唔知大家對返office染頭髮有咩睇法，因為我驚係自己嘅標準太寬鬆，個人立場嚟講，如果份工要經常對客，其實金金啡啡係好普遍，除非誇張到辮子頭或者萬紫千紅咁樣，否則我都可以接受，而如果職位同工作上根本唔使對客，尺度上就容許再大啲，唔係出現污糟邋遢嘅衛生問題影響到人就得，至於順唔順眼其實好主觀。
我有個女下屬見工時已經係灰灰銀銀嘅長髮，坦白講幾靚，連我都想整。呢位女同事耐唔耐就轉下color，但佢個髮型係唔誇張嘅，純粹顏色上嘅轉變，有時好金，試過髮尾有啲粉紅，亦深過深藍，而佢嘅position係Sales Coordinator，唔使出街見客，主要係向sales team提供support，例如準備好啲sample同leaflets，打invoice，經電話追啲客找數，而client亦唔會上嚟我哋公司，照道理佢染頭係冇問題。
一直都相安無事，但早排其中一個老細就睇唔過眼，描述得清楚啲先，呢位老細平時唔會喺公司做嘢，稱佢為股東之一會比較適合，一年上嚟三至四次左右。但每次上嚟都眼望望。
呢位股東見到我女下屬個頭染咗綠色，走去同佢partner，即係我老細投訴，話唔容許同事染到個頭咁樣，會損害公司形象。
股東同老細投訴，老細受到壓力又向我反映，咁我就表達自己嘅睇法：「佢唔使見客有咩問題。」可能老細覺得我嘅回應比較堀，跟住就話我唔識得管理班下屬，太縱容佢哋。
其實我唔係縱容，純粹以事論事，1）呢位女下屬的確唔需要對客；2）合約冇寫明唔可以染頭髮，更加冇列明邊啲顏色可以，邊啲顏色唔可以，金色都分好多種啦，有啲好MK，有啲好普遍，唔通拎住個色版去區分咩；3）員工都係賣office hour畀公司啫，連頭髮顏色都要管，咁做會唔會剝奪埋佢嘅人身自由呀？
因為個股東上次嚟office嘅時候望住女下屬面露不悅，仲要好明顯嗰隻，其他同事都睇得出唔友善，連隨老細又叫咗我入房傾一大輪，所以嗰位女下屬都有問返我係咪發生咩事，我照直講，亦都叫佢唔使擔心，我已經解釋得好清楚畀老細聽。
過多幾日，老細再叫我入房，話嗰位股東落命令，如果下次再見到個頭係綠色，就要個同事自己離職，我苦惱緊點樣解決嘅時候，女下屬第二日返嚟已經染返一頭黑髮，仲話睇得出喺呢件事上面我好難做，咁佢再唔滿意都好，現階段未想轉工，所以就選擇妥協，始終老細要炒一個人嗰陣，任何原因都可以出手。
見到呢個妹妹仔咁識得為大局著想，仲要幫我呢個阿姐諗埋，真係覺得佢性格好好，但我望住佢頭黑髮就有啲內疚，唔係為反而反，只係打工仔平時已經好多掣肘，畀返啲自主空間佢哋啦！
投稿讀者：Isabel