「周生勁cheap囉，你見唔見到佢部電話？唔知係iPhone 5定係6，仲要爆Mon，好心佢就換機啦！」
介紹返，周生係我哋老細，而話人cheap嗰位同事就叫Stephen，雖然佢係新仔，人工20,000左右，不過用嘅、着嘅、食嘅都一定要最好，典型月光族，唔係要生活先至搞到月光，佢曾經好自豪咁話自己連家用都唔使畀，所有錢就用嚟買最潮最新嘅嘢。
我：「周生唔換機關你咩事，佢慳自己啫，又唔係慳我哋份糧，你自己都話啦，畢業後得半年經驗，佢都肯用兩皮嘢請你。」
「係啫，樣衰吖嘛！噚日同周生出去見客，大家擺咗部電話喺枱面，個客用Samsung最新嗰部褶機，我用iPhone 13 Pro，周生嗰部就殘殘舊舊，有一邊角仲爆埋。」
我：「咁就叫樣衰？點界定？」
「點界定？睇下老細部錢七，好心佢換車啦，真係call Uber冇咁樣衰。」
左一句樣衰，右一句樣衰，喺Stephen眼中牌頭就等於一切，總之唔係用最新、最貴、最好就叫樣衰，好在佢唔係女仔，否則咁嘅價值觀應該好大鑊。
我哋幾個資深嘅同事聽完都搖搖頭，其實周生份人不嬲慳自己，Office唔係太多同事帶飯，老細反而係其中一個，仲有周生啲衫褲鞋，十年如一日，來來去去都係著嗰幾件，不過佢又從來唔會刻薄啲員工，so far呢度人工唔係最高，但對比起市價絕對唔低，你睇下Stephen大學畢業半年經驗一入嚟有20,000都略知一二，而pantry嘅咖啡茶包同辦公室基本設備亦有齊，雖然微波爐雪櫃嗰啲電器唔係最新型號，但起碼要用嘅硬件從來不缺。
既然我哋份糧唔係差，福利亦有齊（有雙糧有bonus），咁老細用邊個型號嘅電話又有乜所謂呢？
講開電話，之前都有同事問周生點解唔換，係出於關心嗰隻，唔係好似Stephen咁恥笑人唔用最新model，因為周生部機爆Mon唔係新鮮事喇，起碼爆咗兩年，當時周生笑住講：「係啦，唔小心畀個仔喺張枱推咗落地，拎去問換Mon幾錢，對方話要兩千幾，咁貴唔換啦，角位之嘛，仲睇到，又唔影響用電話，換新機好浪費。」
後來周生同我哋講，佢細個屋企好窮，一家人住喺嗰啲板間房，類似而家劏房同以前籠屋之間，廁所同廚房要同幾戶人share，父母加埋三兄弟屈喺一個勁細嘅空間，每逢夜晚就有老鼠走出嚟，好大隻，因為幢大廈本身好舊好殘。
周生仲話，佢爸爸做苦力，仲要唔係成日有工開，父母經常齋哽白飯，留返啲菜同肉畀佢三兄弟姊妹，有病又冇錢睇醫生，生活好艱苦，周生同哥哥好細個就輟學，因為想早啲出嚟做嘢幫補家計，後來排到公屋生活環境先好咗。
周生唔止一次自嘲話雖然係老細，但學歷係全公司最低，當年搞生意某程度上係「被迫」，因為冇學歷，英文又屎，好多工都唔請，唯有努力儲錢做啲生意仔，自己請自己，好辛苦先捱到今時今日，所以就算而家賺到錢都好，佢都唔會忘記細個一家人窮困嘅日子，繼而養成咗慳儉嘅習慣。
iPhone 13其實佢買得起，Samsung最新褶機都肯定冇問題，但係周生份人嘅性格係咁，童年對一個人影響好深遠，佢奉行嘅生活方式係電話仲用得就用，架車仲揸得就揸，反正老婆有煮飯，街外嘢貴得嚟亦未必好食，所以咁多年嚟都有帶飯盒嘅習慣，佢覺得唔需要樣樣嘢都用最新、最貴、最靚、最好去證明自己，因為，佢已經證明咗自己。
Stephen入嚟做嘅日子尚淺，唔知道疫情之前周生成日拉大隊做義工，我都跟過幾次出去派飯，周生啲錢有好多都用咗嚟買物資，聽講佢細個屋企冇錢開飯嗰陣，曾經有義工上去分租板間房派食物、派飲品、派日用品，呢種感覺一世都會記得，所以賺到錢有能力嘅時候，好想做返同一樣嘅嘢。
我同Stephen講：「下年應該有機會再組義工隊派飯，到時叫埋你啦，咁你就會明周生啲錢用咗喺邊。」
Stephen：「咁戇居？畀我就換咗部電話同埋買架Tesla先喇。」
畢竟Stephen都係小康之家出身，你見佢唔需要畀家用就知啦，所以Stephen唔清楚窮嘅滋味係點，亦唔會代入到基層或者貧窮線下嘅心態，不過既然價值觀唔同，亦無謂迫個後生仔認同，或者將來佢成熟啲就會識得企喺別人嘅角度去諗。