小妹喺C字頭電訊公司做Hotline嘅客戶服務，之前收到個電話，個客人投訴我哋唔講口齒，因為佢續咗約，同事答應送MyTV SUPER機頂盒，會send封email畀佢落元朗門市自取，不過隔咗成個月都收唔到呢封換領嘅電郵。
個客愈鬧愈激動，粗口咩都出齊，又話要搵東張西望唱衰我哋公司，其實做咗咁多年，對住呢啲客都慣晒，你唔使同佢勞氣，因為你愈勞氣佢愈激動，隨時搵到位入你，所以我當佢唱歌，再叫佢send返續約份contract嚟睇睇先，方便跟進同埋搵返相關同事。
同佢對話過程可謂受盡恐嚇，係咁問我叫咩名，有冇直線，總之send返份contract畀我睇之後，一定要由我follow，如果再收唔到MyTV SUPER機頂盒會向總公司投訴我，又會喺各大討論區開我個名，印象深刻佢講咗呢句：「而家疫情大把人冇嘢做，啱啦，你呢啲廢物都應該要失業。」
Anyway，咁我收到份contract之後就主動call佢：「先生，見到你續約份文件同埋MyTV SUPER嘅客戶同意確認書喇。」
「係呀，DLLM呢啲你就send晒畀我呀，但換領信就冇，同你哋續約真係笨L柒，唱硬你公司，DLLM咁樣做嘢，做死一世客戶服務啦！DLLM，而家過晒期限都換唔到，仲話兩年MyTV SUPER免費任睇，補返一個月嚟添呀！DLLM！」
數唔到佢講咗幾多次DLLM，真實中一定比我呢段文字更多。
我：「先生，建議你向香港寬頻查詢，因為你呢份續約文件唔係CXX，係香港寬頻。」
「香港寬頻？咦！唔係CXX咩？咁冇嘢喇！」
一句sorry都冇講即刻cut線，呢條友send咗兩份文件嚟，一份係香港寬頻續約嘅contract，一份係MyTV SUPER客戶同意確認書，佢連自己同邊間公司續約都未搞清楚，仲有，香港寬頻續約contract裡面有提及，個MyTV SUPER機頂盒係去3hk門市拎，喂你用下個腦啦，喺CXX續約有冇可能叫你去3hk拎贈品呀醒目仔！
之前唔係好威㗎咩？又DLM，又話要報東張西望，又要去討論區開我個名，而家知道自己柒咗連講句對唔住嘅勇氣都冇，即刻收線當冇件事發生過。
其實好多呢啲客，有啲就擺明靠屈，記得曾經有個客打嚟話帶Number過台送Samsung部新摺機，我真係R晒頭幾時有呢個優惠呀？佢係咁講咗一大輪，又問如果自己喺另一個台嘅合約未完，帶Number轉嚟係咪一定唔使賠錢，有佢講冇我講，幾經辛苦先可以打斷佢插嘴。
我：「小姐，唔好意思，或者講返送Samsung摺機嗰部分先，請問你喺邊度見到呢個優惠？」
「冇見到呀，我自己諗咋，帶Number過台唔係應該有機送咩？你冇著數我轉嚟做咩？」
嘩！你自己諗呀？咁幾時到我諗呀？反正都係諗，你唔諗下轉台我哋送層樓畀你？唔好咁痴線啦！
仲有啲人極度冇禮貌，早兩日先有個阿叔打嚟，咁我例牌要講：「先生你好，請問有咩幫到你？」
「打嚟就梗係問電話月費啲嘢啦，唔通打嚟約你食飯呀？出嚟燒嘢食好冇？」
其實唔使咁喎，我哋都係打份工啫，基本應對呢啲係公司指引，有咩幫到手咪出聲囉，點解一嚟就要咁臭寸呢？有時真係唔怪得香港咁重怨氣。
有同事噚日先畀另一個客以粗口辱罵，祖宗十八代都鬧齊，仲話佢做得客戶服務就預咗要受氣，人工包埋，所以同事覺得好委屈好想鬧返對方，好在沉得住氣。
個人認為對住呢啲西客唔需要動真火，你諗下，佢哋咁小事已經歇斯底里，人生肯定好失敗，唔需要同佢哋對罵，我敢肯定呢種人喺現實生活中已經夠晒唔開心，可憐之人必有可恨之處。
IG噚日先有個關於西客嘅post🤦🏻♂️
https://www.instagram.com/officedailyhk/