賊船 下 – 幫幾間公司請人 空缺超過120份

人工由$26,000跳到$38,000,我懷住興奮嘅心情返工都係情理之內吖,Ashley仲同我食Welcome Lunch,成個氣氛非常歡欣,當日仲畀我落場同candidate做interview添,輕輕鬆鬆鄧梓峰,咁又6點鐘收工。

第二日開始自己落手落腳,見到公司大約有廿幾個空缺,不過每個post都in咗人,全部等緊Department Head回覆,諗住冇乜嘢啦,點知Sales Team個阿頭行入嚟大吵大鬧。

「喂,你哋人事部幾時請返兩個Sales畀我呀?」

我:「唔好意思,我啱啱接手,Ashley好似話有幾個candidate見完等緊你覆。」

「我唔理你哋邊個接手啦,咪講咗上次嗰幾個求職者唔啱囉!」

我:「得得得,等我睇下先,盡快畀CV你。」

一場同事使唔使咁嘅態度呀?算,我本身份糧得二萬幾蚊,而家有$38,000喎,辛苦啲都抵既,忍你!

好似有躁狂症嘅Sales Team阿頭走咗之後,跟我嗰位妹妹仔Zera就話:「呢兩個Sales位請咗成年喇,我諗見咗100個人,佢冇一個滿意。」

我:「咁大鑊?」

其實未算大鑊,因為同日有客戶服務部嗰邊嘅同事辭職,會計部又有人辭職,而原來另外仲有兩個部門都有同事last day,空缺由廿幾個突破30大關。

我同Zera講:「呢度啲人轉工都幾密下㗎喎!」

Zera:「呢排冇咁密喇,平均每日都有人走㗎!」

我:「咁樣樣……我見Ashley噚日都係收6點,仲以為冇想像中咁忙添!」

Zera:「噚日我都係第一次見Ashley 6點走,可能係last day啦!」

唔係喎,聽聽下唔多對路,好似係Ashley嘅天仙局喎!

Zera冇講錯,做落真係發覺每日都有人走,其實空缺多唔係問題,最多咪出job ad請人囉,但原來係好難請得返㗎!因為班Department Head個個都變態,典型「畀得百二蚊,又要李嘉欣」,以Sales Representative呢個position為例,個阿頭嘅要求係靚仔或者靚女,英文要好talk得,冇港式口音既,加上唔介意無限OT,底薪得$15,000,雖然有佣金,不過target set到好高,肯做嘅唔夠靚 ,靚嘅唔肯做,唔怪得請咗成年都搵唔到人啦!

記得Ashley當時話OT係一時時,做晒啲嘢就走得,諗返起真係覺得自己好傻,點為之做晒啲嘢?幾廿個空缺完全fill唔到,每日平均見7至8個candidate,仲要整理返啲資料同KPI,頭一個月我每晚最少做到8點,有幾晚直情係9點幾,對住Zera仲多過對住我老母。

講起老母,有日返工我畀個叫Edwin嘅candidate小老母,佢打嚟我直線破口大罵:「#$@! % 你哋係咪CLS㗎!」

我:「發生咩事?」

「咪講咗我而家份工未quit囉,你又未請我,有乜理由做reference check呀?驚動埋我公司!#$@! % !」

我:「咪住先Edwin,我冇做reference check喎,唔止冇contact你而家公司,連你之前嗰幾份工都冇contact佢哋喎!」

「咪L扮啦,係上次見我嗰個manager搵我現任上司㗎!佢問我份人係點,平時工作係點,我冇授權你哋可以搵我上司喎,#$@! % !」

硬食一棍之後,我終於搞清楚件事,原來Sales Team個躁狂症阿頭私下contact求職者現任公司個上司,咁L賤格都做得出既!去Sales Team搵佢理論嗰陣,呢條躁狂症仲理直氣壯:「我呢啲唔係叫reference check喎,我識佢上司既,大家同行,一早識啦,佢上司以前同我做過同事。」

我:「唔理你哋以前係咪同事吖,但係個candidate唔想畀而家個上司知佢搵緊工㗎嘛,你害死佢㗎!」

躁狂症:「害咩死啫?都話我同佢上司本身係識,我當朋友傾計咁問下啫,你買嘢都會問朋友意見啦係咪呀!」

仆街嚟講,呢條友都算典範,不過仲有個終極大佬,冇錯!就係我老細。

就好似Ashley當日所講,老細外面仲有生意,會搵我哋人事部幫佢請人,不過Ashley冇講到重點,原來老細出面有幾壇生意,一間同人設計禮品嘅公司、一間批發咖啡豆嘅公司、一間cafe,仲有一間同佢老婆夾份做嘅美容中心。

