最近有個朋友叫我買勞力士，佢話股市唔明朗，投資又唔知搞乜好，反正啲錢擺喺度只會貶值，點解唔買返隻勞力士傍身，因為保本之餘仲有機會升，冇死錯人喎！
其實類似嘅說話我喺9年前已經聽過，當時舊公司個老細好鍾意show off，日日戴唔同嘅勞力士返工，喺嗰度做咗5年，每逢新年「被逼」去佢屋企拜年嘅時候，老細都會拎十幾廿隻珍藏名錶畀同事鑑賞，開口埋口就叫我哋買勞力士保值。
「嗱，呢隻係朋友讓畀我，12萬買返嚟，而家升到28萬。」呢句聽過佢講好多次，應該係好自豪執到筍貨。
佢嗰啲名錶加埋過百萬，住緊層千幾呎私樓，揸寶馬，雖然令我呢種公屋出身嘅食物鏈最低層睇到牙癢癢，不過我又唔係好羨慕，因為我根本對勞力士同車冇認識冇概念，恨都恨唔嚟，而且老豆老母成日灌輸一種想法畀我，就係有間公屋先係大贏家，當然啦，呢啲只係買唔起私樓嘅阿Q精神，但咁樣諗都唔錯吖，起碼個人樂觀啲，同人比較係最辛苦。
呢間舊公司留畀我好多回憶，始終5年唔係短時間，加上我喺度識到後來嘅女朋友Gladys，又經歷過有同事患癌嘅傷痛，所以真係刻骨銘心。
患癌嗰位同事而家唔喺度喇，其實佢當年發現嗰陣已經係末期，一切都好突然，人事部個阿姐仲喺公司發起籌款，因為患癌嗰位同事根本負擔唔起龐大醫療費，聽聞當時佢每個月淨係鏢靶藥嘅支出已經達到三至五萬，對一般打工仔嚟講簡直係天文數字。
仲記得籌錢嗰陣，Gladys先至啱啱入嚟做，連試用期都未過，但係佢有份捐錢，我就捐左$5000，雖然人事部阿姐一早講咗係隨心，而且捐錢係不記名，多少冇所謂，但其實諗返轉頭覺得自己捐太少，呢個係我當時嘅能力範圍喇。
嗰次公司籌錢總共籌咗18萬，銀碼比預期多，有個經理話老細捐咗一筆10萬，有人話呢個只係佢云云名錶中半隻勞力士嘅價錢，唔算好慷慨，但我個人反而幾欣賞，因為老細都唔係老奉要捐，嗰位同事有病之後亦quit咗，所以10萬唔係細數目㗎喇。
除咗勞力士老細，我仲好欣賞Gladys，呢個女仔入嚟做冇幾耐都有捐錢，所以覺得佢心地好好，咁當然啦，最吸引我嘅都係佢嘅美貌，唔好意思，男人係咁膚淺。
我覺得個天有製造機會比我同Gladys，作為IT狗，接觸女同事嘅機會肯定比Office入面其他男仔少，但唔知點解佢部機特別多問題，所以成日搵我整，搞多兩搞大家經常傾偈，佢話成日麻煩到我所以要請食lunch，結果愈嚟愈熟，我又大膽約佢出街，幾個月後就開始咗情侶關係。
同Gladys拍拖嘅事喺公司通晒天，不過我哋冇乜所謂，彼此嘅感情亦都好穩定，或者係情人眼裡出西施，我真係覺得衣著樸素又冇乜化妝嘅Gladys勝過公司裡面其他女同事，有一次Gladys同我講：「Daddy知道我拍拖，叫我帶你返屋企食飯，你想唔想？」
雖然諗起都緊張，但我已經認定咗Gladys，所以見家長係遲早嘅事，呢餐飯點都要食㗎啦！
就喺見Gladys屋企人之前幾日，一次lunch time等電梯我撞到人事部個阿姐，佢笑笑口咁問我：「你同Gladys幾時派帖呀？」
我：「傻啦，邊有咁快呀？」
「Gladys係好女仔嚟㗎，心地又好，又溫柔。」
我：「哈哈，我知，不過佢都有惡嘅一面㗎！」
本以為大家等電梯太無聊，求其搵個話題狗噏傾下，點知下一句竟然咁震撼。
「係喎，講開Gladys，Ricky太太特別托我同佢講多謝，我一直忘記同返你女朋友講。」Ricky就係患癌嗰位同事。
我：「係呀？Ricky太太又會識Gladys嘅？籌錢嗰陣Gladys都係啱啱嚟做，講真佢連Ricky都冇乜交過手，因為見到籌錢個list？又唔會吖，不記名㗎嘛。」
「因為Gladys捐10萬太多喇，呢個冇得唔記名，其實Ricky都唔好意思，佢話連Gladys呢位新同事個樣都唔記得，咁就接受咗人哋10萬，當時仲想唔要㗎，係Gladys堅持唔收返咋。」
我：「Gladys捐10萬？」
「你做人男朋友唔知㗎？咁你當冇聽過，可能佢唔想講都唔定，不過係我負責收大家啲錢同埋支票，所以我知邊個打邊個。」
我：「唔係喎，有個經理透露有人捐咗10萬，話係老細捐㗎喎！」
「佢哋對號入座啫，覺得呢個銀碼一定係老細捐，但我冇解釋咁多啦，只係冇諗過你都唔知，記得當冇聽過呀！」
我：「可能我同Gladys當時仲未拍拖啦，其實我一直以為係老細捐10萬。」
「老細，哈，佢捐咗100蚊咋！」
我：「100蚊？我都捐咗$5000喎！」
「咁你捐$5000同佢捐$100又冇關係既，嗰次籌錢又唔係跟職級去定銀碼。」
我：「接受唔到，之前有同事話老細半隻勞力士都唔止10萬，我仲鬧返佢哋轉頭，其實捐10萬已經唔算細數目。」
「咁佢有好多勞力士又同捐幾多錢唔掛勾嘅。」
電梯到，話題完結，我久久未能平復，平時鍾意show off嘅老細原來捐得$100當然好震撼，但Gladys捐10萬對我嘅衝擊更大，我知我女朋友心地善良，不過講緊10萬喎！唔要面講句，當年我戶口真係冇10萬，究竟Gladys係太好人定係太有錢？
（未完待續）