噚日，兩個朋友同我講公司裁員；今日，又多一個舊同事話佢公司預告執笠，老闆叫班伙計搵定工。
其實武漢肺炎對社會嘅潛在影響好多都未浮面，未來兩三個月嘅路可能仲難行，大家要對身邊嘅人多一份支持同埋諒解，因為我其中一個被裁嘅朋友，噚晚同屋企人講咗做多一個月冇得做之後，家人嘅反應係：「點解個個唔裁淨係裁你呀？都叫你平時請少啲假㗎啦！」
🤦🏻♂️🤦🏻♂️🤦🏻♂️
曾經聽過一番說話，我哋呢一代人，好多都係冇退路，亦冇所謂嘅避風港，唔係每個人都有溫暖嘅家，跌落谷底之後，家人甚至會畀更大壓力，喺你嘅傷口上再度灑鹽。
好在呢位朋友都算硬淨，可能由細到大已經慣咗，心理調節到，我叫佢頂住，佢話自己：「身後無人，豈敢倒下。」睇住呢個msg，我覺得好倔強，但又有種孤軍作戰嘅感覺。
當全球都畀武漢肺炎害到雞毛鴨血嘅時候，希望你身後有人，但依然唔會倒下。