出嚟做咗十幾年嘢，試問有咩老闆同上司未跟過吖，肯教你嘅人遇過，㩒住唔畀你上位嘅遇過，離開公司仲做到朋友嘅又遇過，遞信辭職就日日比面色你睇嘅都有。
整體嚟講覺得自己好幸運，特別係當年有個老闆影響我好深，嗰份工做咗4年，好開心好似一家人，蚊型公司但係學到好多嘢，連續4年生日都收到老闆嘅利是，銀碼唔多，但好感激佢嘅心意，收到嗰下真係好warm㗎！
後來我要結婚，人生進入另一個階段，要養老婆要供樓，適逢有個headhunt搵我轉工，除咗份糧多咗超過30%之外，Medical個package仲cover埋family，大公司同細公司的確有差別。
嗰陣我31歲，諗法比起後生嘅時候實際咗，思前想後終於決定向老闆提出辭職，雖然好難開口，亦真係唔捨得，但人生點都要經歷呢啲時刻。
遞上辭職信嘅時候，老闆問咗句：「係咪做得唔開心先？」
我：「梗係唔係啦，喺呢度嘅幾年都好開心。」
老闆：「咁肯定係另一份嘅人工比較吸引啦！」
我：「……」
想承認，因為係事實，又唔想承認，因為覺得自己好功利，點知老闆安慰返我：「其實一個人可以搏殺嘅黃金年齡係有限，有好路數我唔會阻下屬發達嘅，咁我而家請個人返嚟，你臨走前盡量教識佢得唔得先？」
我：「絕對冇問題！就算個新人之後有嘢唔明，隨時打畀我問都得。」自己提出係因為心存感激，同埋我好了解呢個老闆唔會得寸進尺。
隔咗咁多年，我而家已經四張嘢，做到senior management，目前間公司好大好出名，不過好多department都有種奇怪嘅文化，就係每逢有同事辭職都會被留難，一係就遲遲唔出reference letter畀人；一係就軟硬兼施要個員工重新考慮留低，總之拖得就拖；有啲line manager仲會特登玩嘢留難個下屬。我慶幸自己條team 3年內只係走咗兩個人，相對上好穩定。
走咗嗰兩個下屬，其中一個係上個月向我遞信辭職，其實佢好幫得手，而且比我後生時勇敢，直接講咗自己喺出面搵到份人工更高，福利更好，地點又更加近屋企嘅新工，唔止basic salary多咗，仲有14個月糧，大假多咗5日，將心比己，有咁嘅offer我都可能會走。
而家公司個老闆知道後好嬲，直情捉我入房照肺，埋怨我咁順攤畀個下屬走，最起碼都要留到我哋請到人。
「咁佢份新job係一個月後返工，我又唔知幾時先請到人，冇得咁㗎喎，正路遞信嗰日計。」
老闆：「咁你咪留佢囉，做生不如做熟，你同佢講唔好淨係睇錢吖嘛，佢喺度做多幾年都一樣會加。」
「但佢而家轉工係即時加喎！」
老闆：「加幾多吖？」
「聽佢講都加咗接近20%左右㗎！」
老闆：「都話唔係下下睇錢，仲要睇公司規模，加埋其他福利，淨係睇帳面咩！」
「佢去邊間我就唔知，不過除咗basic salary加咗，仲有14個月糧，或者你會唔會加佢人工吖，如果係，我試下同佢傾。」
老闆：「就算加唔到都要落力留佢㗎！」
「如果我哋畀到梗係留啦，但畀唔到一樣嘅offer，有好路數點解要阻人發達呢？」
其實唔係想頂撞而家呢個老闆，我都係講事實啫，你唔忿氣又好，嬲我又好，覺得我呢個manager無能都好，舊老闆以前講嗰句好啱㗎，一個人可以搏殺嘅黃金年齡係有限，唔好阻人啦！唔通要求每個員工講心唔講金咩？衣食住行樣樣都係錢，你搭車可唔可以同司機講心，食飯可唔可以同餐廳講心，買樓可唔可以同地產發展商講心？
我相信每個人選擇辭職都有自己嘅理由，你估搵工見工再適應新環境好好玩咩，問咗個下屬係咪唔開心，或者人工有冇得傾，咁就已經好足夠啦，與其處處為難由工作夥伴變成仇人，不如大方祝福對方有更好嘅發展。
投稿讀者：Ben