業務全部九唔搭八,不過呢幾間公司都有一個共通點,就係流失率好高,啲員工好似走馬燈咁轉,平時Zera就係主力幫佢請cafe侍應同埋美容中心啲女仔,永遠都請唔完,我好認真咁計過,包括我而家做緊呢度,以上咁多間公司嘅空缺加埋超過120份。

好戲在後頭,有一日老細行嚟人事部叫我幫手請個鐘點……

我:「即係清潔姐姐?For你邊間公司?」

老細:「我屋企呀!」

我:「出面有好多鐘點agency,我一陣幫你睇下吖。」

老細:「我唔要出面agency嗰啲呀,試過幾個都唔好,做嘢好求其,塵又抹唔乾淨,餸又煮得唔好食,你幫我另外搵吖!」

我:「會唔會考慮請菲傭?」

老細:「我唔鍾意有個人住喺屋企,鐘點做完就走吖嘛,你in嘅時候睇埋佢老唔老實,我最怕啲人手腳唔乾淨,你覺得Ok再叫埋我見。」

老細屋企請鐘點都搵我In,搞唔掂喎!淨係手頭上嗰百幾個空缺已經搞到我晚晚OT,而且愈嚟愈夜,仲要面對一班變態嘅Department Head,個個欲求不滿,唔係喇,反正我而家嘅salary已經係$38,000,拎住呢個價出去再搵啦,呢幾個月身體好差,精神壓力又大,連經期都亂晒,思前想後決定遞信,生命無價呀!

屋企人搞生意要幫手、身體有啲唔舒服、想讀書、有新offer……究竟用邊個藉口resign好呢?似乎每個都唔妥當喎!第二日返到公司鼓起勇氣走入老細房。

我:「唔好意思呀,我想辭職。」

老細:「辭咩職呀?人工唔滿意?」

我:「唔係呀,屋企人移民,估唔到搞得成。」

老細:「又移民!Ashley又移民,你又移民?」

仆街喇,唔記得咗Ashley都係移民添!

我:「唔同,Ashley好似去英國,我去澳洲。」

老細:「你可唔可以請晒啲人先走呀?我個鐘點呢?另外Sales Team嗰邊同我詐型,話你一直幫唔到佢請Sales喎!」

我:「會同步進行㗎喇,繼續請Sales,繼續請鐘點,另外會請返個人代我,呀!有個candidate嚟咗要見,我出去interview先。」

老細:「咪住咪住,你有冇鐘點畀我見住先呀?我老婆催呀!」

終於明白當日Ashley點解咁慷慨,我expected salary明明叫$30,000,佢夾硬迫我收$38,000,明喇,明晒!

呢度人工雖然高過之前,但係工作量極之唔合理,而且每個部門都唔合作,管理又差,好多嘢朝令夕改,所以空缺係無窮無盡,唯一嘅解決方法其實係換晒啲Team Head,當然佢哋唔會咁做啦!

請人代替我嘅時候,我更加明白Ashley,expected salary填$35,000?傻豬,$38,000都得!咩話你填$28,000?梗係$38,000啦!What?你expect $25,000?咪玩啦,月經失調都唔夠你睇醫生, $38,000啦!

總之呢度嘅人工制度係入職唔好高過上一手,即係$38,000係底線。

不過我比Ashley做多一樣嘢,就係會坦白將呢間公司嘅情況向求職者講,同埋唔會等到last day先交接,我希望陪自己嘅replacement經歷下,唔想賣對方豬仔,因為好陰公㗎!結果有幾個candidate打退堂鼓,有個答應咗返工但no show,仲有一個返左兩日唔做,好在距離我last day仲有10日嘅時候終於搵到人。

我:「你真係Ok?」

Replace我嗰位新同事:「Ok呀,我本身份糧得二萬幾蚊,而家有$38,000喎,辛苦啲都抵啦!」

咦!呢句對白咁熟嘅,願主祝福你。

可能你會問,點解Zera喺咁惡劣嘅環境之下都唔走?老實講吖,我都好想知呀,不過唔敢問,嗰陣時好驚佢走得快過我,所以唔好理人咁多喇,離開咗灰窰角街就唔好望返轉頭,搵過份工仲實際啦!

(完)

error: