搵到份新工，返咗兩個星期多啲，發現阿頭勁好人，唔止毫無架子，仲要笑臉迎人，基本上佢係唔會就咁樣叫同事做嘢，每次有工作指派畀下屬嘅時候，阿頭都會客客氣氣問啲同事得唔得閒，搞唔搞得掂，呢啲上司咁民主，絕晒種啦！
如果要講一樣阿頭嘅缺點，我諗係大頭蝦冇記性，因為有一次得我同佢去食lunch，諗住近近地過咗對面間大快活，佢唔記得撳錢冇cash，八達通又未增值，結果叫我Do住先，之後就冇畀返錢我，咁我見佢個飯都係40幾蚊，無謂咁計較啦，所以冇特別追返飯錢。
不過以上係我初入嚟嗰陣一廂情願諗嘅嘢，實情似乎唔係想像中咁單純，因為早幾日有位同事瀨大鑊，呢單嘢令到公司畀人投訴，所以驚動埋大老細，阿頭唔出聲真係唔得，結果開會時就發生呢一幕。
阿頭：「阿全你點搞呀？冇對過先send出去㗎咩？」
阿全：「可能睇漏咗。」
阿頭：「唔好可能呀，會死人㗎！頭先大老細詐型，搞到我口啞啞。」
平時阿頭係唔會咁樣話人，咁樣講即係代表阿全衰得好應，而其實比起其他公司，我阿頭嘅語氣仍然屬於溫和，點估到……
阿頭：「真係兜唔到喎，不如咁啦，之後你啲嘢比多個同事幫幫眼……」
阿全忽然躁咗，指住阿頭講：「唔好講咁多，還錢先！」
全場靜晒，我呆咗。
阿頭：「喂，一單還一單吖……」
阿全再重複，今次仲拉長語氣：「唔～好～講～咁～多～還錢先！」
會議室鴉雀無聲，阿頭主動轉話題，媽！好尷尬呀！
後來了解返，原來阿頭問阿全借過幾次錢，最近一次係借$4000蚊，但係近半年以嚟都係還得$300蚊咁大把，換言之仲欠阿全$3700，而其他同事都先後借過錢畀阿頭，有啲借幾千，有啲借幾百，總之個個都係阿頭嘅債主。
咩事周圍欠人錢呢？聽返同事講，阿頭好鍾意賭，馬又啱，波又啱，疫情之前仲成日去澳門。
阿全份人其實冇乜嘢，但面皮就比較薄，雖然知道自己做錯嘢，但仍然接受唔到大庭廣眾畀阿頭責罵，一時火遮眼先會講還錢呢樣嘢令阿頭收聲。
我反而係呢件事嘅受害者，因為阿頭叫我幫阿全double check啲嘢，變相又多一樣工作，其實呢度個個都係佢嘅債主，叫人又叫唔郁，下屬做錯嘢又唔鬧得，都幾冇尊嚴🙈 唔怪得最初見佢對其他同事成日笑口噬噬啦！
不過幾千蚊都要借，睇嚟阿頭真係幾窮。
諗諗下$3700我有，不如蝕底啲借畀佢找阿全條數，當係疏通費減輕吓工作量都咪話唔爽，喺度做一年，$3700 除 12個月，每個月都係$308.33啫，有事屌返阿頭轉頭仲得喎，抵借吖！