疫情有幾耐，我公司嘅裁員消息就傳咗幾耐，每日返工都好似畀人恐嚇咁，因為我哋個阿頭三句唔埋兩句就會叫大家醒定啲，唔好計較OT，唔好計較workload，仲強調大老細想佢草擬一份10個人左右嘅裁員名單，交咗嘅人名就冇得留低。
最初嘅時候個個人心惶惶，你都知道疫情期間好多公司都做唔住啦，出面啲招聘廣告少咗好多，有個同事試過send CV出去，有回音㗎，但去見工之前對方話office有人中招，interview要押後另行通知，最後就不了了之。
裁員嘅傳聞耐唔耐就有風吹出嚟，有時話裁20個，有時10個，有時5個，有時又話每個department cut一個，坦白講，裁就一句，唔裁就兩句，我阿頭經常咁樣強調反而仲折磨，間唔中我都會諗：係炒就快啦，等自己可以重新計劃下仲好，而家好似吊住條命咁。
早排有個同事買咗張敬軒演唱會飛，阿頭臨時話要OT，個同事梗係唔制啦，然後阿頭就話：「睇concert緊要定係份工緊要呀，你唔係唔知呢度蘊釀緊減人手，老細一陣路過見你咁早走，真係會加你個名落張list度㗎！」
演唱會開8點，份工本來收6點，個同事7點幾先收工都好遲啦，阿頭咁都話佢係早走，但個同事又唔爭氣，真係留低OT，佢話自己仔細老婆嫩，冇咗份工唔知點算喎，最終畀咗張飛老婆搵另一個friend去睇。
其實以前我哋見完客可以直接返屋企，不過阿頭成日話時勢唔好，叫大家無論見客見到幾多點，最後都要返公司打埋卡先好走，啲sales個個苦不堪言，因為有時去完client visit都5點幾6點，特登返去打卡的確幾無謂。
吹咗兩年有多，一個人都未裁過，但係早幾日又畀阿頭「恐嚇」。
阿頭：「今晚我會同老細食飯，6點就走㗎喇，你班友咪趁我唔喺度就偷懶呀，我聽佢語氣係想傾下減邊啲人手，我保住你哋都好辛苦㗎，唔好要我難做呀！」
估唔到講咗咁多次，裁員嘅傳聞終於都成真喇，當晚阿頭打畀我，語氣非常嚴肅，一聽已經知道冇好嘢。
阿頭：「你聽朝返到公司， 9:30可唔可以落樓下cafe搵我。」
聽到呢句就心寒，因為我真係識得一個朋友畀公司炒魷魚，上司當日唔畀佢返公司，約佢喺Office樓下嘅餐廳講，好似係驚被解僱嘅員工會接受唔到或者搞事。
我：「下，點解呀……」我差啲想講有層樓仲供緊，唔好咁殘忍啦，但係作為一個成年人，要咁樣搖尾乞憐又有少少唔慣，最終忍住冇講。
阿頭：「妖！我畀人炒咗呀！」
我：「你畀人炒咗？」太突然，當時唔知點回應，只識得重複一次呢句說話。
阿頭：「係呀，你老細頭先約我食飯，話要減支出，總之你聽日一返到公司，去我枱面拎返隻杯同相架，有個earphone，另外有本黑色記事簿，仲有棵富貴竹，幫我拎埋落嚟cafe吖，我唔想返上office同咁多人解釋，9:30喎，準時喎，記得喎！」
Oh my god！裁員係真㗎，不過最終冇裁我哋，係裁阿頭，即刻將呢個消息散畀同事聽，個個都開心到瞓唔著咁滯。
第日我準時返到office幫佢執嘢，9:30就拎落cafe畀佢，總以為會飲杯啡傾兩句，不過阿頭拎咗啲嘢就走，話趕時間。
後來有HR同事過料畀我哋聽，原來老細覺得阿頭嘅人工最高，一個夠頂我哋三至四個人，與其裁幾個，不如裁一個，之後再內部提升同事做阿頭個position，認為咁樣幫到公司慳錢之餘，士氣方面又唔會有太大影響。
明智呀！我哋個個都咁勤力，人工又唔係高，你裁班小職員把鬼咩，裁一個先慳得一萬幾千，梗係裁個幾皮嘢人工㗎啦！聽返HR同事講，老細暫時都唔會再諗cut人喇，估唔到日日恐嚇我哋會裁員嘅阿頭，最後成為唯一被裁嘅人，我哋成班同事都好滿意呢個結局。