去女友屋企食飯，伯母直接問我幾錢人工，我話兩萬零蚊。
「咁少？」
我：「……」
當時內心嘅獨白係～～伯母，我出嚟做嘢都未夠3年，你想我賺幾多呀？
「即係一年可以儲30萬喇喎！兩年儲到首期啦，你哋結婚唔好租樓呀，租即係幫人供，最蠢就係咁！儲兩年有60萬畀首期，到時好買樓喇！」
我：「唔好玩啦！兩年點儲60萬呀？」
「點解唔得呀？慳慳地一定得㗎！睇你有冇心㗎啫！你而家自己租地方定係同屋企人住？」
我：「同屋企人住。」
「咪係囉！點解唔得先？同屋企人住已經慳好多啦！你仲有冇其他使費吖？」
我：「冇喇，平時食晏我去麥當勞執人食淨啲薯條，沙田出荔枝角返工就行路，慳返啲車錢！朋友就唔需要喇，娛樂要使錢呀！畀家用就問朋友借，呀！唔記得我冇朋友，以後每個月問同事借錢畀家用啦！」
份糧扣埋強積金得22,000，唔食、唔玩、唔用、唔睇醫生，年薪都冇30萬啦！伯母果然係冷面笑匠，好風趣呀！
雖然餐飯食得唔開心，不過冇影響我同女友之間嘅感情，因為我女友好勇猛，佢喝自己阿媽收聲，我一路食飯一路睇住佢兩母女鬧交，真係精神爽利！