,始終佢係特登辭職過嚟,圍封已經夠慘,如果新年流流仲要畀人收返個offer,咁就真係太不幸喇。

最好笑係老細自己愈諗愈淆底,捉我入房又傾多轉:

老細:「唔係喎,諗諗下公司隨時有隱形傳播鏈,分分鐘危險過葵涌邨。」

「其實係㗎,斷估你唔會迫全公司去檢查啩!」

老細:「一陣驗到咪仲戇居?都話唔想入竹篙灣過年。」

「咁你叫我入嚟想傾咩?」

老細:「提早收爐啦,都係唔好,照做嘢,不過home office,我聽日開始都work from home,你幫我出封email同全世界講。」

梗係好啦!出完封email之後成間公司嘅同事都好開心,起碼喺屋企唔使戴住口罩做人,老細仲話考慮緊初十繼續home office,可能初十五先正式返公司。

其實要完全零確診暫時好渺茫,你當佢係傷風感冒同病毒共存仲好啦,完咗Delta又Omicron,Omicron未完又Delta變種再變種,全世界都聽到冇晒感覺,之前仲話打科興原來抵抗唔到Omicron,咁打咗嘅人即係白捱兩針?啲措施又唔夠人性化,市民去驗要排長龍,嗰條蛇餅咁多人咁密,本身冇事都感染到有啦!

Albert呢個例子算好彩,相信出面有啲公司如果未簽約隨時turn down offer,我仲聽講有啲無良老細會迫同事放無薪假,究竟幾時先有好日子過呀!

error: