首先呢個唔係廣告，而係我之前去台灣宜蘭住嘅一間民宿叫「黑舍noir」，好想同你哋分享台灣人係點睇生活同埋小朋友教育等細節。
當日book呢間民宿係畀佢個穿窿建築設計吸引，後來去到同老闆兩公婆傾計，先知佢哋一個來自台北，一個來自高雄，因為工作而結緣，婚後決定放棄原本穩定嘅工作，走咗去宜蘭嘅頭城開民宿，老闆娘話鍾意呢度嘅學校奉行「求學不是求分數」，佢希望小朋友可以輕鬆學習同埋快樂成長。
民宿係佢哋親手裝修既，我問呢棟嘢自己搞要搞幾耐？佢哋答我用咗一年幾時間，做下抖下停下，生活就係想咁。台灣人所指嘅慢活，我都好想有一日可以體驗。
咁都未算，呢間民宿有個好靚嘅飯廳，原來佢哋以前會開埋做餐廳，專做晚市，及後發現太忙，冇時間陪仔女，結果決定餐廳部分唔做，只留嚟招待朋友食飯吹水，仲有畀民宿租客食早餐，目的係唔想掛住做嘢而忽略咗小朋友。
當時老闆兩公婆都有慰問我香港反送中嘅情況，佢哋仲畀咗之前另一個香港遊客寫嘅卡我睇。Check out嘅時候，老闆又放低手上工作，車咗我出去食刨冰，佢哋搞到我愛上咗呢度，而家冇得去台灣，甚至邊度旅行都去唔到，唯有拎返條片出嚟睇，當做望梅止渴。
好掛住台灣，點算😭