隔籬部門個男仔的確係有少少怪，平時會自言自語，佢同自己team班同事又冇乜交流，食飯都唔會一齊。
上星期呢個男仔唔知做錯乜，個阿姐走埋去話咗佢兩句，跟住呢個男仔忽然情緒大爆發，企起身拍枱大嗌，當時佢阿姐已經呆咗唔敢出聲，成個office靜晒，然後呢個男仔仲拎起釘書機，目露凶光對住佢班同事講：「我要殺L晒你哋！」
係連續講咗3次「我要殺L晒你哋！」
雖然佢拎住嘅係釘書機，唔係較剪或者鎅刀，但因為佢情緒好激動，所以真係好驚嚇，佢同team班人淨係呆晒，完全冇反應，結果係我部門個阿頭走去安撫呢位男同事：「去廁所洗個面吖，好小事啫，洗個面抖抖先，冇事冇事。」
我阿頭都算藝高人膽大，個男同事好激動咁抖咗幾次大氣之後，亦聽勸告去咗廁所洗面。喺個男仔離開座位期間，佢同team班人先至夠膽講嘢，七嘴八舌喺度傾點算，又話不如炒咗個男仔……
十幾分鐘後個男仔返嚟，佢好似冇事發生過咁繼續做嘢，同日放工個男仔自己辭職，佢阿姐唔使佢坐一個月，即刻畀佢走
唔知個男仔係本身已經情緒唔穩定，抑或入嚟做之後先有情緒病，但見佢同自己部門班人唔係好夾，連體貼同安撫嘅說話都係由我哋阿頭講出嚟，所以我覺得個男仔離開呢間公司未必係壞事，希望佢下一份工會開心啲，搵到一班肯同佢溝通嘅同事。